BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

بالاڭىزدى كورشىڭىز قالاي تاربيەلەپ ٴجۇر؟

بالا تاربيەسىنىڭ العاشقى كەزەڭىندە ەسكەرىلۋگە ٴتيىس ماسەلەلەردىڭ ٴبىرى – بالا ٴۇشىن جاقسى ورتا مەن جاقسى كورشى تاڭداۋ. بايقاپ قاراساڭىز، ەشبىر اتا-انا بالاسىن جامان بولسىن دەمەيدى. ولاردىڭ ادەپتى، كوركەم مىنەزدى، ٴتىلالعىش، ٴبىلىمدى بولىپ وسكەنىن قالايدى. ٴبىراق كوبىنەسە بالالارى وزدەرى ويلاعانداي بولىپ شىقپاي جاتادى. ٴبىر كۇنى بالاسىنىڭ ادەپسىز ٴسوزىن ەستىپ قالادى. ەكىنشى كۇنى وتىرىك ايتقانىنا كۋا بولادى. تاعى ٴبىر كۇنى اتا-اناسىنا ٴسوز قايتارادى.

ٴوز پەرزەنتىنىڭ وسىنداي جامان ادەتتەرى كۇن سايىن كوبەيگەنىن ەشبىر اتا-انا كۇتپەسە كەرەك. سوندا وسىنىڭ ٴبارى قايدان شىعىپ وتىر؟ سوندا بالامىزدىڭ تاربيەسىمەن اينالىسىپ وتىرعان بىزدەن بولەك تاعى كىم بار؟ مىنە، بۇل ويلانۋعا تۇراتىن سۇراق. ٴيا، پەرزەنتتەرىمىزدى جالعىز ٴوزىمىز عانا تاربيەلەمەيمىز. بالا تابيەسىنە بىزبەن قاتار ارالاساتىندار كوپ. تەلەديداردىڭ، مەكتەپتىڭ، دوس-جاراننىڭ تاربيەگە قاتىسى جوق دەسەك قاتەلەسەمىز. سونداي تاربيە كوزدەرىنىڭ ٴبىرى – كوشە مەن اۋلا.

ادام بالاسىنىڭ جەتىلىپ، قالىپتاسۋىنا قورشاعان ورتانىڭ اسەرى ەلەۋلى. سوندىقتان جەتەلى ۇرپاق جەتىلدىرۋ ىسىندە بالانىڭ وسەتىن جەرى مەن كورشىلەرىنە كوڭىل ٴبولىنۋى ٴتيىس. « ۇلىڭ وسسە، ۇلى جاقسىمەن اۋىلداس بول، قىزىڭ وسسە، قىزى جاقسىمەن اۋىلداس بول» دەگەن اتالى ٴسوزدىڭ دە ٴبىر ٴمانى وسىندا بولسا كەرەك. بۇل جاعىنان العاندا، بالا ٴۇشىن جاقسى انا تاڭداۋدىڭ ماڭىزى قانداي بولسا، دۇرىس كورشى مەن مۇسىلماندىق ومىرگە يگى اسەرى بولاتىن جاقسى مەكەن تاڭداۋدىڭ ٴمانى دە ودان كەم ەمەس. ارداقتى پايعامبارىمىز (س.ا.ۋ.) حاديستەرىنىڭ بىرىندە: «ٴتورت نارسە – باقىتتان. ولار: ىزگى ايەل، كەڭ باسپانا، ىزگى كورشى، جۇيرىك كولىك»، – دەگەن. ەندەشە، كورشىسى جامان كىسى تولىق باقىتتىمەن دەپ ايتا المايدى. كورشىسى جاماننىڭ بالالارى دا دۇرىس جەتىلمەيدى. ويتكەنى ٴبىز قالاساق تا، قالاماساق تا، بالالاردىڭ كوبىنەسە تالىم-تاربيە الاتىن جەرى – كوشە مەن اۋلا.

ارينە، كوشەگە شىققان بالانىڭ ٴبارى تۇگەل بۇزىلىپ كەتەدى دەي المايمىز. الايدا جاس شىبىقتاي ٴوسىپ، ٴالى قالىپتاسا قويماعان بالا اينالاسىنداعى جاقسىلىقتى دا، جاماندىقتى دا تالعاماي ۇيرەنە بەرەدى.

بايقاپ قاراساق، بالالار بىلاپىت سوزدەر مەن جامان قىلىقتاردى، وتىرىك، وسەكتى كوبىنەسە كوشەدەن ۇيرەنەدى. توبەلەس، ۇرلىق-قارلىق، زورلىق-زومبىلىقتىڭ، بوس قىلجاق پەن جەڭىلتەكتىكتىڭ، باسقا كوپتەگەن قىلمىس-كۇنالاردىڭ ەڭ باستاپقى «ۇيىرمەسى»، «مەكتەبى» وسى كوشە تاربيەسى دەسەك ارتىق ايتقاندىق ەمەس. كىم دە كىم بالا-شاعاسىنا دۇرىس قاراماي، بەتىمەن جىبەرسە، كوپ كەشىكپەي ولاردىڭ وسى اتالعان جامانشىلىقتارعا ٴۇيىر بولا باستاعانىن بايقايدى. وسى تۇرعىدان قاراعاندا، كورشىلەر مەن تۇراتىن اۋداننىڭ مۇسىلماندىققا، ىنتىماق-بىرلىككە جاقىن بولعانى وتە ماڭىزدى. ماسەلەن، ٴۇيىمىزدىڭ ماڭىندا مەشىت بولعانى قانداي، تۇنگى كلۋبتار مەن كافەلەردىڭ بولعانى قانداي؟ ول جاعىن سارالاۋ قيىن ەمەس. مەشىتكە ٴۇيىر بالالار ٴبىر جەردە جينالسا، دورەكى بىلاپىت سوزدەر ايتپايدى، ادەپسىزدىك جاسامايدى، ٴبىرىن-بىرى تەمەكى شەگۋگە، سىرا ىشۋگە شاقىرمايدى. ولار ٴبىرىن-بىرى ناماز وقۋعا، قۇران جاتتاۋعا، ادامدارعا جاقسىلىق جاساۋعا، كوركەم مىنەزدى بولۋعا ۇندەيدى.

ەندىگى ماسەلە ٴبىز ٴومىر سۇرەتىن اۋداندا اۋزى دۋالى، باتاگوي اقساقالداردىڭ كوپ بولسا، بالا تاربيەسىنە ونىڭ دا اسەرى بار. ويتكەنى جاقسىلىققا شاقىرىپ، جاماندىقتان تىياتىندار، كوبىنەسە كوپتى كورگەن كونەكوز قاريالار. اللا تاعالا ەلىمىزدە وسىنداي اقساقالدارىمىزدىڭ كوپ بولۋىن ٴناسىپ ەتسىن. ۇل-قىزدارىمىزدى تاربيەلى، يماندى، يبالى ەتسىن.

اسىلبەك اۋەزحان ۇلى

islam.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي