BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

حالىققا قىزمەت كورسەتۋ ورتالىقتارىنا بايلانىس مينيسترلىگى يە بولماق

استانا. 13 ٴساۋىر. قازاقپارات  /قانات مامەتقازى ۇلى/ - بۇگىن قر پارلامەنتى ٴماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىققا قىزمەت كورسەتۋ ورتالىقتارىنىڭ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى.

اتالعان زاڭ جوباسىنا ٴماجىلىستىڭ ٴبىر توپ دەپۋتاتتارى باستامالىق جاساعان بولاتىن. تۇتاستاي العاندا، قۇجات حالىققا قىزمەت كورسەتۋ ورتالىقتارىنىڭ جەكە جانە زاڭدى تۇلعالارعا «جالعىز تەرەزە» قاعيداتى بويىنشا مەملەكەتتىك قىزمەتتەر كورسەتۋىنە بايلانىستى قاتىناستاردى رەتتەۋدى جەتىلدىرۋ ماقساتىندا ازىرلەنگەن. وسىعان وراي زاڭ جوباسى ورتالىقتا قامتىلعان فۋنكسيالاردى جەرگىلىكتى اتقارۋشى ورگانداردان اقپاراتتاندىرۋ سالاسىنداعى ۋاكىلەتتى ورگانعا بەرۋدى كوزدەيدى.

ەستەرىڭىزگە سالا كەتەيىك، حالىققا قىزمەت كورسەتۋ ورتالىقتارى 2005-2009 جىلدار ارالىعىندا ادىلەت مينيسترلىگىنىڭ قۇزىرىندا بولىپ كەلگەن ەدى. 2010 جىلى ورتالىقتار جەرگىلىكتى اتقارۋشى ورگانداردىڭ قاراماعىنا وتكەن بولاتىن. وسىعان بايلانىستى ياعني، جەرگىلىكتى اكىمدىكتەرگە بەرىلگەننەن كەيىن ونىڭ جۇمىسى حالىققا قىزمەت كورسەتۋدىڭ ساپاسىنا كەرى اسەر ەتكەن. «مەملەكەت باسشىسى حالىققا قىزمەت كورسەتۋ ورتالىقتارىنىڭ فۋنكسيالارىن جەرگىلىكتى اتقارۋشى ورگانداردان الىپ، بايلانىس جانە اقپارات مينيسترلىگىنە بەرۋدى، سونداي-اق ورتالىقتاردىڭ شارۋاشىلىق جۇرگىزۋ قۇقىعىن مەملەكەتتىك كاسىپورىن تۇرىندە جۇمىس ىستەۋىن قولداعان بولاتىن. وسىنى ەسكەرگەن دەپۋتاتتار زاڭ جوباسىنا باستاماشى بولدى»،-دەدى قۇجات بويىنشا بايانداما جاساعان دەپۋتات ايگۇل سولوۆەۆا

ونىڭ ايتۋىنشا، زاڭ جوباسىمەن جۇمىس بارىسىندا قۇجات «جالعىز تەرەزە قاعيداتى»، «مەكەن جايدىڭ تىركەۋ كودى» سەكىلدى ۇعىمدارمەن تولىقتىرىلعان. مۇنداي تۇزەتۋلەر ناقتىلاۋ جانە اركەلكى ٴتۇسىندىرۋدى جويۋ ماقساتىندا ەنگىزىلدى.

ٴماجىلىس ماقۇلداعان زاڭ جوباسى پارلامەنت سەناتىنا جىبەرىلەدى.

http://www.inform.kz/kaz/article/2370030


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي