Астана: 
Бүгін Қызылорда облысына жұмыс сапары аясында ҚР Премьер-Министрі Бақытжан Сағынтаев Арал ауданында «Аралтұз» цехтары мен Арал қаласындағы балық өңдеу зауытының мысалдары негізінде балық және азық-түлік өнеркәсібінің даму қарқынымен танысты, деп хабарлайды Baq.kz ақпарат агенттігі primeminister.kz сайтына сілтеме жасап.
Арал маңында балық өнеркәсібі қарқынды дамып келеді. Қызылорда облысында 22 балық өңдеу кәсіпорны бар, оның ішінде Еуропалық Одаққа — 4, Қытайға — 3, Еуразиялық экономикалық одақ елдеріне — 9-ы өнім экспорттайды.
ҚР Қаржы министрлігінің Мемлекеттік кірістер комитетінің мәліметтеріне сәйкес өткен жылы балық және балық өнімдерін экспорттау көлемі $56,5 млн құрады, басқаша айтқанда, қазақстандық балықтың ⅔ экспортқа жіберіледі. Сонымен бірге, Қызылорда облысының экспортқа қосқан үлесі $12 млн асты (3500 т).
Бақытжан Сағынтаев қуаттылығы жылына 6 000 тонна болатын «Арал балық өңдеу зауытының» өндірісімен танысты. Дайын өнім Ресей, Қытай, Польша, Голландия, Германия, Дания, Грузия, Әзербайжан және Өзбекстан нарықтарына экспортталады.
Күннің екінші жартысында Бақытжан Сағынтаев «Аралтұз» АҚ зауытының мысалында өңірде ИИДМБ жобаларын жүзеге асыру барысымен танысты.
Жақсықылыш ауылында йодталған тұз шығаратын жалғыз зауыт және ел аумағындағы ең ірі тұз өндіру және өңдеу кәсіпорны жұмыс істейді.
Индустриялық-инновациялық дамудың мемлекеттік бағдарламасы аясында «Аралтұз» компаниясы ас және техникалық тұзды өндіру бойынша екі испан цехын іске қосты. Бірінші цех еуропалық технология бойынша жұмыс істейді және йод қоспалары бар ас тұзының тоғыз түрін шығарады. 2016 жылы техникалық тұз өндірісін кеңейту мақсатында екінші испан желісі — полимерлік цех сатып алынды. Зауытты қайта құру еңбек өнімділігін екі есеге арттыруға және жұмыс орындарымен 1200-ден астам адамды қамтамасыз етуге, жұмысшылардың жалақысын 60%-ке арттыруға мүмкіндік берді. Өндіріс және өткізу көлемі үш есеге жуық өсті, ал экспорттық өнім үлесі 65%-ке жетті.
Естеріңізде болса, 2017 жылы «Аралтұз» АҚ 3,5 млрд теңгеге 332 600 т өнім өндірді. Өткен жылы экспорт көлемі 212 600 т құрады. Биылғы жылдың қаңтар–ақпан айларында өндіріс көлемі 58 200 т (637 млн тг), экспорт 44 400 т (981,2 млн тг) құрады.
Сондай-ақ, нысандарды аралау барысында «Аралтұз» директорлар кеңесінің төрағасы Д. Мұқашев кальций қосылған сода өндіру бойынша жобаны іске асыру басталғанын мәлім етті.
Біздің Telegram-парақшамызда Қазақстанның маңызды жаңалықтары. Жазылыңыздар!
2452 
0
4843
0