BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ٴۇيدىڭ تۇڭعىشىن تاربيەلەۋدە ٴسىز جىبەرىپ جۇرگەن قاتەلىكتەر

بالالار بىر-بىرىمەن قاتتى باسەكەلەسەدى، ۇرىسىپ، توبەلەسىپ، ويىنشىعىن ٴبولىسىپ، تاجىكەلەسىپ، قاقىسىن قورعاپ جانە ت.ب. بۇل وزدىگىنەن ەش قورقىنىشتى ەمەس. اتا-انانى شارشاتاتىن قۇبىلىس. ۇنەمى ۇرىسا بەرەتىن بولسا، ادەت بولعانى. جالپى ەش زيانى دا جوق. بالا باسەكە مەن ارالاسۋدى بىرەۋدەن ۇيرەنۋى كەرەك قوي.

سوندىقتان اعا، اپكەلەرى بار بالالاردىڭ جولى بولعانى. ولاردىڭ كوز الدىندا «ٴتىرى ترەناجەرى» بار. ولار ۇرىسىپ-تاتۋلاسىپ، ٴبىر نارسەسىمەن ٴبولىسىپ، كەلىسىمگە كەلىپ ۇيرەنەدى. بۇل ستراتەگيانىڭ ٴبارىن بالا جاستايىنان قابىلداپ، داعدىلانىپ، كەلىسپەگەن كەزدە كەلىسپەدىم دەپ، نە كەلىستىم دەي الاتىن بولادى، قالاسا ۇرىسىپ، قالاماسا باسقا ٴبىر امالىن قاراستىرۋدى ۇيرەنەدى. ياعني، جاعدايدى دامىتۋدىڭ جاقسى باستاماسى بار: ەگەر بالا ۇرىسىپ، توبەلەسپەسە ەشقاشان باسەكەلەسۋدى ۇيرەنبەيدى. سوندىقتان ولاردىڭ باسەكەلەسۋى قالىپتى جاعداي.

ەگەر ۇلكەنى كىشىسىن ۇيدە ۇرىپ، سوعىپ، كۇن كورسەتپەسە، ٴسىز ويلاعانداي ادەپتى سويلەسپەسە، ٴبىراق اۋلاعا شىعا قالسا كىشىسىنە قامقور بولىپ، ول قۇلاپ قالعاندا ۇلكەنى جەتىپ كەلسە، باسقا بىرەۋ تيىسكەندە ۇلكەنى قورعاپ السا، وندا ٴبارى دۇرىس. وندا بالالارعا الاڭداماڭىز. ولاردىڭ قارىم-قاتىناسى قالىپتى دەڭگەيدە. ولارمەن دۇرىس سويلەسۋ، سىيلاسۋ تۋرالى كوبىرەك پىكىرلەسۋ كەرەك. كيكىلجىڭ تۋعاندا ماسەلەنى قالاي شەشۋ كەرەكتىگىن ۇيرەتىڭىز. ۇرىستى ازايتىپ، كەلىسىمگە كەلۋدىڭ امالدارىن كورسەتىڭىز. جاقسىدان ودان ارتىققا دەگەن ۇمىتىلىس پايدا بولادى.

ٴبىراق كەيدە ٴقارادۇرسىن قاتەلىكتەر كەتىپ جاتادى. بار جاقسىلىقتى جوق قىلاتىن جاعدايلار تۋىنداپ كەتۋى دە ىقتيمال. ونداي قاتەلىكتى ٴوز وتباسىندا سونداي قاتەلىكپەن وسكەن ادامدار جىبەرەدى. مۇنداي جان جاراسى بار ادامدار وتە كوپ. كوبىنە ۇلكەن اپكە، اعالار. ٴبىر ٴۇيدىڭ تۇڭعىشى بولعاندار.

اتا-انا ۇنەمى كوپ جۇمىس ىستەيدى. كىشىسىن كوبىنە ۇلكەندەرى باعادى. كىشىلەرىن باققان ۇلكەندەرى وزدەرى اتا-انا بولعاندا وسىنداي جان جاراسى بارىن سەزەدى. كىشى بالا تۋعان كەزدە ۇلكەنىنىڭ بالالىق شاعى ٴبىتىپ قالعان. ۇلكەنى كىشىسىنە 6-7 جاستان باستاپ جاۋاپتى بولا باستايدى. كىشىسىن ويناتۋ، ويىنشىعىن وعان بەرۋ، ۇنەمى كىشىسىنىڭ ەركەلىگىن كوتەرۋ، سونىڭ قالاۋىن ورىنداۋ، وزىنىكىن شەتكە ىسىرۋعا ٴماجبۇر بولادى.

كوبىنە اتا-انا ۇلكەنىن ەرتە ٴوستى دەپ ونى ەركەلەتۋدى، قامقور بولۋدى، مەيىرىمىن بەرۋدى ۇمىتىپ، ۇستى-ۇستىنە تالاپتارىن كوبەيتەدى. كىشىسى جىلاسا ۇلكەنى ايىپتى، كىشىسى قۇلاسا ۇلكەنى ايىپتى، كىشىسى ويىنشىعىن جيناماسا دا ۇلكەنى جاۋاپتى. وسىدان بارىپ قارىم-قاتىناس قالىپتى جاعدايدان اۋىتقيدى. كەيدە ٴبىر اداممەن قارىم-قاتىناس تەك قايعى-مۇڭ تۋدىرسا، ونداي اداممەن بايلانىستى ۇزگىڭ كەلەتىنى بار.

كەيبىر اتا-انالار ۇلكەنىنە كىشىسىن تاپسىرىپ، مەنشىكتەپ قوياتىنى سونشا، ۇلكەندەرى كوبىنە سول جاۋاپكەرشىلىكتى ٴومىر بويى ارقالاپ وتەتىنى بار. ٴتىپتى ەسەيىپ كەتكەن سوڭ دا. كىشىسى ەسەيە الماي، جاۋاپكەرشىلىك الۋدى ۇيرەنە الماي قالادى. ويتكەنى، ول دا اتا-انانىڭ قامقورلىعىنىڭ ورنىنا سۋرروگات العان. قانشا جەردەن اقىلدى، مەيىرىمدى بولسا دا 6 جاسار بالا اتا-انانىڭ ورنىن باسا المايدى. مىڭ جەردەن اتا-انانىڭ تالاپ ەتكەن ۇدەسىنەن شىعىپ تۇرسا دا بالانىڭ اتى بالا.

سول سەبەپتى كىشى بالا دا وزىنە لايىقتى قامقورلىق پەن مەيىرىمگە قانباي قالادى. قۇمىراسى تولمايدى. ول تەك سۋرروگاتقا قاناعات ەتتى. قۇمىراسى تولىسپادى، سەپاراسيا جۇرمەدى (ٴبىر زاتتى ەكىنشىسىنەن ايىرۋ)، مۇنداي بالا كوبىنە ٴينفانتيلدى كۇيىندە قالادى، بىردەڭەگە تاۋەلدى بوپ، ومىرلىك قيىندىقتارىن شەشە الماي، تۇراقتى قارىم-قاتىناس قۇرا الماي. ال، ۇلكەنى كەرىسىنشە كوپ نارسەگە قول جەتكىزەدى. وزىنە سەنىمدى بولىپ وسەدى. جاۋاپكەرشىلىگى مىقتى بولادى. ٴبىراق ادامعا سەنۋى تىم قيىن. ونىڭ بىرەۋدەن كومەك سۇراۋى قيىن. وزگەنىڭ قولداۋىن قابىلداۋى ەكىتالاي.

بۇنىڭ ٴبارى ومىرلىك ماڭىزى بار قۇبىلىستار. ول وتباسىلىق قارىم-قاتىناسقا دا، دوستىققا دا اسەر ەتەدى. سودان ادام ورتا جاسقا جەتكەندە ٴومىر ٴسۇرۋ ىنتاسى تاۋسىلىپ قالعانداي كۇي كەشەدى. ۇنەمى وزگەلەردىڭ جۇگىن ارقالاپ وتۋدەن شارشايدى. وزگەدەن كومەك سۇراي الماۋدان قينالادى.

«كىشىسىنە قارا، سوعان بەر» دەگەننىڭ استارىندا «بىزگە قيىندىق تۋدىرما» دەگەن ٴسوز تۇر. كىشى بالاعا سەن قارا دەگەن ەمەۋرىن. «سەن ونىڭ ايتقانىنا كونەسىڭ، ونى ويناتاسىڭ، ول ٴۇشىن ٴبارىن ىستەيسىڭ. ول جىلاماسىن. ٴبىز وعان ۋاقىت بولمەيىك» دەگەن ٴسوز. اتا-انالىق رەسۋرستىڭ جەتىسپەۋى، اتا-انانىڭ ۋاقىت تاپشىلىعى، شارشاۋى، كىشى بالاعا ۋاقىت بولە الماۋىنان ولار بار جاۋاپكەرشىلىكتى ۇلكەنىنە ارتىپ قويادى. بۇل دۇرىس ەمەس.

islam.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي