BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

بەرىك ايتجانوۆ "دالا داۋىسىندا"

استانا. 1 قازان. baq.kz - تانىمال تەاتر جانە كينو اكتەرى بەرىك ايتجانوۆ بيىلعى جىلى ٴبىر ٴتۇسىرۋ الاڭىنان ەكىنشىسىنە بارىپ، جۇمىستان قولى تيمەي جۇرگەنىن ايتادى. قازىرگى تاڭدا ول «دالا داۋىسى» دەگەن جۇمىس اتاۋى قويىلعان كينودا باستى رولدەردىڭ ٴبىرىن سومداپ جاتىر.

   كوكتەم ايلارىندا بايان ەسەنتايەۆانىڭ باستاماسىمەن ٴتۇسىرىلىپ جاتقان «تراكتورشىنىڭ ماحابباتى» تەلەحيكاسىندا جۇمىسىن باستاعان بەرىك، ونىڭ سوڭعى ٴبولىمى قازان ايىنا بەكىتىلىپ قويىلعانىن جەتكىزەدى. جاڭا ماۋسىمنان كوپشىلىك كورەرمەنگە جول تارتقان سەريالدا ونەر يەسى اۋىلدىڭ قاراپايىم جىگىتىن سومدايدى. قىم-قيعاش وقيعاعا تولى تۋىندىدا بەرىك – تراكتورشى جىگىت قالانىڭ ەركەتوتاي قىزىن ۇناتىپ قالىپ، وقيعا تيىسىنشە عاشىقتىق عالاماتىنا ۇلاسادى. سىرلى سەزىم مەن كەرەعار كوزقاراستار، تاعدىر تۇيتكىلدەرى كورىنىس تاپقان «تراكتورشىنىڭ ماحابباتى» – بەرىكتىڭ ٴتۇسىپ جاتقان جالعىز كارتيناسى ەمەس. ول، سونداي-اق، قازىرگى تاڭدا رەجيسسەر ەرمەك شىناربايەۆتىڭ «دالا داۋىسى» («گولوس ستەپەي») دەگەن فيلمىندە ونەرىن پاش ەتىپ جاتقانىن اتاپ ٴوتتى. اكتەردىڭ ايتۋىنشا، تۋىندىعا شەتەلدەن دە اكتەرلەر شاقىرتىلعان.
   - وندا مەن اباي ەسىمدى بيزنەسمەندى سومدايمىن. ٴتۇسىرىلىم جۇمىستارى ەندى باستالعان كارتيناعا مەنەن بولەك، باستى رولدە ايگىلى فرانسۋز اكتەرى جەرار دەپاردە ويناپ جاتىر. قازىرگى تاڭدا سول كىسىمەن ٴبىر ٴتۇسىرۋ الاڭىندا ٴجۇرمىز. جۇمىس قىزىپ جاتىر، – دەيدى بىزگە ونەر يەسى.
   بۇدان بولەك بەرىك ايتجانوۆ قاراشا ايىندا تانىمال قازاقستاندىق رەجيسسەر ساتىبالدى نارىمبەتوۆتىڭ «امانات» اتتى كينوسىنىڭ تۇسىرىلەتىنىن بايان ەتتى. تاريحي دراما تاريحشى ەرماحان بەكماحانوۆتىڭ ٴومىر جولىنان سىر شەرتەدى. كەيىپكەرىمىزگە وندا باستى ٴرول بۇيىرىپتى.
   ەستەرىڭىزگە سالا كەتسەك، ايتجانوۆ بۇعان دەيىن «قاسقىر مەزگىلى»، «ماحامبەت»، «ماحامبەتتىڭ قىلىشى»، «ناعىز پولكوۆنيك»، «ليكۆيداتور»، «ارمان قالا» سياقتى فيلمدەر مەن «اعايىندى» تەلەحيكاسىندا ويناعان.

 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي