BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاق ادەبيەتى انتولوگياسىنىڭ ورىس تىلىندەگى نۇسقاسىن ماسكەۋ مەملەكەتتىك ۋنيۆەرسيتەتى شىعارادى

استانا، baq.kz. 16 قازاندا ماسكەۋدە «رۋحاني جاڭعىرۋ» باعدارلاماسىن جۇزەگە اسىرۋ جونىندەگى ۇلتتىق كوميسسيا مەن «جاھاندانۋ الەمىندەگى زاماناۋي قازاقستاندىق مادەنيەت» جوباسىنىڭ رەسەيلىك سەرىكتەسى اراسىندا ىنتىماقتاستىق تۋرالى مەموراندۋمعا قول قويىلدى.

ناقتىراق ايتساق، «قازىرگى قازاق پروزاسىنىڭ انتولوگياسى» مەن «قازىرگى قازاق پوەزياسىنىڭ انتولوگياسىن» ورىس تىلىنە اۋدارىپ، باسىپ شىعارۋعا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ باسپا ٴۇيى، سونداي-اق رەسەي جازۋشىلار وداعىنىڭ ماسكەۋ قالالىق ۇيىمى اتسالىسادى.

قازىرگى زامانعى قازاق ادەبيەتىنىڭ ۇزدىك ۇلگىلەرى جيناعىن بۇۇ-نىڭ 6 تىلىنە اۋدارۋ قازاقستان رەسپۋبليكاسىنىڭ پرەزيدەنتى ن.ٴا.نازاربايەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسى اياسىندا جۇزەگە اسىپ جاتقانى ٴمالىم. باعدارلامانىڭ ماڭىزدى باعىتتارىنىڭ ٴبىرى – «جاھاندانۋ الەمىندەگى زاماناۋي قازاقستاندىق مادەنيەت». ونىڭ ماقساتى – زاماناۋي قازاق ادەبيەتىنىڭ، مۋزىكاسى مەن بەينەلەۋ ونەرىنىڭ جاۋھارلارىن، كينو مەن تەاتر، حورەوگرافيا سالاسىنىڭ تاۋەلسىزدىك جىلدارىنداعى تابىستارىن دۇنيە جۇزىنە تانىستىرۋ.

مەموراندۋمعا قول قويۋ ٴراسىمى قازاقستاننىڭ رەسەيدەگى ەلشىلىگىندە، قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى ي.ن.تاسماعامبەتوۆ پەن «ۇلتتىق اۋدارما بيۋروسىنىڭ» ديرەكتورى ر. كەنجەحان ۇلىنىڭ قاتىسۋىمەن ٴوتتى. قازاقستان تاراپىنان مەموراندۋمعا «رۋحاني جاڭعىرۋ» باعدارلاماسىن جۇزەگە اسىرۋ جونىندەگى ۇلتتىق كوميسسيانىڭ حاتشىسى ايدا بالايەۆا قول قويدى.

«قازاقستاننىڭ بۇرىننان سەنىمدى سەرىكتىگى، ارىپتەسى ماسكەۋ مەملەكەتتىك ۋنيۆەرسيتەتى مەن رەسەي جازۋشىلار قاۋىمىنىڭ ورتالىق ايماقتاعى ٴىرى ۇيىمىنىڭ مول تاجىريبەسى مەن جوعارى بەدەلىنىڭ ارقاسىندا جوبامىزدىڭ ٴساتتى جۇزەگە اساتىنىنا، ياعني قازاق ادەبيەتىنىڭ ورىس تىلىنە اۋدارماسىنىڭ ساپاسى جوعارى بولاتىنىنا ٴارى باسىلىم ٴورىستىلدى كەڭىستىكتە كەڭ تارالاتىنىنا سەنىمدىمىن»، - دەيدى ا.بالايەۆا:

ٴوز كەزەگىندە ماسكەۋ مەملەكەتتىك ۋنيۆەرسيتەتى جانىنداعى باسپا ٴۇيىنىڭ ديرەكتورى الەكساندر ۆەراكسا ۋنيۆەرسيتەت باسپاسى جوبانىڭ ٴساتتى جۇزەگە اسۋىنا وقۋ ورنىنىڭ تالاي جىلعى تاجىريبەسىنە ارقا سۇيەپ بار كۇشتەرىن سالاتىنىن جەتكىزدى. ال، رەسەي جازۋشىلار وداعى ماسكەۋ قالالىق ۇيىمىنىڭ ٴتوراعاسى ۆلاديمير بويارينوۆ اۋدارمانى انتولوگياعا دايىنداۋ بارىسى قازاقستان مەن رەسەي قالامگەرلەرى اراسىنا التىن ارقاۋ بولىپ، ٴوزارا مادەني ىقپالداستىققا وڭ اسەرىن تيگەزەتىنىنە ٴۇمىتى زور ەكەنىن ايتتى.

مەموراندۋمدا كورسەتىلگەن ىنتىماقتاستىق اياسىندا رەسەي جازۋشىلار وداعىنىڭ ماسكەۋ قالالىق ۇيىمى ادەبي جيناقتارعا سۇرىپتالعان شىعارمالاردىڭ كوركەم اۋدارماسىمەن جانە ونى رەداكسيالاۋمەن اينالىسادى. ال، ماسكەۋ مەملەكەتتىك ۋنيۆەرسيتەتىنىڭ باسپا ٴۇيى انتولوگيانى باسىپ شىعارۋدى، سونداي-اق ونىڭ ٴورىستىلدى وقىرماندارعا تاراتۋدى، ناسيحاتتاۋدى ۇيىمداستىرادى.

ەسكە سالا كەتسەك، جوبانىڭ ماقساتى – دۇنيە جۇزىنە ادەبيەت، مۋزىكا، بەينەلەۋ ونەرى، حورەوگرافيا، كينو جانە تەاتر سالالارىنداعى تاۋەلسىزدىك جىلدارى قول جەتكىزگەن جەتىستىكتەرىمىزدى تانىستىرىپ، مەيلىنشە كەڭ ناسيحاتتاۋ. قازىرگى قازاق ادەبيەتىنىڭ قوس انتولوگياسىن دايارلاۋ بويىنشا ۇيىمداستىرۋ جۇمىستارى الدەقاشان باستالىپ كەتتى. ولاردىڭ بىرەۋى – «قازىرگى قازاق پروزاسىنىڭ انتولوگياسى»، ەكىنشىسى – «قازىرگى قازاق پوەزياسىنىڭ انتولوگياسى» دەپ اتالادى. ٴار انتولوگيانىڭ كولەمى – شامامەن 600 بەت. ٴارقايسىسىنا 30 اۆتوردان ەنەدى. انتولوگيانىڭ مازمۇنى مەن قۇرىلىمى قازاقستان جازۋشىلار وداعىندا وتكەن ارنايى ماجىلىستە بەكىتىلگەن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي