Астанада оңалту орталығы ашылды

Астана. 19 мамыр. Baq.kz - «Қасиетті жол» қоғамдық қоры «Самұрық-Қазына» Ұлттық әл-ауқат қорының қолдауымен «Дені сау бала – ұлт болашағы» жобасы аясында сал ауруына шалдыққан балаларды сауықтыруға арналған оңалту орталығының тұсауын кесті. 

Бүгінде сал ауруымен Қазақстан бойынша 10 мыңнан астам бала тіркелген. Әлеуметтік маңызы зор жобаны жүзеге асыруға «Нұр Отан» партиясы да қолғабыс тигізуде.

Оңалту орталығын «Самұрық-Қазына» ұлттық әл-ауқат қорының жұртшылықпен байланыс жөніндегі департамент директоры Айдар Махметов салтанатты түрде ашты. Орталық қонақтарына емдеуден өтіп жатқан балалар шағын концерт көрсетті. Орталық жұмысымен «Қасиетті жол» қайырымдылық қорының президенті Гүлмира Ғалимова таныстырды.

«Самұрық-Қазына» Ұлттық әл-ауқат қорының қолдауы арқасында биыл Қасиетті жол» қоғамдық қайырымылық қорының Оңалту орталығы Астана және әр алуан аймақтардан келген, сал ауруына шалдыққан 250-ден астам сырқат баланы қабылдайды.

Орталықта қызмет ету үшін осы салада үлкен тәжірибесі бар өңірдің үздік дәрігерлері мен ұстаздары тартылған. Мұнда балалар толық медициналық тексеруден өтіп, оңалту бойынша тегін көмек алады. 2014 жылдың аяғына дейін әрқайсысы 21 күннен тұратын 10 оңалту курсын өткізу жоспарланған.

«Қасиетті жол» қоғамдық қоры жұмысының негізгі бағыты – қайырымдылық. Қор өз алдына жетім, сырқат балаларға, аз қамсыздандырылған отбасы мүшелеріне, қарттарға қол ұшын беруді міндет етіп қойған. Бұл ретте, мекемелер мен көмекке зәру жандарға материалдық қолдау көрсету, әрі меценанттық пен филантропияны дамыту басты назарда.

Оңалту орталығының салтанатты ашылу рәсімі Астана қаласы, Қошқарбаев көшесі, 64 үй мекен-жайы бойынша орналасқан №2 қалалық балалар емханасы ғимаратында өтті. Іс-шараға шеңберінде «Самұрық-Қазына» АҚ, «Қасиетті жол» қайырымдылық қоры басшылығы, «Нұр Отан» партиясы мен мемлекеттік орган өкілдері қатысты. 

Біздің Telegram-парақшамызда Қазақстанның маңызды жаңалықтары. Жазылыңыздар!