BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«كۇلبيكە» ەرتەگىسىنىڭ قازاق تىلىندەگى ٴبىرىنشى كورسەتىلىمى ٴوتتى (فوتو)

استانا. 6 ناۋرىز. baq.kz – استانا مەن الماتى قالالارىندا «كۇلبيكە» ەرتەگىسىنىڭ قازاق تىلىندەگى ٴبىرىنشى كورسەتىلىمى ٴوتتى.

«كۇلبيكە» - 5 جىلدىڭ ىشىندە كورەرمەنگە قازاق تىلىندە جول تارتقان 10-شى گولليۆۋدتىق بلوكباستەر. قازاق ٴتىلى شارل پەررونىڭ ايگىلى ەرتەگىسىنىڭ كەيىپكەرلەرى سويلەگەن اعىلشىن، فرانسۋز، يسپان جانە تاعىدا باسقا تىلدەر قاتارىنداعى ٴ31-شى ٴتىل. ال قازاقستان "كۇلبيكە" اقش-تاعى كورسەتىلىمنەن ٴبىر اپتا بۇرىن، ياعني، 6 ناۋرىزدا جارىق كورەتىن 3 ەلدىڭ ٴبىرى بولىپ وتىر.


«كۇلبيكە» ەرتەگىسىنىڭ كورسەتىلىمىن اشقان «نۇر وتان» پارتياسى ٴتوراعاسىنىڭ ٴبىرىنشى ورىنباسارى باۋىرجان بايبەك:
- 2011 جىلى تاۋەلسىزدىگىمىزدىڭ 20 جىلدىعىنا وراي ەلباسى ٴوز قۇتتىقتاۋ حاتىن جولداپ وسى جوباعا باتاسىن بەرىپ، ونى باستادى. سول 4 جىلدىڭ اراسىندا «بولاشاق» قاۋىمداستىعى جالپى 10 گولليۆۋدتىق بلوكباستەردى قازاق تىلىنە اۋداردى. وسى از ۋاقىتتىڭ ىشىندە 10 جوبا دەگەن ۇلكەن جۇمىس دەپ ويلايمىن. ەلباسى ٴارقاشان ٴبىزدىڭ رۋحاني بايلىعىمىزعا، ٴتول مادەنيەتىمىزگە، تىلىمىزگە، جالپى ٴبىزدىڭ ۇلتتىق سپورت تۇرلەرى مەن داستۇرگە ەرەكشە كوڭىل بولەدى. «كۇلبيكە» فيلمىنە كەلەتىن بولسام. ول ديسنەيدىڭ ەڭ ٴبىر تانىمال برەندى دەپ ايتۋعا بولادى. جالپى وسى ٴفيلمنىڭ ايتاتىن نەگىزگى ويى بەرىك بولىپ، ٴوزىڭنىڭ كۇشىنە سەن دەگەن. ونى قازاق تىلىنە يكەمدەپ دۋبلياجداعان اكتەرلەرگە ۇلكەن العىسىمىزدى بىلدىرەمىز. وسى فيلمدەر ارقىلى ٴبىزدىڭ اكتەرلەرگە ، رەجيسسەرلارعا جالپى ۇلكەن مۇمكىندىك جاسايمىز. نەگىزگى ماسەلە جاڭا تەحنولوگيالاردى قولدانا وتىرىپ بولاشاقتا ٴبىزدىڭ تەلەارنالاردا قازاق تىلىنە اۋدارىلعان ونىمدەردىڭ ساپاسى وسىنداي بولسا ەكەن دەگەن نيەتپەن وسى جوبالاردى جاساپ وتىرمىز، - دەدى.


گولليۆۋدتىق فيلمدەردى قازاق تىلىنە اۋدارىپ، كورەرمەندەرگە ۇسىنۋ وتە ٴتيىمدى جوبا ەكەندىگىن ايتقان «بايتەرەك» ۇلتتىق باسقارۋشى حولدينگى باسقارما ٴتوراعاسى قۋاندىق بيشىمبايەۆ:
- بۇل ٴبىز قولداپ وتىرعان ەكىنشى فيلم. وسىنداي فيلمدەردى قولداۋ ٴبىزدىڭ حولدينگ ٴۇشىن دە داستۇرگە اينالىپ كەلە جاتىر. بۇل ٴداستۇردى الداعى ۋاقىتتا دا جالعاستىرا وتىرىپ، تاعى دا بىرنەشە گولليۆۋدتىق فيلمدەردى سىزدەردىڭ نازارلارىڭىزعا ۇسىناتىن بولامىز، - دەپ جاعىمدى جاڭالىق جەتكىزدى.

كورسەتىلىمگە مەكتەپ وقۋشىلارى، استانا جانە الماتى قالارىنداعى بالالار ۇيلەرىنىڭ تاربيەلەنۋشىلەرى، قوعام قايراتكەرلەرى، سونداي-اق باق-تىڭ، «بولاشاق» قاۋىمداستىعى مەن «نۇر وتان» پارتياسىنىڭ وكىلدەرى قاتىستى.

«كۇبيكەنى» قازاق تىلىندە سويلەتكەن ت.جۇرگەنوۆ اتىنداعى ونەر اكادەمياسىنىڭ 3-كۋرس ستۋدەنتى شەحنازا قىزىحانوۆا:
- بۇل مەنىڭ دۋبلياجداعى ەڭ العاشقى قادامىم. ٴوزىم وسى جوباعا كاستينگ ارقىلى كەلدىم. كۇلبيكەنى دۋبلياجداعاندا ونىڭ بولمىسىنا ساي داۋىسىن كەلتىرۋگە تىرىستىم. جۇمىسىم كورەرمەندەردىڭ دە ويلارىنان شىعادى دەپ ويلايمىن. دۋبلياجدا قيىنى اكتريسانىڭ ويناعانداعى سەزىمىن، ەموسياسىن سول قالپىندا ٴدال جەتكىزۋ قيىن بولدى. ٴوزىڭ باسقاشا ويناپ كەتۋىڭ مۇمكىن، ٴبىراق مۇنداعى بار ماقسات سول اكتريسانىڭ سەزىمىن جەتكىزۋدە.

العاشقى كورسەتىلىمگە كەلگەن قوناقتاردىڭ ٴبىرى، لوندون وليمپياداسىنىڭ چەمپيونى سەرىك ساپيەۆ:
- مەن قازاق ٴتىلىن جەتىك بىلمەسەم دە قازاق تىلىندە شىققان فيلمدەردىڭ بارلىعىن قارايمىن. گولليۆۋدتىق فيلمدەردىڭ قازاق تىلىنە دۋبلياجداۋعا ۇلەستەرىن قوسىپ جاتقان «نۇر وتان» پارتياسى، «بايتەرەك» حولدينگى، «بولاشاق» قاۋىمداستىعى جانە «مولومان» كومپانياسىنا العىسىمدى بىلدىرگىم كەلەدى. «ٴتىل بولماسا حالىق تا بولمايدى» دەيدى عوي. قازاق ٴتىلىنىڭ الەمدىك دەڭگەيدەگى وسىنداي تۋىندىلاردىڭ تىلىنە اينالىپ، كەڭ ەتەك جايىپ كەلە جاتقاندىعى قۋانتادى.

 

ايتا كەتەيىك،  7 ناۋرىز كۇنى "نۇر وتان" پارتياسى" بارشا قازاقستاندىقتاردى حالىقارالىق ايەلدەر كۇنىمەن قۇتتىقتاپ، قازاقستاننىڭ بارلىق وڭىرلەرىندە "كۇلبيكە" ەرتەگىسىنىڭ قايىرىمدىلىق كورسەتىلىمىن وتكىزەدى. 

 

اينۇر راكيشەۆا، عابيت ماداليەۆ


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي