BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

دىمكاس بالالارمەن جۇمىس ىستەۋدى توقتاتپاۋ كەرەك – وڭالتۋ دارىگەرى

فوتو: Автор

كوكشەتاۋ، baq.kz ٴتىلشىسى. 2018 جىلدىڭ «ۇزدىك الەۋمەتتىك جوبالار» بايقاۋىنىڭ «جۇرەك جولى» جوباسىنىڭ قاتىسۋشىسى، وڭالتۋ دارىگەرى گاۋھار كامەلينوۆانىڭ ماقساتى – دەنساۋلىعىندا كىناراتى بار بالالاردى ەمدەپ-جازۋعا اتا-انالاردىڭ ٴوزىن قاتىستىرۋ.

گاۋھار تەمىرعاليقىزى كوكشەتاۋ قالاسىندا «يا سام شاگايۋ» قوعامدىق قورىن قۇرعان. بيىلعى ماۋسىم ايىنان باستاپ سال اۋرۋىنا شالدىققان بالالاردى وڭالتۋ ورتالىعىن اشىپ، جۇمىس ىستەۋدە. ولاردى قيمىلداۋعا، قوزعالۋعا ۇيرەتەتىن ٴتۇرلى قۇرال-جابدىقتاردى اعاشتان ٴوز قولدارىمەن جاساعان.

گاۋھار كامەلينوۆا بۇل جۇمىستى قولعا الۋدا جارى ماراتتىڭ كوپ كومەك كورسەتكەنىن ايتادى. ەرلى-زايىپتىلار 12 جاستاعى سال اۋرۋىنا شالدىققان قىزدارىن گلەنن دومان، اۆا تەراپياسىنىڭ كومەگىمەن اياعىنان تۇرعىزىپتى. سول قىزدارىن ەمدەۋ جولىندا بار كۇشتەرىن اياماي جۇمساعان اتا-انا ەگەر ەرىنبەسە، بالاسىن ەمدەپ جازۋعا بولاتىنىنا كوز جەتكىزگەن.

اقىل ەسىندە كىناراتى بار، ٴارى سال اۋرۋىنا شالدىققاندىقتان بالعىندار وزدىگىنەن ٴجۇرىپ، تۇرا المايدى. اراسىندا جۇرەتىندەرى دە بار. 8 بەن 12 جاس ارالىعىنداعى بالالاردىڭ دياگنوزى ٴار ٴتۇرلى: سال اۋرۋى – سەرەبرالدى پاراليچ، تالما اۋرۋى – ەپيلەپسيا، ٴبىراق ٴبارىنىڭ ميىندا اقاۋ بار. بالالاردى وڭالتۋ ٴۇشىن گلەنن دومان جانە اۆا تەراپياسى قولدانىلادى.

«گلەنن دومان تەراپياسى – امەريكاندىق ەمدەۋ ٴادىسى. ونى امەريكاعا ارنايى بارىپ، ۇيرەنىپ، سەرتيفيكات الدىم. تەراپيانىڭ ماقساتى – تەك مىنەز-ق ۇلىقتى عانا ەمەس، اقىل-ويدى دامىتۋ. مىسالى، ٴىرى موتوريكاسى دامىماعان بالانى جازۋ-سىزۋعا، تۇستەردى اجىراتۋعا ۇيرەتكەننىڭ ەش پايداسى جوق. كىشى موتوريكاعا قابىلەتتى بولۋ ٴۇشىن ادامنىڭ ويلاۋ قابىلەتىن دامىتۋ كەرەك. امەريكاندىق فيزيوتەراپەۆت دارىگەر گلەنن دومان تەراپياسى ناۋقاس بالا الدىمەن قوعامنىڭ ٴبىر مۇشەسىنە اينالۋى كەرەك، سودان كەيىن عانا وقىتۋ جۇمىستارىن قولعا الۋ كەرەك دەگەندى ۇستانادى»، – دەيدى ورتالىق ديرەكتورى.

جارتى جىل بۇرىن جاي عانا قيمىلسىز جاتاتىن بالالار ەڭبەكتەپ جۇرۋگە، تىزەرلەۋگە ۇيرەنگەن. ولارعا ارنالىپ جاسالعان تىرەۋىشتەر، مىنىپ-تۇسەتىن تابالدىرىقتار، ورنىنان تۇرۋعا كومەكتەسەتىن ۇستىندار بار. ەڭكەيتپە ەدەنگە جاتقىزعاندا، بالا جىلجۋدى ۇيرەنەدى. ۇستەلدە جەكە بۋىن جاتتىعۋلارى جاسالادى. مىسالى، بۇدان بۇرىن بۇراتىلىپ جاتاتىن بالا، ۋاقىت وتە كەلە ارقاسى تۇزەلىپ، بەلىن تىكتەپ، تىزەرلەي باستاعان.

«باستى ماقسات – بالالارىن وڭالتۋعا اتا-انالاردىڭ ٴوزىن قاتىستىرۋ. ولار ماماندار ەمدەپ بەرەدى دەپ قاراپ وتىرماۋى كەرەك. ۇيگە بارعاسىن دا دىمكاس بالالارمەن جۇمىس ىستەۋدى توقتاتپاۋ كەرەك. سوندا عانا ناتيجەگە جەتۋگە بولادى»، – دەيدى گاۋھار تەمىرعاليقىزى.

تاربيە تاجىبايەۆا ەسىمدى اجەي سال اۋرۋىنا شالدىققان توعىز جاسار نەمەرەسىن ساۋىقتىرامىن دەپ اقتوبەدەن كەلىپتى.

«ورتالىقتىڭ ناتيجەلى جۇمىسى جايلى ينتەرنەتتەن، گازەت ماقالالارىنان وقىپ ٴبىلدىم. تامىز ايىندا ٴبىر وڭالتۋ تەراپياسىنان ٴوتىپ، تاعى دا كەلدىك. وسىندا كەلگەننەن باستاپ نەمەرەمنىڭ دەنە ٴبىتىمى وزگەرىپ، شىمىرلانىپ، باسىن ۇستاي الاتىن بولدى. ورتالىقتا ارنايى بولمەدە جاتىر. بۇعان دەيىن ۋكراينا، رەسەي، قازاقستاننىڭ ٴبىراز ەمدەۋ مەكەمەلەرىنە اپاردىق. وسىنداي قىسقا مەرزىمدە جاقسى ناتيجەگە جەتكەن جوق ەدىك. باسقا ورتالىقتاردا بالانى الىپ كەتىپ، ٴتۇرلى پروسەدۋرالار جاساپ، قولىمىزعا اكەلىپ بەرىپ، قويا بەرەتىن. ال ورتالىق ماماندارى اتا-انانى، اتا-اجەلەردى جانىنا تۇرعىزىپ قويىپ، جاتتىعۋ جاساۋدى ۇيرەتەدى»، – دەيدى ت.تاجىبايەۆا.

ورتالىقتىڭ تاعى ٴبىر بولمەسىنە اپتاسىنا ٴۇش رەت تالما اۋرۋىنا شالدىققان بالالار جانە جۇيكە جۇيەسى زاقىمدانعان ەرەسەكتەر دە اكەلىنەدى. مىسالى، 37 جاستاعى تالاپ بۇرىن زىڭگىتتەي جىگىت ەدى. باسىنان قاتتى جاراقات الىپ، ٴبىر اي بويى ەس-تۇسسىز جانساقتاۋ بولىمىندە جاتىپتى. كەيىن ٴتىپتى دەنەسى قاتايىپ قالعان. ورتالىقتا جاساعان جاتتىعۋلاردىڭ ارقاسىندا باستاپقىدا بەلى بۇگىلىپ، ەڭبەكتەي باستاپتى. ٴقازىر تاياققا سۇيەنىپ جۇرەدى. اناسىنىڭ ايتۋىنشا، ٴقازىر قالادا ەرەسەكتەرگە ارنالعان وڭالتۋ ورتالىعى جوق.

16 جاسار اقىل-ەسى دۇرىس، تەك تالما اۋرۋىنا شالدىققان ساماتتا كۇنىنە كەيدە 3-4 رەت ۇستاماسى بولۋى مۇمكىن. سوندىقتان ۇنەمى جانىندا اناسى وتىرادى. مۇعالىمدەرى ۇيگە كەلىپ وقىتادى.

«گلەنن دومان ٴادىسى بويىنشا، ارنايى ماسكالار بار. ۇستامانىڭ الدىن الۋ ٴۇشىن جارتى ساعات سايىن وسى وتتەگى ماسكاسى پايدالانىلادى. سول ارقىلى ۇستاما بۇرىنعىداي اۋىر وتپەيدى»، - دەيدى ورتالىق ماماندارى.

4 جاسار ٴالياسقار ەسىمدى قۇلاعى ناشار ەستيتىن بالانى اناسى اينانىڭ ورتالىققا اكەلىپ جۇرگەنىنە ٴبىر اپتا بولىپتى. وسىندا جاسالعان جاتتىعۋلاردىڭ ارقاسىندا وزدىگىنەن وتىرىپ، جۇمىلىپ تۇراتىن وڭ قولىنىڭ ساۋساقتارى اشىلىپ، يكەمگە كەلە باستاپتى.

ورتالىق ديرەكتورى الداعى ۋاقىتتا بۇل جۇمىسىن كەڭەيتۋدى كوزدەيدى.

«قول ۇشىن سوزامىن دەيتىن جاندار بولسا، ورتالىقتىڭ ەسىگى ٴاردايىم اشىق. ەڭ باستىسى، ىنتا قاجەت. ياعني كەز كەلگەن ادام دىمكاس پەرزەنتىنە قولىن سوزسا، كوپ كەدەرگىلەردى جويۋعا بولادى. تەك شىن نيەت كەرەك. بالاسىن دامىتۋعا ارنالعان وسىنداي قۇرال-جابدىقتاردى ۇلگىسىنە قاراپ اتا-انا وزدەرى دە جاساي الادى»، – دەيدى گاۋھار تەمىرعاليقىزى.

فوتولار: اۆتور


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي