BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اقتوبەدە «اناعا تاعزىم» ورتالىعى اشىلدى

فوتو: aktobegazeti.kz

وبلىس ورتالىعىندا «اناعا تاعزىم» رۋحاني-ادامگەرشىلىك تاربيە بەرۋ ورتالىعى اشىلدى. سالتاناتتى راسىمگە وبلىس اكىمى بەردىبەك ساپاربايەۆ، وبلىستىق ٴماسليحات حاتشىسى ٴسانيا قالدىعۇلوۆا، اقتوبە قالاسىنىڭ اكىمى ٴىلياس يسپانوۆ، سونداي-اق ەلىمىزدىڭ ٴار وڭىرىنەن كەلگەن بەلگىلى تۇلعالار قاتىستى، دەپ حابارلايدى baq.kz اقپارات اگەنتتىگى aktobegazeti.kz سايتىنا سىلتەمە جاساپ.

شارادا وبلىس اكىمى بەردىبەك ساپاربايەۆ جينالعان جۇرتشىلىقتى جاڭا ورتالىقتىڭ اشىلۋىمەن قۇتتىقتادى.

«قازاقتا «اناڭدى مەككەگە ارقالاپ اپارساڭ دا، ونىڭ الدىنداعى بورىشىڭدى وتەي المايسىڭ» دەگەن ٴسوز بار. سوندىقتان ٴبىز، ٴبارىمىز، انا الدىندا باسىمىزدى يەمىز، ولاردى ماڭگى قۇرمەتتەيمىز. بۇگىنگى اشىلىپ وتىرعان عيمارات — اقتوبەلىكتەردىڭ انالار الدىنداعى بورىشتارىن وتەۋگە دەگەن شىنايى تىلەگى مەن نيەتىنىڭ كورىنىسى. ٴبىزدىڭ ماقساتىمىز — تاريحتا ونەگەلى ٴومىر سۇرگەن، بۇگىنگى كۇنى ەلىمىزدىڭ دامۋىنا سۇبەلى ۇلەس قوسقان انالارعا قۇرمەت كورسەتۋ، ولارعا تاعزىم ەتۋ، انانىڭ ادام ومىرىندەگى ورنى ەرەكشە ەكەنىن، انانىڭ سۇتىمەن ٴبىزدىڭ بويىمىزعا قانداي قاسيەتتەر داريتىنىن ناسيحاتتاۋ، وبلىستاعى قىز-كەلىنشەكتەرىمىزدى سول باتىر، دانا انالارىمىزدىڭ ونەگەلى ومىرىنەن ۇلگى الۋعا شاقىرۋ.

بارلىق اقتوبەلىكتەردىڭ اتىنان بيبىگۇل احمەتقىزى باستاپ كەلگەن انالارىمىزعا، اپالارىمىزعا كوپ راقمەت ايتامىن. سونداي-اق وبلىس باسشىلىعى اتىنان وسى عيماراتتىڭ سالىنۋىنا دەمەۋشىلىك كورسەتكەن بارلىق كاسىپكەرلەرگە ريزاشىلىعىمدى بىلدىرەمىن. اقتوبەدە بوي كوتەرىپ جاتقان ورتالىقتار، ٴزاۋلىم عيماراتتار وسى دەمەۋشىلەردىڭ، كاسىپورىنداردىڭ، كاسىپكەرلەردىڭ قارجىسىنا سالىنىپ جاتىر»، - دەدى وبلىس اكىمى.

شارادا مەملەكەت جانە قوعام قايراتكەرى، جازۋشى ٴابىش كەكىلبايەۆتىڭ زايىبى كلارا جۇمابايەۆا جۇرەكجاردى تىلەگىن جەتكىزدى.

«بۇگىنگى قۋانىشتارىڭىز قۇتتى بولسىن! بولاشاق ٴوسىپ كەلە جاتقان ۇرپاق وسى جومارت ازاماتتاردىڭ جاساعان جاقسىلىعىن تۇسىنەتىن بولسىن! جاس ۇرپاق، سىزدەردىڭ الدارىڭىزدا كوپ مىندەت تۇر. وسى اعا-اپالارىڭنىڭ جاساعان ەڭبەگىن ارى قاراي جالعاستىرىپ، ەلىمىزدى كوركەيتە بەرىڭىزدەر!» - دەدى ول.

سالتاناتتى شارادا ٴانشى، قازاق كسر جانە كسرو حالىق ٴارتيسى بيبىگۇل تولەگەنوۆا، سوسياليستىك ەڭبەك ەرى، قازاق كسر-ىنىڭ ەڭبەك سىڭىرگەن اگرونومى ۆەرا سيدوروۆا، اقىن، قازاقستان مەملەكەتتىك سىيلىعىنىڭ لاۋرەاتى مارفۋعا ايتقوجينا، باۋىرجان مومىش ۇلىنىڭ كەلىنى زەينەپ احمەتوۆا جاڭا ورتالىقتىڭ لەنتاسىن قيىپ، وبلىس اكىمى باستاعان قۇرمەتتى قوناقتار ورتالىقتى ارالاپ شىقتى.

بۇدان كەيىن ورتالىقتىڭ ۇلكەن زالىندا وبلىس اكىمى بەردىبەك ساپاربايەۆ، اكادەميك، بيولوگيا عىلىمىنىڭ دوكتورى اجار جۇبانوۆا جانە مەديسينا عىلىمىنىڭ دوكتورى، پروفەسسور، قازاقستان عىلىم اكادەمياسىنىڭ اكادەميگى رايسا كوزدەنبايەۆا ٴبىر توپ كوپبالالى اناعا «التىن القا» توسبەلگىسىن تابىستادى.

«بۇگىن وبلىس اكىمى بەردىبەك ماشبەك ۇلىنىڭ باستاماسىمەن وبلىس ورتالىعىندا «اناعا تاعزىم» ورتالىعى اشىلىپ وتىر. ورتالىقتا ونەگەلى ٴومىر سۇرگەن، ەرلىگىمەن ەستە قالعان تانىمال ايەلدەر، بەلگىلى تۇلعالاردىڭ انالارى تۋرالى كەڭ ماعلۇمات بەرەتىن مۇراجاي، پسيحولوگيالىق، كەڭەس بەرۋ كابينەتتەرى، قولدانبالى ونەر، مۋزىكالىق تاربيە بەرۋگە ارنالعان ارنايى بولمەلەر جاساقتالعان. جالپى «اناعا تاعزىم» جوباسى اياسىندا وبلىس بويىنشا 200-دەن استام ادام، 300-گە جۋىق كاسىپورىن، مۇعالجار، شالقار اۋداندارىنىڭ وندىرىستىك ۇجىمدارى ٴوز ەسەپشوتتارىنان وسى ورتالىقتىڭ سالىنۋىنا قارجى اۋدارىپ، ٴوز ۇلەستەرىن قوستى. سونىڭ ناتيجەسىندە بۇگىن، مىنە، اقتوبەدە وسىنداي ادەمى، ٴزاۋلىم عيمارات اشىلىپ وتىر. ٴبىز وتە قۋانىشتىمىز. بۇل ورتالىق تەك انالار عانا ەمەس، بارلىق ايەلدەر، قىز-كەلىنشەكتەر باس قوساتىن ورتالىق بولماق. بۇل ورتالىقتىڭ سالىنۋىنا 350 ميلليون تەڭگە قارجى جۇمسالسا، ونىڭ قۇرىلىسىن جۇرگىزۋگە 10 مىڭ ادام ۇلەس قوستى»، - دەيدى اقتوبە قالاسى اكىمىنىڭ ورىنباسارى كۇلپارشىن ايدارحانوۆا.

ايتا كەتۋ كەرەك، اتالعان عيماراتتىڭ قۇرىلىسىن مەردىگەر ۇيىم «ەسات» جشس جۇرگىزسە، جوبالاۋشى ۇيىم – «رەگيونسترويپروەكت» جشس.

ٴۇش قاباتتى عيماراتتا «انا داڭقى» مۋزەي-گالەرەياسى، مۋلتيمەديالىق ەكسپوزيسيا زالى، حورەوگرافيا زالى، سونداي-اق ٴبىرىڭعاي تاقىرىپتىق كابينەتتەر ورنالاسقان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي