BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اجەمنىڭ ٴبىزىن ٴالى دە پايدالانامىن

قىزدار بۇگىندە جىگىتتەرگە كەستەلى ورامال سىيلامايدى. ون جاسىندا ويماق الىپ، ون بەسىندە كەستە تىگىپ مايىسىپ وتىراتىندار از. ايتسە دە بار ونەرىن ٴتىل مەن بارماقتىڭ باسىنا جيناعان حالقىمىزدىڭ كونەدەن كەلە جاتقان قولونەرىن ٴومىرىنىڭ وزەگىنە اينالدىرعان جاستار دا بار. سولاردىڭ ٴبىرى – گۇلنازىم ٴومىرزاققىزى.
ٴبىز گۇلنازىمدى استانادا وتكەن كورمەلەردىڭ بىرىندە كەزدەستىردىك. كورمەدەگى كوزدىڭ جاۋىن الاتىن قىزىلدى-جاسىلدى ٴتۇرلى دۇنيەلەردى جاعالاي شولىپ كەلە جاتىپ، قىزدىڭ قاسىندا تۇرعان كارتينالارعا رياسىز كوز سالدىق. قانىق تۇستەر. اسەم كارتينالار. بىرى-بىرىنەن وتكەن ادەمى. ٴبارى دە «سويلەپ» تۇر. عاجابى سول، بۇل كارتينالار – ادەتتەگىدەي قىلقالامنىڭ ەمەس، ٴبىزدىڭ ۇشىنان تۋعان دۇنيەلەر. العاشىندا گۇلنازىمدى ٴجاي ساتۋشى بولار دەپ ويلاعانبىز. – بۇل كارتينالاردىڭ اۆتورى مەنمىن، – دەدى گۇلنازىم، ٴبىزدىڭ اۆتوردى سۇراعان العاشقى ساۋالىمىزعا جاۋاپ بەرىپ. ول اشىق-جارقىن قالىپتا اڭگىمەمىزگە ىلەسە كەتتى. ت.جۇرگەنوۆ اتىنداعى ونەر اكادەمياسىن كوركەم سۋرەت (جيۆوپيس) ماماندىعى بويىنشا ٴتامامداعان گۇلنازىم العاشقىلاردىڭ ٴبىرى بولىپ ماگيستراتۋرانى بىز-كەستە ونەرى بو-يىنشا ونەر ماگيسترى بولىپ بىتىرگەن. ال بۇعان دەيىن قولونەردىڭ وسى ٴتۇرىن قايتا جاڭعىرتىپ، ونى تۇڭعىش رەت عىلىمي جۇمىس رەتىندە گۇلنازىمنىڭ اپكەسى اينۇر ٴومىرزاققىزى قورعاعان. گۇلنازىمنىڭ تۋىندىلارىنىڭ بارلىعى ٴسالت-داستۇرىمىز بەن تاريحىمىزدان سىر شەرتىپ، قازاقى بولمىسىمىز بەن مىنەزىمىزدى بايقاتادى. ٴاربىر جاڭا كارتينانى دۇنيەگە اكەلەردە ۇلتتىق ەرەكشەلىگىمىزدى وزەك ەتىپ الاتىن گۇلنازىم ماگيسترلىق عىلىمي جۇمىسىنا دا ۇلتتىق سپورت ويىنىن تاڭداپتى. – «قىز قۋۋدى» ۆيتراج ارقىلى، ياعني ٴتورت بولشەك ەتىپ كەستەلەپ، كەيىن بارلىعىن قوسىپ ٴبىر ۇلكەن كارتينا جاسادىم. ماقساتىم – ۇمىتىلىپ بارا جاتقان ۇلتتىق ويىنىمىزدى قولونەر ارقىلى ناسيحاتتاۋ. ونىڭ ۇستىنە، كەستە ونەرى دە ٴقازىر كوپ قولدانىلمايدى. ماسەلەن، تۇسكيىزدى الايىقشى. ٴقازىر ونى ەشكىم تورىنە ىلمەيدى. ال مەن تۇسكيىزدى زاماناۋي ادىستەرمەن ۇشتاستىرا وتىرىپ، تەك كىلەم رەتىندە عانا ەمەس، ٴزاۋلىم عيماراتتارعا، مەيرامحانالارعا ٴىلىپ قوياتىنداي كارتينا تۇرىندە جاساپ ٴجۇرمىن، – دەيدى ول. كەيىپكەرىمىز وسىنداي عاجاپ دۇنيەلەردى اجەسىنەن قالعان ٴبىز ارقىلى ورنەكتەيدى. «مۇنداي قۇرال ٴقازىر جوق، ەش جەردە ساتىلمايدى دا»، – دەيدى بۇل تۋرالى ونىڭ ٴوزى. ون ٴۇش جاسىنان باستاپ قولىنا ينە العان گۇلنازىمعا كەستە تىگۋدى اناسى قالەمحان ۇيرەتكەن. «شەشە كورگەن تون پىشەدى» دەگەن وسى! كەستەلەپ توقىلعان كارتينالاردىڭ ۇلكەندەرى 180-200 مىڭ تەڭگەنىڭ توڭىرەگىندە بولسا، كىشىلەۋ كارتينالاردىڭ باعاسى 25-30 مىڭ تەڭگەنى قۇرايدى. «جەكە وتباسىلىق كورمەمىزدى وتكىزگەن كەزدە باعا بۇدان گورى جوعارىلاۋ بولادى. ويتكەنى زالدى جالعا الۋ قۇنى قىمبات»، – دەگەن گۇلنازىم بۇل باعانىڭ قاراپايىم حالىقتىڭ قالتاسىنا اۋىرلاۋ تيەتىنىن دە تۇسىنەدى. الايدا، مۇنىڭ بارلىعى ٴبىر نۇكتەگە باسساڭ بولعانى، زىر ەتكىزىپ شىعارىپ بەرەتىن كومپيۋتەر نە ماشينەنىڭ كومەگىمەن جاسالىپ جاتقان جوق. تازا قولونەر. ٴبىزدى بارماققا باتىرىپ بەينەتتەنەسىڭ، كوزمايىڭدى تاۋىسىپ كوپ ۋاقىت جۇمسايسىڭ. جانە كەز كەلگەن شىعارماشىلىق ٴتۇرى سەكىلدى بىز-كەستە ونەرى دە شىدامدىلىق پەن ىزدەنىستى قاجەت ەتەدى. – نەگىزىنەن كارتينالاردى كوپتەپ ساتپايمىز. دايىن دۇنيەلەرىمىز دە اسا كوپ ەمەس. جاڭا تۋىندىلار جاساۋ ٴۇشىن جاڭا نوبايلار ويلاستىرۋ قاجەت. تۋىندىلارىمنىڭ نوبايى اكەم – ٴومىرزاق رىستاننىڭ يدەياسىمەن سىزىلعان. ول كىسى ويۋ-ورنەكتى، قازاقتىڭ تۇرمىس-تىرشىلىگىن ابستراكسيامەن شەبەر ۇشتاستىرا بىلەدى. جەزدەم دە تەرىدەن ٴتۇرلى بۇيىمدار جاسايدى. ياعني، وتباسىمىزدا بارلىعىمىز قولونەرمەن اينالىسامىز، – دەيدى شەبەر. گۇلنازىم دۇنيەجۇزى قازاقتارىنىڭ قۇرىلتايى كەزىندە وتباسىلىق كورمەمەن فرانسيا، گەرمانيا، تۇركيا، شۆەسيا ەلدەرىندە بولىپ قايتىپتى. كەيىپكەرىمىز بۇل ونەردى شەتەلدە وتە جوعارى باعالايتىنىن ايتادى. ٴتىپتى، وزگە ەلدەردەن ارنايى حابارلاسىپ، تاپسىرىس بەرەتىندەر دە بارشىلىق ەكەن. «قازاقستاندا سەنىڭ كارتينالارىڭدى قالاپ الدىراتىندار بار ما؟» دەگەن سۇراقتى كولدەنەڭ تارتتىق وسى تۇستا. – ٴيا، مىسالى، پرەزيدەنت اكىمشىلىگىنەن تاپسىرىسپەن الدىرادى. كۇيشى ايگۇل ۇلكەنبايەۆانىڭ، اكتەر دوسقان جولجاقسىنوۆتىڭ ۇيلەرىندە مەنىڭ كارتينالارىم ٴىلۋلى تۇر. سول كىسىلەردىڭ ۇيلەرىنەن روزا رىمبايەۆا، ماقپال ٴجۇنىسوۆا اپالارىمىز كورىپ، قىزىعۋشىلىق تانىتىپتى. ولار دا تاپسىرىس بەرمەك نيەتتە كورىنەدى. ٴبىر بايقاعانىمىز، گۇلنازىم ٴوز جەتىستىگىن تۋىندىلارىنا تانىمال ادامداردىڭ تاپسىرىس بەرگەنىمەن ەمەس، ونەرىنىڭ وزگەلەرگە قانشالىقتى قۋانىش سىيلاي الاتىندىعىمەن ولشەيتىندەي. سوندىقتان دا بولار، ول ٴبىر كەزدەرى ٴوز كارتيناسىنىڭ الماتىلىق انالارعا قۇتتىقتاۋ حات رەتىندە جەتكەنىنە ەرەكشە قۋانادى. ول كەزدە گۇلنازىم اكادەميانىڭ 3-كۋرسىندا وقىپ جۇرگەن-دى. وقۋ ورداسىندا كورمە ۇيىمداستىرىلىپ، وعان بۇنىڭ «ٴالدي بوپەم» دەپ اتالاتىن كارتيناسى قويىلعان-دى. سول جۇمىسى الماتى قالاسىنىڭ سول كەزدەگى اكىمى يمانعالي تاسماعامبەتوۆتىڭ نازارىنا ٴىلىنىپ، نارەستەلى بولعان انالارعا جىبەرىلەتىن قۇتتىقتاۋ حاتتىڭ سىرتىن بەزەندىرۋ ٴۇشىن پايدالانىلدى. ايتا كەتەيىك، بۇعان دەيىن جاس تالانتتاردىڭ «اينالايىن» ٴبىرىنشى حالىقارالىق فەستيۆالىنىڭ لاۋرەاتى، v حالىقارالىق مەرەكەلىك «شابىت» جاستار فەستيۆالىنىڭ ٴبىرىنشى ورىن يگەرى اتانىپ ۇلگەرگەن گۇلنازىم ٴومىرزاققىزى جاقىندا عانا «دارىن» مەمەلەكەتتىك جاستار سىيلىعىمەن ماراپاتتالدى. ناعىز دارىندى جاستىڭ مەملەكەت تاراپىنان ٴوز باعاسىن العانىنا نە جەتسىن! نۇراي ابدىكەرىم http://nurastana.kz/؟p=10529

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي