BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

بالالار اۋديتورياسى وزىنە قاجەتتى كينولارعا ٴزارۋ

 استانا. 28 شىلدە. baq.kz – احات يبرايەۆ – «بولاشاقتىڭ»تۇلەگى. جاس رەجيسسەر. قازاق كينو ونەرىندەگى جاڭا ەسىمدەردىڭ ٴبىرى. كينورەجيسسۋرا ماماندىعى بويىنشا امەريكاداعى «columbia college chicago» وقۋ ورنىن بىتىرگەن.  كومپيۋتەرلىك گرافيكانى پايدالانا وتىرىپ، فەنتەزي جانرىندا كينو تۇسىرگەن ەلىمىزدەگى العاشقى كاسىبي مامان.

 – احات، ٴسىزدى قازاقستاندىق كينويندۋستريادا جاڭا جانردىڭ نەگىزىن قالاعان ٴبىرىنشى رەجيسسەر دەپ تانۋعا قالاي قارايسىز؟

– مۇلدەم قارسىمىن.

 

– نەگە؟

– فەنتەزي جانرىندا العاشقىلاردىڭ قاتارىندا كينو تۇسىرگەنىم ٴۇشىن ٴبىرىنشى دەگەن انىقتامانى جاپسىرۋدىڭ قاجەتى شامالى. جالپى، بىرىنشىگە كەلەر بولساق، بۇل انىقتاما كينورەجيسسۋرا ماماندىعى بويىنشا امەريكانىڭ ۋنيۆەرسيتەتىن بىتىرگەن تۇڭعىش كاسىبي مامان ەكەنىمە قاتىستى عانا ايتىلۋعا ٴتيىس شىعار دەپ ويلايمىن. وقۋىمدى تامامداسىمەن 2009 جىلى ەلگە كەلدىم. كەلگەننەن كەيىن فەنتەزي جانرىنداعى فيلم مەن بالالارعا ارنالعان سەريال ٴتۇسىرۋدى قولعا العان العاشقى رەجيسسەر ەكەنىم راس. فەنتەزي جانرىنىڭ نەگىزىن قالاعان مەن ەمەس. الەمدىك تاجىريبەدە باياعىدان بار جانر. ماعان دەيىن دە بولعان بولا بەرەدى دە. جاڭا جانرداعى العاشقى ٴفيلمدى ٴتۇسىردى ەكەن دەپ ونىڭ نەگىزىن قالاۋشىلاردىڭ قاتارىنا جاتقىزۋ – تىم ارتىق. كەز كەلگەن جانردىڭ نەگىزىن قالاۋ وڭاي اتقارىلا سالاتىن شارۋا ەمەس، ول – ۇلانعايىر ەڭبەكتىڭ ناتيجەسىندە دۇنيەگە كەلەتىن جاڭالىق، ونەردىڭ عاجايىپ ٴبىر تۋىندىسى.

 

– دەگەنمەن، ەرەكشە جانرداعى ٴفيلمدى ٴتۇسىرۋدىڭ باسىندا تۇرعانىڭىزعا قۋاناتىن بولارسىز؟ سەنىپ تاپسىرعان «قازاقفيلمگە» ريزاسىز با؟

– قۋانامىن با، جوق پا ول جاعى وزىمە دە بەيمالىم. مەن «قازاقفيلم» ٴۇشىن تۇسىرگەن جوقپىن، ەڭ باستىسى – قولعا العان قانداي جۇمىستىڭ بولسا دا ٴساتتى اياقتالىپ، تۋىندىنىڭ كورەرمەنگە ۇناعانى. بۇل تۇرعىدان العاندا قۋانۋعا بولاتىن سەكىلدى. العاشقى ەكرانعا جول تارتقان فەنتەزي ستيلىندەگى «اڭىزدار كىتابى: جۇمباق ورمان» ٴفيلمى مەن «سانجار مەن قايسار» اتتى بالالارعا ارنالعان سەريالدى كورەرمەن جىلى قابىلدادى. «سانجار مەن قايسار» سەريالى «قازاقستان» ۇلتتىق ارناسىنىڭ بالالارعا ارنالعان «بالاپان» ارناسىنان كورسەتىلىپ جاتىر. ەندىگى تاڭدا ٴفيلمنىڭ ٴۇشىنشى ماۋسىمعا ارنالعان بولىگىن ٴتۇسىرۋدى قولعا الدىق. ودان باسقا، تاعى ٴبىر جاڭا جوبا بويىنشا فيلم ٴتۇسىرۋدى باستادىق، «كۇن ساقشىلارى»دەپ اتالتىن ول فيلم «ەل ارنادان» كورسەتىلەتىن بولادى. ٴفيلمنىڭ نەگىزگى وزەگىنە جاستار ماسەلەسى الىندى. جاس بۋىنعا ارنالعان سەريالدىڭ وقيعالارى قىزعىلىقتى دا تارتىمدى.

 

– ٴوزىڭىز نەگىزىنەن قانداي جانرداعى فيلم تۇسىرگەندى ۇناتاسىز؟

– كەز كەلگەن جانردى جاتسىنبايمىن. كينو ٴتۇسىرۋ – مەنىڭ نەگىزگى جۇمىسىم. مەن ٴۇشىن ماڭىزدىسى -- ونىڭ ٴساتتى شىققانى.

 

– قازاق رەجيسسەرلەرىنىڭ تۇسىرگەن تۋىندىلارىمەن تانىستىعىڭىز قانشالىقتى؟

– ماعان اباي قارپىقوۆتىڭ ەڭبەكتەرى ۇنايدى. ونىڭ «فاراسى» مەنىڭ ويىمشا ناعىز كينو دەۋگە لايىقتى دۇنيە. قازاقستاندا العاشقىلاردىڭ ٴبىرى بولىپ كوممەرسيالىق كينو ٴتۇسىرۋدى قولعا العان دا اباي قارپىقوۆ. «مەنىڭ اتىم قوجانى» كورمەگەن بالا كەمدە كەم بولار. مەن دە ونى بىرنەشە مارتە كوردىم. جۇرەككە جىلىاسەر ەتەتىنفيلم. الايدا بۇگىنگى بالالاردىڭ بارىنە بىردەي «مەنىڭ اتىم قوجا» ۇنايدى دەۋ قيىنداۋ. قاي كەزدە دە زامان اعىمىنا وراي كورەرمەن سۇرانىمى مەن قاجەتتىلىگىن ەسكەرگەن ابزال سەكىلدى. كينورەجيسسەرلەردىڭ ماسەلەنىڭ وسى جاعىن وي تارازىسىنان وتكىزىپ، سارالاپ الماي جاتىپ، ناعىز كورەرمەن كوڭىلىنەن شىعاتىنداي دۇنيە تۋدىرا قويۋى ەكىتالاي. قازىرگى تاڭدا بالالار اۋديتورياسىنا قاجەتتى تۋىندىلار از، زارۋلىك باسىم. ولارعا ارنالعان دۇنيەلەر جوقتىڭ قاسى. سوندىقتان دا ٴبىز «سانجار يەن قايساردى» ٴتۇسىرۋدى قولعا الدىق. كينووندىرىسى ۇزدىكسىز دامۋ كەرەك، وعان ٴبىر ساتكە دە توقتاپ قالۋعا بولمايدى، جان-جاقتى دامىعانى دۇرىس.

 

– بايقاۋىمشا، جۇرەككە جىلى اسەر بەرەتىن بۇرىنعى فيلمدەر ٴسىزدى اسا سۇيسىندىرمەيتىن سەكىلدى. بۇل كۇندەرى كورەرمەن ٴبىر كەزدەرى كۇن سايىن ەكرانداردان جۇرەككە جىلۋ ۇيالاتاتىن فيلمدەردەن توگىلگەن مەيىرىمدى جوعالتىپ العان جوق پا؟ كورەرمەن قازىرگى تاڭدا نازىك سەزىمگە قۇرىلعان كينولاردى ساعىنادى ەمەس پە؟

– فيلمنەن مەيىرىم ىزدەيتىن كورەرمەننىڭ سۇرانىسى ەسكەرىلمەي قالدى دەۋگە بولماس مۇلدەم. بۇل رەتتە جۇرەگى نازىك كورەرمەندەر كورەي، تۇرىك سەريالدارىن قاناعات تۇتۋدا. وسىعان بايلانىستى اڭگىمە ٴونىم وندىرۋشىلەردىڭ جۇمىسىنا قاتىستى ەمەس، ونى تۇتىنۋشىلاردىڭ سۇرانىمىمەن بايلانىستى وربىتىلگەنى، تۇتىنۋشى تالعامىمەن ساناسقان ابزالىراق دەر ەدىم. ماسەلە – كورەرمەننىڭ نەنى قالايتىنىندا. ۋاقىت ٴبىر ورىندا تۇرمايتىنى سەكىلدى، تالعام دا ٴبىر قالىپتى قالىپتاسپايدى، ۋاقىت اعىمىنا وراي وزىندىك وزگەرىسكە تۇسەدى. سوعان وراي ادامزات بالاسىنىڭ ٴتۇرلى وقيعالار الاڭىنا اينالعان كەزەڭنىڭ ەرەكشەلىگىنە ساي كوزقاراسى مەن تالعامى، ٴوز تانىم-تۇسىنىك دەڭگەيىندە ورنىعادى. ٴبىر كەزەڭ كۋاگەرلەرى باستان وتكەرگەن وقيعالار تاريح دوڭعالاعىنىڭ كەلەسى اينالىمىنا كوشىپ، جاڭا بەتى وزگەشە دۇنيەلەردى باستان وتكەرەتىن بولعاندىقتان دا پىكىر، وي، تۇجىرىم، تالعام بىركەلكىلىگىن جوعالتادى. اۋمالى-توكپەلى دۇنيە ٴوز كەزەگىندە بارىنە دە وزگەرىس اكەلەتىنى ايان.

ەگەر كورەرمەن كەڭەس داۋىرىندە تۇسىرىلگەن تەك مەيىرىم مەن جىلىلىقتى نەگىزگى يدەيا وزەگىنە اينالدىرعان شۋاقتى كينولاردى عانا كورگىسى كەلەتىن بولسا، ونداي تۋىندىلار قازىرگى تاڭدا جارىققا شىعاتىن ەدى ٴسوزسىز. الايدا قاشاندا، قاي كەزەڭدە بولسىن، ونەر ايدىنىندا جاسالار قانداي دا ٴبىر تۋىندىلار كورەرمەننىڭ سۇرانىمىنا ساي دۇنيەگە كەلمەك. 90 جىلدار كورەرمەن قاجەتىنە وراي اتىس-شابىس، بوەۆيكتەر كوپتەپ ٴتۇسىرىلدى. سانى بار ساپاسى جوق دۇنيەلەر قاپتاعان، جاپپاي تالعامسىزدىققا جول بەرىلگەن سول كەزەڭ دە بۇل كۇندەرى تاريح قويناۋىنا ىسىرىلدى ەندىگى تاڭدا كورەرمەن سۇرانىمى امەريكاندىق كوممەرسيالىق فيلمدەرگە قاراي ويىستى، ول بۇرىنعى كەڭەستىك كەزەڭدەگى مەيىرىمدى، جىلى شۋاقتى فيلمدەردى الماستىرا الادى.


– ٴسىز ايتىپ وتىرعان امەريكاندىق فيلمدەر كورەرمەننىڭ بارىنە بىردەي جەتە قويۋى نەعايبىل. ەل اۋزىنان تۇسپەيتىن گولليۆۋدتىڭ باستى ەرەكشەلىگى نەدە؟

– چيكاگودا وقىدىم، سوڭىنان گولليۆۋدتا ستاجيروۆكادان ٴوتتىم. جالپى، كينو ٴتۇسىرۋدىڭ نەگىزى ۇقساس، جۇمىس ۇدەرىسىندە الىپ بارا جاتقان ايىرماشىلىق جوق. ايىرماشىلىعى – مەملەكەت تاراپىنان قالىپتاسقان كوزقاراس پەن قامقورلىقتا، جاسالار جاعداي مەن كينويندۋسترياعا وي ەڭبەگى رەتىندە اسا ماڭىز بەرىلۋىندە. ٴبىزدىڭ مەملەكەتىمىز ٴىشىنارا بولماسا كينو تۇسىرۋگە قارجىنى اسا كوپ بولمەيدى. شىن مانىندە بىزدە كينوعا ٴبولىنىپ جاتقان قارجى تىم ماردىمسىز. الىسقا بارماي-اق، كورشى قىتاي مەن رەسەيدى الاتىن بولساق، وندا بۇل سالاعا قۇيىلىپ جاتقان قارجى ميلليونداپ ەمەس، ميللياردتاپ سانالادى. بىزدە قارجىلاندىرۋ جاعى تۇراقتى ەمەس، ٴبىر جىلى ميلليونداپ بولىنسە، كەلەر جىلى سايابىرسىپ قالادى. كينونى قارجىلاندىرۋدا مەملەكەت تاراپىنان تۇراقتى ٴبىر جۇيە جوق. «ەرتەڭ قار جاۋا ما، جاۋماي ما؟» دەپ تەرەزەدەن سىعالاپ كۇن رايىنا قاتىستى بولجام جاسايتىنداي، ٴبىزدىڭ كينووندىرۋشىلەر دە «كەلەر جىلى قارجى بولىنە مە جوق پا؟» دەگەن كۇپتى كوڭىلمەن، الاڭداۋمەن كۇي كەشۋدە. بۇل – كينوونەرى ٴۇشىن ٴقاۋىپتى قۇبىلىس. جۇيەلى تۇردە جاردەم جاسالىپ، قامقورلىق تانىتىلماعان سالادا جۇيەسىز ٴىس بەلەڭ الاتىنى بەلگىلى. ساپاسى ناشار تۋىندىلاردىڭ دۇنيەگە كەلۋى سونىڭ دالەلى. تيىسىنشە دەمەپ، لايىقتى جەبەمەگەن سوڭ ونەر دە ورگە باسپايدى، ٴبارى دە بىر-بىرىمەن ساباقتاسا جۇرگىزىلەتىن شارالار بولعاندىقتان، كينووندىرىسىنىڭ جاي-كۇيى وزىنە جاسالىنعان قامقورلىق پەن دەمەۋگە تىكەلەي بايلانىستى بولماق. ونەرگە جالپى، ٴبىر كۇننىڭ نەمەسە ٴبىر جىلدىڭ جەمىسى دەپ قاراماعان ٴجون، ول – ماڭگىلىك. ول– ۇنەمى جاڭعىرۋدى، جاڭارتۋدى تالاپ ەتەتىن سالا. ونەر ۇزدىكسىز دامىعاندا عانا شيرىعا تۇسەدى. سول ٴۇشىن دە وعان جاردەمنىڭ جۇيەلى تۇردە كورسەتىلگەنى، ارادا ٴۇزىلىس بولماعانى ابزال.


– گولليۆۋدتاعى ارىپتەستەرىڭىزدىڭ جۇمىس ىستەۋ ادىسىنەن وزىڭىزگە نەسى ۇنادى؟

– ۇناعانى – جۇمىس ۇدەرىسى كەزىندەگى قاتالدىق، تالاپشىلدىق. گولليۆۋدتا ەرىكسىز ەلىتىپ جىبەرەتىن ازارت بار. تىلمەن ايتىپ جەتكىزۋ مۇمكىن ەمەس، كينو تۇسىرۋگە دەگەن تارتىلىس، ىنتا، قىزىعۋ بار. سول تارتىلىستىڭ تۇڭعيىعى شىرماپ الاتىنى سونشالىق، ٴتۇسىرۋ الاڭىنان كەتكىڭ كەلمەيدى، ٴبىر تىلسىم ىنتىقتىرىپ وزىنە قاراي تارتا بەرەدى، تارتا بەرەدى. شىعارماشىلىق يەلەرى تاۋەكەلگە بارۋدان ەش قايمىقپايدى، «جولىم بولا ما بولماي ما؟» دەگەن ۇرەيدى مۇلدەم ميدان سىزىپ تاستاعان. بىردە ويى ىسكە اسار، ال بىردە قۇردىمعا كەتۋى ىقتيمال، ٴبارىبىر سىناق جاساۋدان قاشپايدى. ول – ٴسوز جوق ،ىزدەنىسكە ىقپال ەتەر، تۆورچەستۆونىڭ قاناتىن قۇلاشتاي سەرمەۋىنە سەرپىن بەرەر، جاڭا يدەيالار باستاۋىنا جول اشار بىردەن-بىر مۇمكىندىك ەكەنى داۋسىز.

 

–«قازاقفيلمدە» تاجىريبەدەن وتكەن جوقسىز با؟

– وقۋعا تۇسكەنگە دەيىن «قازاقفيلممەن» كينوعا قاتىستى ەشقانداي بايلانىسىم بولعان جوق. مەكتەپتى بىتىرە سالىسىمەن 17 جاسىمدا امەريكاعا اتتاندىم. بەس جىلدان كەيىن ەلگە ورالدىم. سول كەزدەرى ەكىنشى رەجيسسەر رەتىندە فيلم تۇسىرۋگە قاتىستىم.

 

– ونەر الەمىنە قادام جاساۋىڭىزعا كىمدەر اسەر ەتتى سوندا؟

–كينوعا دەگەن قىزىعۋشىلىق «قازاقفيلم» تۋىندىلارىن قاراعاننان ويانا قويادى دەۋ قيىنداۋ ٴارى بۇل ٴبىرجاقتى كوزقاراستى بىلدىرەتىن پىكىر. كاسىبىڭە دەگەن ىنتىزارلىق بالالىق شاقتان باستاۋ الاتىن سەكىلدى. ٴوزىڭنىڭ تاراپىڭنان بۇل سالاعا دەگەن ٴبىر تارتىلىس بولماسا ەشكىم دە ەركىڭنەن تىس قىزىقتىرا المايدى، ەشكىم دە ەركىڭنەن تىس سالاعا دەگەن سۇيىسپەنششىلىكتى سىڭىرە المايدى. سوندىقتان ونەردى سۇيۋگە، وعان قۇشتارلىقتى بالا بويىنا جاستايىنان ٴوز جۇمىستارىمىز ارقىلى دارىتا الساق، كەيىن كەلە، ونىڭ ٴوز ناتيجەسىن بەرەرى اقيقات. مىندەتتى تۇردە ٴتيىستى ناتيجەسى بولادى. ٴبىزدىڭ فيلمدە ٴبىر ەپيزود بار، بالالار كينو تۇسىرگىسى كەلەدى. ونى بالالار ەسەيگەندە وcى سالاعا شىنايى بەرىلىپ، جان-تانىمەن كىرىسەتىندەي نەگىز قالاۋعا ٴسال دە بولسا سەپ بولا ما دەگەن ماقساتپەن جاسادىم. كاسىپكە دەگەن سۇيىسپەنشىلىك تال بويىنا جاستايىنان دارىعان جاننان مىقتى مامان شىعادى. ولار قولعا العان قانداي ٴبىر ٴىستى جوعارى دەڭگەيدە ازىرلەيتىن بولادى. كينوعا كەزدەيسوق كەلگەندەردىڭ كورەرمەن قالاعان دۇنيەنى تۋدىرا المايتىنى انىق.

 

– ەندەشە بالا احات كەزىندە قانداي فيلمدەردى تاماشالادى ەكەن؟

–نەگىزىنەن امەريكاندىق فيلمدەردى كوردىم. اتا-انامنىڭ كۇندەلىكتى قاجەتكە پايدالانۋعا بەرەتىن قاراجاتىنىڭ ٴبىر تيىنىن دا بوس نارسەگە جۇمساماي، تەك ديسكىلەر الۋعا تىرىستىم. كۇنى-تۇنى كورەتىنىم امەريكاندىق فيلمدەر بولدى. كورۋدەن ەش جالىقپايتىنمىن، قاراعان سايىن قاراي بەرگىم كەلەتىن.

 

– گولليۆۋدتىڭ تۇلەگى ٴتۇسىرىپ جاتقان الاڭدا ونىڭ ٴىس تاجريبەسىن ۇيرەنگىسى كەلەتىن ستۋدەنتتەردى نەمەسە بولاشاقتا رەجيسسەر بولسام دەپ ارماندايتىن جاستاردى كەزدەستىرۋگە بولا ما؟

– بىر-ەكى دوستارىم بار وتە تالانتتى جىگىتتەر،جاس رەجيسسەرلەر. ەمير بايعازين، فارحاد ٴشارىپوۆ، ٴادىلحان ەرجانوۆ، اسقار ۇزابايەۆ. بولاشاقتا ولار ٴوزىن ٴالى كورسەتەتىن بولادى. جۇرگەنوۆ اتىنداعى ونەر اكدەمياسىنىڭ ستۋدەنتتەرىنە قاتىستى ولاي دەي المايمىن. كەيبىر ستۋدەنتتەردىڭ كينوعا كەزدەيسوق كەلگەنى بىردەن اڭعارىلادى. جۇمىسقا دەگەن قۇلشىنىس جوق، ايتەۋىر وزدەرىنشە جۇرگەن ٴبىر الەم. بارلىق ستۋدەنتتەرگە قاتىستى ەمەس بۇل اڭگىمە، دەگەنمەن ولاردىڭ اراسىندا كەزدەيسوق وقۋعا تۇسكەندەر بارشىلىق.

 

– سوڭعى جىلدارى قازاق كينوونەرىنە ٴبىر توپ جاس رەجيسسەرلەر جاڭا تۋىندىلارىمەن كەلدى دۇرىلدەپ. ولاردىڭ ٴفيلمى ايرىقشا ىقىلاس تۋدىرعانى كوپشىلىككە ٴمالىم. سىزدەر ٴبىر-بىرىڭىزدىڭ تۋىندىلارىڭىزبەن تانىسسىزدار ما؟ ارالاسىپ، ٴوزارا پىكىر الماسىپ تۇرۋعا ۋاقىت تاباسىزدار ما؟

– ٴجيى ارالاسامىز دەپ ايتا المايمىن، وتە سيرەك كەزدەسەمىز، ويتكەنى ٴبارىمىزدىڭ جۇمىستان قولىمىز بوسامايدى. بىر-بىرىمىزگە دەگەن نيەتىمىز ٴتۇزۋ.

 

– بالالار سەريالدارىن تۇسىرۋمەن شەكتەلىپ قالمايتىنىڭىز بەلگىلى. بولاشاقتا قانداي فيلم تۇسىرمەك ويداسىز؟

– ونى ناقتى ايتا المايمىن. ٴالى ۇسىنىس تۇسكەن جوق. ٴبارى دە تۇسكەن ۇسىنىسقا تىكەلەي بايلانىستى.

كينو ٴتۇسىرۋ مەن ٴۇشىن – جۇمىس، ونى ۋاقتىسىندا ٴبىتىرۋ – ماقسات. كينو ٴتۇسىرۋ بارىسىندا وعان ونەر تۇرعىسىنان ەمەس، اتقارىلۋعا ٴتيىس جۇمىس ساناتىندا قارايمىن. قيالعا ەرىك بەرۋگە ۋاقىت تا بولمايدى. دانىشپان تۇلعالاردىڭ ونەرگە قاتىستى پىكىرلەرىن مىسالعا كەلتىرىپ، اقىلگويسىگىم كەلمەيدى. بار بىلەرىم – جۇمىستى دەر مەزگىلىندە ٴارى ساپالى ورىنداۋ.

 

– بالالارمەن جۇمىس ىستەگەن وڭايعا تۇسپەيتىن شىعار؟

– بالالارمەن دايىندىق جۇمىستارىن كوپ جۇرگىزۋ كەرەك. ولار ويناپ جاتىرمىز دەپ ويلامايدى. ونىڭ مانىنە تەرەڭ بويلامايدى دا.سوندىقتان دايىندىق بارىسىندا نەنى ىستەۋ قاجەتتىگىن تۇبەگەيلى ٴتۇسىندىرىپ المايىنشا،تۇسىندىرگەندى تاقپاق جاتتاعانداي ەسىندە ساقتامايىنشا، تۇسىرۋگە كىرىسۋگە بولمايدى. بالالاردى كينوعا تۇسۋگە پسيحولوگيالىق تۇرعىدان دايىندامايمىن، وعان ۋاقىتىم دا جوق. تەك ناقتى نەنى ىستەۋ كەرەكتىگىن بارىنشا تياناقتى تۇردە تۇسىندىرەمىن. جۇمىستىڭ ٴساتتى اياقتالۋىنىڭ بار كىلتى جاقسى جاسالىنعان دايىندىققا بايلانىستى.

 

– تەك قانا جۇمىس دەپ قاراۋ قارادۇرسىندىككە ۇرىندىرماي ما؟

– ٴبىزدىڭ ەلىمىزدە بالالار مەن جاستار تاقىرىبىنا قاتىستى دۇنيەلەر جوقتىڭ قاسى. قازىرگى 30-دان اسقان تولقىن وزىنە قاجەتتى، سۇرانىمىن قاناعاتتاندىراتىن كينونى كورۋدەن قۇردىم قالعان ۇرپاق قاتارىنا جاتادى. سوندىقتان مەملەكەت تاراپىنان، اسىرەسە جاستار اۋديتورياسىن بوس كەڭىستىك قالماۋىن باستى نازاردا ۇستاعانى ابزال. قازىرگى تاڭدا كورەرمەن كينو، تەلەونىمدەرىن ويىن-ساۋىق، كوڭىل كوتەرەتىن قۇرال رەتىندە قابىلدايدى. بەلگىلى ٴبىر يدەيانىڭ جەتەگىنە ىلەسىپ، سوعان لايىقتى دۇنيە جاسايمىن دەپ سەرگەلدەڭگە تۇسەتىن جان ەمەسپىن. الايدا فيلم ٴتۇسىرىلىپ بىتكەندە ونىڭ ايتار ويى بار، بەلگىلى ٴبىر ماعىنالى مانگە يە تولىققاندى دۇنيەگە اينالادى.

– اڭگىمەڭىزگە راقمەت. شىعارماشىلىق تابىس تىلەيمىز.


اۆتور ايتولەن ۇلبوسىن


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي