BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلباسى ەسىمىن ٴوزى قويعان بالامەن 12 جىلدان سوڭ كەزدەستى

2005 جىلى سىر ٴوڭىرىنىڭ قوسجار اۋىلىندا دۇنيەگە كەلگەن بالانىڭ ەسىمىن «ەرسۇلتان» دەپ پرەزيدەنت نازاربايەۆ ٴوزى قويعان. بۇگىندە ەرسۇلتان جەتىنشى سىنىپ وقۋشىسى. جۋىردا مەملەكەت باسشىسىنىڭ سىر وڭىرىنە ساپارى بارىسىندا ەرسۇلتان باقتىبايەۆ پرەزيدەنتپەن ديدارلاستى، دەپ حابارلايدى baq.kz اگەنتتىگىنىڭ قىزىلوردا وبلىسىنداعى ٴتىلشىسى.

وسىدان 12 جىل بۇرىن، ياعني 2005 جىلدىڭ 27 ساۋىرىندە ارالعا ساپارمەن كەلگەن نۇرسۇلتان نازاربايەۆقا قوسجار اۋىلىنىڭ اقساقالى باقتىباي شورايەۆ سول كۇنى دۇنيەگە كەلگەن نەمەرەسىنە ەسىم قويۋدى وتىنگەن ەدى.

– نۇرەكە، ٴسىزدىڭ كەلۋىڭىزگە قاراي قۋانىشتى بولىپ جاتىرمىز. نەمەرەمنىڭ ەسىمىن وزىڭىزگە قويدىرسام دەگەن نيەتپەن كەلدىم، – دەگەن بولاتىن قاريا.

– ٴوزىڭىزدىڭ جاس شاماڭىز قانداي؟ – دەدى پرەزيدەنت.

– قىرقىنشى جىلعىمىن.

– ٴبىر جىلدىڭ ٴتولى ەكەنبىز. نۇرسۇلتان دەپ كوبى قويىپ جاتىر عوي، قۇرداستىڭ نەمەرەسىنىڭ ەسىمى ەرسۇلتان بولسىن!

سول ەرسۇلتان بۇگىندە ٴوز مەكتەبىندە ۇزدىكتەردىڭ ٴبىرى. ەسىمىن ماقتان تۇتادى. جۋىردا ول سىر وڭىرىنە كەلگەن پرەزيدەنتپەن كەزدەسۋ باقىتىنا يە بولدى.

«قۇرمەتتى، نۇرسۇلتان اتا! 2005 جىلى ٴبىزدىڭ اۋىلعا كەلگەندە «بالاما ٴسىزدىڭ اتىڭىزدى قويايىن» دەپ قولقا سالعان اتاما «نۇرسۇلتان بار عوي، بالاڭىز ەرسۇلتان بولسىن» دەپ مەنىڭ اتىمدى ٴوزىڭىز قويعان ەكەنسىز. مەن ٴسىز اتاعان ەسىمگە لايىقتى بولىپ، ەلىمە قورعان بولعىم كەلەدى. سىزگە مىڭ دا ٴبىر راحمەت!» دەدى ول ەلباسىمەن بولعان كەزدەسۋدە.

ەلباسى ەرسۇلتانعا پلانشەت سىيلادى.

«پرەزيدەنتتىڭ ٴوز قولىمەن بەرگەن سىيلىعىن كوزىمنىڭ قاراشىعىنداي ساقتايمىن. ەسىمىمدى ەلباسى قويعاسىن، ٴتۇزۋ جۇرۋگە، جامان بولماۋعا تىرىسامىن. نۇرسۇلتان اتانىڭ اتىنا كىر كەلتىرگىم كەلمەيدى. بولاشاقتا سول كىسى سەكىلدى حالىققا قىزمەت ەتەمىن» دەيدى جەتكىنشەك.

بىلەتىندەردىڭ ايتۋىنشا، ەرسۇلتاننىڭ اتاسى باقتىباي – شورا ٴبيدىڭ بالاسى. ول قوسجار ەلدى مەكەنىندە گيدروتەحنيك، كەيىن باس مامان بولىپ قىزمەت اتقارعان. اقساقال ٴومىرىنىڭ سوڭعى جىلدارى اۋىر ناۋقاسقا ۇشىراعانىنا قاراماستان، اۋىلدىڭ ۇيىتقىسى بولعان، بىرلىكتى ناسيحاتتعان.

«باقتىباي اتا 2014 جىلى دۇنيەدەن وتسە دە ەرسۇلتان ٴوز جاۋاپكەرشىلىگىن ۇمىتپايدى. اۋىلىنىڭ، ەلىنىڭ ارقاسۇيەر ازاماتى بولسام دەپ الدىنا ماقسات قويعان» دەيدى مەكتەپ ٴمۇعالىمى مەيىرجان كامال.

ەرسۇلتاننىڭ اناسى اينۇر ىبراشەۆا مەكتەپتە ابىرويلى ەڭبەك اتقارۋدا، اكەسى عابيت شورايەۆ بالىق ٴوسىرۋ پيتومنيگىندە جۇمىس ىستەيدى. وتباسىدا ٴتورت بالا بار.

«اتاسى ەرسۇلتاندى ەرەكشە جاقسى كوردى. «بۇل بالام تۇبىندە ٴبىر جەردەن شىعادى» دەپ وتىرۋشى ەدى. ٴقازىر اتاسى دا، اجەسى دە دۇنيەدەن وزدى. ەرسۇلتاننىڭ ارمانى كوپ. پرەزيدەنت تە، دارىگەر دە بولعىسى كەلەدى. سوسىن اكەسى ەكەۋىمىزگە «وسكەندە سىزدەردى قاجىلىققا اپارامىن» دەيدى. ونىڭ جاقسىلىق ويلايتىنى اتاسىنىڭ تىلەگى مەن ەلباسىنىڭ ۇمىتىنەن بە دەپ ويلايمىن» دەيدى اناسى اينۇر.

«اتا-اجەسى «بۇل – ەلباسىنىڭ بالاسى» دەپ ۇنەمى ايتىپ وتىراتىن. ەرسۇلتان وجەت بولىپ وسۋدە. كوپشىلىكتىڭ الدىندا ەڭسەسىن تىك ۇستاپ سويلەيدى. ەرسۇلتاننىڭ تۋعان اعاسى قىرىمبەكتىڭ بولاشاعىنا دا ۇمىتپەن قارايمىز. ونىڭ ەسىمى قىزىلوردا وبلىسى اكىمى قۇرمەتىنە قويىلعان. قىرىمبەك كوشەربايەۆ تا ٴقايبىر جىلى ٴبىزدىڭ اۋىلعا كەلگەندە وسى ەكى ىنىمە باتاسىن بەرگەن. ەڭ باستىسى، بالالار امان بولسىن» دەيدى ەرسۇلتاننىڭ تاتەسى ايكەرىم باقتىبايقىزى.

فوتو: اۆتور (2 دانا)


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي