BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستان بۇۇ قاۋىپسىزدىك كەڭەسىندە ميانمانىڭ راكحاين شتاتىندا جاسالعان قىلمىستى ايىپتادى

استانا، baq.kz. بۇۇ قاۋىپسىزدىك كەڭەسىنىڭ ميانماداعى احۋالى تۋرالى وتىرىسىندا قازاقستان راكحاين شتاتىندا جاسالعان قىلمىستى ايىپتاپ، وسى ەلدەگى گۋمانيتارلىق داعدارىستى بۇكىل حالىقارالىق قوعامداستىقتىڭ قاتىسۋىمەن جەدەل جانە جان-جاقتى تۇردە شەشۋگە شاقىردى.

«ميانماداعى روحيندجا-مۇسىلماندارىنا قاتىستى ەتنيكالىق جانە ٴدىني كەمسىتۋشىلىك، وسى كۇنگە دەيىن جالعاسىپ وتىرعان كەڭ اۋقىمدى دەپورتاسيالاۋ جانە قۋدالاۋدى قوسا العاندا ادام قۇقىقتارىنىڭ ايقىن، جاپپاي جانە جۇيەلى تۇردە بۇزىلۋى تۋرالى باياندامالار جان تۇرشىكتىرەدى»، - دەدى قازاقستاننىڭ بۇۇ جانىنداعى تۇراقتى وكىلىنىڭ ورىنباسارى قانات تۇمىش.

قازاقستاننىڭ وكىلى جاسالعان قىلمىستاردىڭ تولىق اشىلۋى جانە كىنالى ادامداردى جاۋاپكەرشىلىككە تارتۋ روحيندجا-مۇسىلماندارىنىڭ ٴوز ۇيلەرىنە قايتۋدىڭ العىشارتتارىنىڭ ٴبىرى بولاتىنىن اتتى.

ونىڭ ايتۋىنشا ٴبىر ميلليون روحيندجا ادامدارى، ولاردىڭ كوپشىلىگى ايەلدەر مەن بالالار، ٴالى كۇنگە بانگلادەشتەگى بوسقىندار لاگەرىندە تىم قيىن جاعدايعا تۇسۋگە ٴماجبۇر بولىپ وتىر.

«ميانما ۇكىمەتى قاۋىپسىزدىك كەپىلدىگىن قامتاماسىز ەتۋگە، ٴبىلىم الۋعا، جۇمىسقا ورنالاسۋعا، دەنساۋلىق ساقتاۋعا جانە تۇراقتى ۇزاق مەرزىمدى ٴومىر سۇرۋگە مۇمكىندىك بەرمەي، قاجەتتى جاعدايلار جاساۋ پروسەسىن جەدەلدەتپەگەنشە، روحيندجا-مۇسىلماندارىنىڭ راكحاين شتاتىنا قايتۋى مۇمكىن ەمەس»، - دەدى قازاقستاننىڭ وكىلى.

قازاقستان بانگلادەش ۇكىمەتىنىڭ بوسقىندارعا كومەك كورسەتۋ جونىندەگى كۇش-جىگەرىن، ونىڭ ىشىندە ولاردى تۇرعىن ۇيمەن، دارى-دارمەكتەرمەن، ازىق-تۇلىك ونىمدەرىمەن قامتاماسىز ەتۋىن جوعارى باعالاپ، بۇۇ-عا مۇشە مەملەكەتتەردى، حالىقارالىق ۇيىمداردى وسى ەلگە جانە روحيندجا بوسقىندارىنا قاجەتتى قولداۋ كورسەتۋدى جالعاستىرا بەرۋگە شاقىردى.

سونىمەن قاتار ۇستىمىزدەگى جىلدىڭ ٴساۋىر ايىندا قازاقستان ۇكىمەتى بانگلادەشتەگى كوكس-بازار قالاسىنىڭ ماڭىنداعى اۋماعىندا ورنالاسقان روحيندجا بوسقىندارىنا 500 مىڭ دوللار كولەمىندە گۋمانيتارلىق كومەك كورسەتىپ، ونى ولار تۇراتىن جەرلەرگە جەتكىزدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي