BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جۇلدىز يبرايەۆا: تاعدىر ماعان اكە ماحابباتىن ساحنادا سەزىنۋدى بۇيىرتىپتى

مامىر ايىنىڭ 18-19 جۇلدىزىندا ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ٴوز رەپەرتۋارىن تاعى ٴبىر جاڭا قويىلىممەن تولىقتىرماق. قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ مۇحتار اۋەزوۆ الەمىنە ٴبىرىنشى رەت قادام جاساپ جاتقان جوق، بۇل ونىڭ ۇلى جازۋشى تۋىندىسىنا ٴتورتىنشى رەت ساحنالىق عۇمىر سىيلاۋى. وسى ورايدا «قورعانسىزدىڭ كۇنى» دراماسىندا باستى ٴرولدى كەسكىندەۋشى اكتريسا جۇلدىز يبرايەۆامەن سۇحبات قۇرعان ەدىك.

- سالەمەتسىز بە، جۇلدىز؟ قاتەلەسپەسەم بۇل ٴسىزدىڭ «قاللەكي» تەاترىنداعى العاشقى قوماقتى ٴرولىڭىز! «قورعانسىزدىڭ كۇنى» سپەكتاكلىندەگى باستى ٴرول – عازيزا بەينەسىن سىزگە سەنىپ تاپسىردى. دايىندىعىڭىز قالاي؟

- سالەمەتسىز بە! دايىندىق جاقسى. عازيزانى كەيىپتەيسىڭ دەگەندە، ەكىۇداي كۇي كەشتىم. مەنىڭ قيالىمداعى عازيزا باسقاشا ەدى. ول «قورعانسىزدىڭ كۇنى» اڭگىمەسىن وقۋ ارقىلى كوز الدىما ەلەستەتىپ، قيالىمدا بەينەلەگەن عازيزا ەدى. ال ساحناداعى عازيزا بولەك بەينە. ٴبىراق ٴقازىر جاساپ جاتقان عازيزام دا ۇنايدى. نەگە؟ ويتكەنى عازيزا 13-14 جاستاعى قىز عوي. قيالشىل، ارمانشىل، جانى پاك، ويىندا ەشتەڭە جوق. ونداي ادامدار ٴقازىر از. بۇل ٴرول مەنىڭ جانىما جاقىن. سەبەبى، ەكى جىل بۇرىن اكەمنەن ايىرىلدىم. مەن ومىردە اكە ماحابباتىن، تاربيەسىن تولىق سەزىندىم دەپ ايتا المايمىن. تاعدىردىڭ جازۋىمەن، اتا-انامنىڭ قالاۋىمەن 10-11 جاسىمدا ەكەۋى ەكى بولەك ٴومىر سۇرەمىز دەپ شەشتى. مەنى كوبىنەسە انام تاربيەلەدى. ٴقازىر مەن نەگە كوزى تىرىسىندە ول كىسىگە ٴوزىم بارىپ، سويلەسىپ، نەگە مەنىڭ جانىمدا تۇرمايسىڭ دەپ سۇرامادىم دەگەن ويلار مازالايدى. امال نەشىك؟! ول كىسى ومىردەن وتكەننەن كەيىن بۇل سۇراقتاردىڭ پايداسى جوق. عازيزانىڭ اكەسىمەن ويناپ جۇرەتىن ساحنالارى قيىنعا سوعۋدا. ٴيا، مەنىڭ اكەم كىشكەنتاي كەزىمدە قاتتى جاقسى كورگەن دە شىعار. ٴبىراق، ٴومىردىڭ ٴوزى قىزىق قوي. تاعدىرىم ماعان سول ماحابباتتى ساحنادان سەزىنۋگە مۇمكىندىك بەرىپ تۇر. مەن بۇل سپەكتاكلدەگى بەينەمدى اكەمنىڭ رۋحىنا ارنايمىن... اكەمە دەگەن ساعىنىشىمدى وسى سپەكتاكل ارقىلى باسقىم كەلەدى. ول كىسى ٴتىرى بولسا، كەلىپ كورسە دەپ قيالدايمىن. ٴوزىم جاساپ جاتقان العاشقى ۇلكەن ٴرولىم بولعاندىقتان ماعان ەرەكشە ىستىق.

- قاي ٴوڭىردىڭ تۋماسى بولاسىز؟

- مەن استانادا دۇنيەگە كەلگەنمىن. ٴبىرىنشى ماماندىعىم – قارجىگەر. كىشكەنتايىمنان ونەرگە اۋەس بولدىم. 2011 جىلى بايان ەسەنتايەۆانىڭ «قازاق ارۋى» دەگەن كونكۋرسىنا قاتىستىم. بۇعان دەيىن كوللەدجدە وقىپ جۇرگەندە پرەزيدەنتتىڭ مادەنيەت ورتالىعىندا س. اسىلحاننىڭ باستاماسىمەن اشىلعان ۇلتتىق داستۇرلەر تەاترىندا ٴبيشى بولىپ قىزمەت اتقاردىم. جانقالدىبەك تولەنبايەۆ، نۇرسۇلتان ەسەن سىندى اكتەرلەرىمىز سول جاقتا جۇمىس ىستەدى. مەن سول كىسىلەرگە قىزىعا قارايتىنمىن. اكتەرلىك ونەرگە ماحابباتىم سول جىلداردان باستاۋ الدى. كەيىن قازاق ۇلتتىق ونەر ۋنيۆەرسيتەتىندە ٴتورت جىل حالىق ٴارتيسى، پروفەسسور گۇلجاھان اسپەتوۆانىڭ شەبەرحاناسىنان ٴبىلىم الۋ باقىتى بۇيىردى..

- حالىق ٴارتيسى گۇلجان اسپەتوۆانىڭ شەبەرحاناسىندا شىڭدالۋ وڭاي بولماعان شىعار.

- نەگىزى، مويىنداۋ كەرەك، وتە قيىن بولدى. گرۋپپالاستارىمنىڭ ىشىندە ونەر كوللەدجىن ٴبىتىرىپ كەلگەندەر بار ەدى. «ەتيۋد» دەگەن نە ەكەنىن بىلمەدىم. ۇستازىمىزدىڭ ساباق بەرۋ مەتوديكاسى وتە بولەك. اپايىمىز ستۋدەنتكە بارىن بەرەدى. ەگەر ناعىز ارتيست بولساڭ بەرىلگەن ٴرولدى شەگەلەپ تۇرىپ، سەنەن كەيىن ەشكىم ونى قايتالاي المايتىنداي قىلىپ ويناۋ كەرەك دەيتىن. از ۋاقىت بولسا دا، كوپ دۇنيەنى جانىن سالىپ ۇيرەتەدى. جانە دە اكتەرلىك ساباقتان باسقا، ٴومىر حاقىندا ٴتالىم بەرىپ، رۋحاني بايىتتى. ادام رەتىندە تاربيەلەدى. كەيدە اناما ايتا المايتىن جاعدايلار بولادى، ٴبىراق نەلىكتەن ەكەنىن بىلمەيمىن، ٴوز اپايىممەن سىرلاسا الامىن. ەكىنشى انام، قۇربىم سياقتى. بىزگە وتباسىڭ مەن جۇمىسىڭدى قاتار ۇستا دەيتىن. جالپى، گۇلجان جارىلقاسىنقىزىنان ٴتالىم العانىما باقىتتىمىن. ول كەز كەلگەن ادامنىڭ باسىنا بۇيىرماس باق دەپ بىلەمىن.

- بۇگىندە ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتريساسىسىز. تەاترعا قالاي قابىلداندىڭىز؟

- قازاق ۇلتتىق ونەر ۋنيۆەرسيتەتىن ٴتامامداپ، ديپلومدىق قويىلىمىمىزدى ۇسىنعاننان كەيىن، كاستينگگە قاتىسىپ، كوركەمدىك كەڭەستىڭ كوڭىلىنەن شىعىپ تەاترعا قابىلداندىق.

- تەاترعا قابىلدانعانىڭىزعا ەكى جىلعا جاقىنداپ قالدى. تەاتر سىزگە نە بەردى؟ ستۋدەنت جۇلدىز بەن تەاتر اكتريساسى جۇلدىزدىڭ ايىرماشىلىعى قانداي؟

- تەاتر ماعان كوپ نارسە بەردى. العاش كەلگەندە، قورقىنىش بولدى. ۇلكەن اعا-اپالارىمىز جۇمىس جاسايدى. كوڭىلدەرىنەن شىعامىن با، شىقپايمىن با دەگەن ۋايىم بولدى. ٴبىراق تەاترعا كەلە سالىسىمەن بىرنەشە سپەكتاكلدىڭ ەكىنشى قۇرامىنا بەكىتىلدىم. ولار: ە. جۋاسبەكتىڭ «ۇيلەنۋ» سپەكتاكلىندە – زەرەك، ە.حۋشۆاقتوۆتىڭ «قىزىل الما» سپەكتاكلىندە – رۋشانا. كەيىن باعىما وراي، ياكۋت رەجيسسەرى س. پوتاپوۆ «شيە» سپەكتاكلىندەگى الما رولىنە بەكىتىلدىم. ال ايىرماشىلىعى، ستۋدەنت جۇلدىز وقۋدى ابىرويمەن اياقتاپ، تەاتردا قىزمەت ەتۋ ارمانىنا قول جەتكىزۋ ٴۇشىن ىزدەنەتىن. ال تەاتر اكتريساسى جۇلدىز «قورعانسىزدىڭ كۇنى» قويىلىمىنداعى عازيزانىڭ ساحنالىق ومىرىنە الاڭداپ، ىزدەنىپ ٴجۇر.

- ۇستازىڭىزبەن بىرگە جۇمىس جاسايسىز. اقىلىن، سىني ەسكەرتپەلەرىن ايتىپ تۇراتىن شىعار؟

- ول كىسىنىڭ ٴاربىر ايتقان ٴسوزىن، ٴىسىن، ساحناداعى اكتەرلىك ىزدەنىستەرىن ۇرلاپ الۋعا تىرىسامىن. ٴبىراق ول كىسىدەي بولۋ ٴۇشىن كوپ ەڭبەكتەنۋ قاجەت.

- اكتريسا باقىتى دەگەندى قالاي تۇسىنەسىز؟ قانداي رولدەردى ارماندايسىز؟

- اكتريسا باقىتى... ماعان كوپ رولدەر ۇنايدى. ساپاسىز كوپ ٴرولىم بولعانشا، ساناۋلى عانا ساپالى ٴرولىم بولسا دەيمىن. تولىققاندى اشىلماعان كوپ ٴرولىڭ بولسا، ٴوز ٴوزىڭدى جوعالتىپ الاتىن سياقتىسىڭ. ٴبىر رولگە مۇقيات، بەرىلىپ ويناسام دەيمىن. مەن دجۋلەتتانى ارماندادىم. نەگىزى، عازيزانىڭ كەيبىر بەلگىلەرى دجۋلەتتاعا كەلەدى. سوسىن قاراگوزدى قاتتى جاقسى كورەمىن.

- جۇلدىز يبرايەۆنىڭ عازيزاسىن كورەرمەن قالاي قابىلدايدى دەپ ويلايسىز؟

- بۇل ويلاردى بولاشاقتىڭ ەنشىسىنە قالدىرساق. ٴبىراق، بويىمدا قورقىنىش پەن ۇرەي بارىن جاسىرمايمىن.

- سىننىڭ ىلمەگىنە ىلىنەمىن-اۋ دەپ قورىقپايسىز با؟

- قورقامىن. سىنعا ٴىلىنۋىم مۇمكىن ەكەنىن دە بىلەمىن. ويتكەنى، مەنىڭ تاجىريبەم كوپ ەمەس. ٴبىراق اشىربەك سىعايدىڭ ٴبىر ٴسوزى بار: «سىن تەزىنەن وتپەگەن، سىننىڭ ەلەگىنەن وتپەگەن ادام ەشقاشان شىعارماشىلىق يەسى بولا المايدى» -دەگەن. قانداي سىن ايتىلسا دا ٴبارىن قابىلداۋعا قاشاندا دايارمىن.

سۇحباتتاسقانىڭىزعا راحمەت. سىزگە اكتريسا باقىتىن تىلەيمىن.

سۇحباتتاسقان،

قىمبات ەلۋبايەۆا

ٴقازۇوۋ، «تەاترتانۋ» ٴبولىمىنىڭ ٴىىى كۋرس ستۋدەنتى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي