BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستاندىق تەلەارنالار وتاندىق مۋلتفيلمگە ٴزارۋ

استانا. 3 جەلتوقسان. baq.kz – قازاقستان تەلەارنالارى وتاندىق مۋلتفيلمگە جارىماي وتىر. قازىرگى تاڭدا كوگىلدىر جاشىكتىڭ قۇپياسىن اشاتىن ٴمان-ماعىناسى بار، قازاقتىڭ تاريحىنان سىر شەرتەتىن تۋىندىلار جوقتىڭ قاسى. سونىڭ سالدارىنان تەلەەكرانعا تەلمىرگەن قازاق بالالارى شەتەلدىن قاڭسىعىن مىسە تۇتۋعا ٴماجبۇر، دەپ مالىمدەدى almaty.tv تىلشىسىنە رەجيسسەر-مۋلتيپليكاتور قايىرعالي قاسىموۆ.

«قازاق ٴمۋلتفيلمى ۇلكەندەردىڭ ويىنشىعى بولىپ كەتتى. ٴقازىر بالالار تاقىرىبىندا مۋلتيك ٴتۇسىرىلىپ جاتقان جوق. جۇيە بويىنشا تۇسىرسە، وندا بالالار كورەدى. تەلەەكراندى شەتەل تۋىندىلارى قاپتاعان زاماندا، ٴبىزدىڭ شىعارعان ٴونىم بالالارعا قىزىق ەمەس. ٴمان-ماعىناسىز، تاياز ويلى. مىسالى، «تەكە مەن قوي» ٴمۋلتفيلمىن الايىق، ٴبىر كورگەنگە قىزىق. ٴبىراق ٴتۇپ تامىرىنا ۇڭىلسەڭ قازاقتى قويعا تەڭەپ تاستاعان سەكىلدى. حالىق اسسامبلەياسىنا ارناپ 10 فيلم ٴتۇسىرىلىپ جاتىر. ٴار ۇلتتىڭ ەرتەگىسىنىڭ جەلىسى بويىنشا. ٴبىز بىرىنشىدەن – قازاق ويىن مۋلتفيلمگە بەرىپ، ٴتۇسىرىپ جاتقان جوقپىز. ال ەكىنشىدەن – ٴمان-ماعىناسىز ٴسال قيمىلداسا بولدى، سونى مۋلتيك دەپ كوندىگىپ العانبىز. امەن اعامىز ەكى جىل بۇرىن ايتقان ەدى «قازاق ٴمۋلتفيلمىنىڭ بولاشاعان كورىپ تۇرعان جوقپىن»، - دەپ. ٴبىراق ٴبىز سوعان كەلە جاتىرمىز»، - دەدى قاسىموۆ.

قيمىلداعاندى مۋلتيك دەپ تۇسىرە بەرەتىن انيماتور-رەجيسسەرلەر كوك جاشىكتىڭ قۇتىن قاشىردى. سونىڭ سالدارىنان تەلەديداردىڭ بەتىن شەتەلدىڭ «نارۋتو»، «سپاندج بوب» سىندى ٴمۋلتفيلمى جاۋلاپ الدى. «بالانىڭ اڭسارىن اۋىتاتىن قازاقتىڭ قيال عاجايىپ ەرتەگىلەرى ٴبىر ساتتە جوققا اينالدى»، - دەدى قالا تۇرعىنى.

«ٴقازىر بالالارىمىزعا قازاق مۋلتفيلمدەرىن قويىپ بەرسەڭ، «اۋىستىرشى كورگىم كەلمەيدى»، - دەپ شاعىم ايتادى. اڭدىعاندارى شەتەل ونىمدەرى - اتىس، شابىس، ٴبىر-بىرىن قورقىتۋ، ۇركىتۋ. سونى ٴماز بولىپ كورىپ وتىرادى. ال 2 جاستاعى كىشكەنتاي نەمەرەم «ماشا جانە مەدۆەد» ٴفيلمىن وتە كوپ كورەدى. كورمەيسىن دەسەڭ جىلاپ مازاڭدى الادى»، - دەدى قالا تۇرعىنى ايمان شىناربەك.

پسيحولوگتىڭ ايتۋىنشا، تاڭنان كەشكە دەيىن كوگىلدىر ەكراننان باس الماي وتىراتىن بالدىرعانداردىڭ سانا-سەزىمىن شەتەل ونىمدەرى ۋلاۋدا. اتىس-شابىستى بەينەلەيتىن تۋىندىلار قازاق بالاسىنىڭ بولاشاعىنا بالتا شابۋى مۇمكىن.

«قازاقستاندا جاس ايىرماشىلىعىنا بايلانىستى مۋلتفيلمدەر جوقتىن قاسى. سونىڭ سالدارىنان بالالار ورىستىن «ماشا جانە مەدۆەد» ٴفيلمىن كورۋگە ٴماجبۇر. بۇل تۋىندى بالا پسيحولوگياسىنا كەرى اسەر ەتۋدە. كىشكەنتاي بالالار وتە ەلىكتەگىش كەلەدى. بۇنى كورگەن بالدىرعاندار ماشا سەكىلدى زاتتاردىڭ بارلىعىن لاقتىرىپ، قاسىنا كەلگەندەردى ۇرىپ-سوعۋى دا مۇمكىن. سوندىقتان بالانى بەسىكتەن باستاپ تاربيەلەۋ كەرەك، بالالاردىڭ ساقتاۋ قابىلەتى وتە كۇشتى بولادى. ولارعا ٴوزىمىزدىڭ ٴمان-ماعىناسى بار ٴتول تۋىندىمىزدى كورسەتۋ قاجەت. سوندا بالانىن پسيحولوگياسى جاقسى داميدى»، - دەدى پسيحولوگ اسەل مامىروۆا.

ەستەرىڭىزگە سالا كەتسەك، ٴبىلىم جانە عىلىم مينيسترلىگى بالالار قۇقىعىن قورعاۋ كوميتتەتىنىڭ ٴتورايىمى زابيرا ورازاليەۆا «شەتەل تەلەارنالارىنان كورسەتىلگەن مۋلتفيلمدەر بالانىڭ سانا-سەزىمىنە كەرى اسەر ەتەدى. مىسالعا «سپاندج بوب» مۋلتفيلمىندە باس كەيىپكەر كورشىسىن ۇرىپ سوعادى، بۇنى كورگەن بالالار كۇلەدى، قۋانادى، كورگەندەرىن جاسايدى. سونىڭ سالدارىنان جاسوسپىرىمدەر بۇزاقىلىققا بارادى. سوندىقتان شەتەل ونىمدەرىن بالارعا كورسەتۋگە تىيىم سالۋدى سۇرايمىن»، - دەگەن بولاتىن. ٴبىراق بۇنى ەستىر قۇلاق تابىلمادى. كەرسىنشە، شەتەل ونىمدەرى بالالاردىڭ ەرمەگىنە اينالىپ بارادى.

 

نازىم قىدىربايقىزى 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي