BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
Астана:

«Air Astana» Қытайға ұшатын рейстердің санын көбейтпек

Алдағы жылдары «Air Astana» авиакомпаниясы Қытайға ұшатын рейстердің санын көбейтуді жоспарлап отыр. Бүгінде аталған компанияның ұшақтары Пекин мен Үрімші қалаларына ұшса, 3 жылдан кейін қосымша Қытайдың 4 шаһарына авиарейстер ашылады. Бұл туралы Қазақстан-Қытай туристік форумында «Air Astana» АҚ президенті Питер Фостер мәлімдеді, деп хабарлайды Baq.kz тілшісі.

«2015 жылы Қытайда 120 млн халық шетелге шыққан. Орташа есеппен алғанда, өз елінде қытайлық бір күнде 300 доллар жұмсайды екен. Қарапайым математикалық есеп жүргізсек, 2015 жылы қытайлық туристер 36 млрд доллар жұмсаған. Осы жылы «Air Astana» авиакомпаниясы 200 мың қытайлық туристі тасымалдауды жоспарлап отыр. 3 жылдан соң бұл көрсеткіш 1 млн-ға жетеді деген үміттемін. Біздің ойымызша, осы туристердің 500 мыңы Қазақстанда аялдауы мүмкін. Яғни, олар біздің елімізде екі күн болса, демек 500 мың қытайлық Қазақстанда 1 млн транзиттік күнді өткізеді деген сөз. Ал олардың бір күнде 300 доллар жұмсайтынын ескерсек, ұлттық экономикамызға 300 млн доллар кіріс кіруі мүмкін. Бұл – билеттерді қоспай, қонақ үйлерді, мейрамханаларды, сауда орталықтары мен туристік ұйымдарға жұмсалған қаржыны алғанда. Бұл – өте көп ақша және қосымша жұмыс орындары», - дейді мекеме басшысы.

Сондықтан, аталған компанияның басшысы Питер Фостер осы мүмкіндікті пайдалану үшін Қытайға авиарейстердің санын көбейтпек.

«Бұл жобаны жүзеге асыру үшін не қажет? «Air Astana» тасымалдаушы ретінде 3 жылдан соң апталық рейстер санын 20-дан 60-қа дейін арттыруды жоспарлап отыр. Бүгінде біз Қытайдың Пекин және Үрімші қалаларына ұшамыз. Ал 3 жылдан соң 4 қалаға, яғни, Сиань, Чэнд, Гуанджоу және Шанхай шаһарларына рейс ашуды жоспарлап отырмыз. Осы орайда Қазақстан мен Қытай арнайы келісімге келуін сұрап отырмыз. Сонымен қатар, біз Үкіметтен Қытай азаматтарын визалық рәсімді жеңілдетуді сұрадық. Яғни, біз мемлекеттен қытайлық азаматтарға елімізде 72 сағат визасыз жүруді ұсындық. Мұны жүзеге асыру қиындық тудырмайды. Қытай мұндай тәжірибені бұрыннан қолданып келеді. Яғни, қолында ұшаққа билеті бар Қытайда аялдаған азаматтар осы елде визасыз жүре алады. Ұшақтарымызда қытайлық жолаушылардың жағдайын жасау үшін барлығын жасаймыз. Біздің веб-сайт қытай тілінде жұмыс істейді. Сонымен қатар, қытай тілін меңгерген борт серіктерін іріктеп, жұмысқа қабылдап жатырмыз», - дейді «Air Astana» АҚ президенті.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер