4000 км жол және төрт ұлттық табиғи саябақ — «Сарыарқа» экспедициясының қорытындысы - Туризм|04 Қыркүйек 2018, 19:51
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
Астана:

4000 км жол және төрт ұлттық табиғи саябақ — «Сарыарқа» экспедициясының қорытындысы

Бүгін «Сарыарқа» бағыты экспедициясы мәресіне жетті. 20 тамызда басталған экспедиция 16 күнге созылды. Осы уақытта қатысушылар 4000 шақырымнан астам жолды еңсеріп, төрт ұлттық табиғи саябақта болды, деп хабарлайды Вaq.kz ақпарат агенттігі.

Экспедицияны ҚР Мәдениет және спорт министрлігінің Индустрия комитетінің тапсырмасы бойынша «Kazakh Tourism» ҰК ұйымдастырды. «Сарыарқа» экспедициясының бағытын жүзеге асырушы – «QazaqGeography» РҚБ. Бұл – «Ұлы Дала Eліне саяхат» жобасы аясындағы төртінші бағыт.

Саяхатшылар Ақмола, Қарағанды және Солтүстік Қазақстан облыстарындағы түрлі ландашфты, өсімдіктер мен жануарларға бай көрікті жерлерді аралады. Экспедиция құрамында саяхатшылар, телевизия журналистері мен туроператорлар өкілдері, шетелдік және қазақстандық тревел-блогерлер: атап айтсақ, ресейлік тревел-блогер Елена Хачина мен қазақстандық саяхатшы, блогер Ұлан Әлімбек бар.

«Ұлы Дала Еліне саяхат» жобасы Қазақстан аймақтарына жасалатын ең ірі экспедиция. Экспедиция 2018 жылғы 18 шілдеден бастап алты бағыт бойынша алты туристік кластерді қамти отырып, маңызды табиғи нысандарға бару арқылы жүргізіледі. Экспедициясының мақсаты — жаңа туристік бағыттарды жасау үшін табиғи, тарихи, киелі мекендері зерттеу, ішкі туризм мен инфрақұрылымды дамыту, және туған елді зерттеу. Оған қоса, экспедиция туралы материалдар Қазақстанның туристік орын ретінде танылуына және халықты ішкі туризмге тартуға ықпал етеді. Экспедиция нәтижесінде еліміздің табиғи нысандары бойынша жаңа туристік бағыттар, сапалы фото-және видеобанктер құрылады, олардың қазіргі күйі туралы өзекті ақпарат алынады, иллюстрацияланған жолнұсқа жасалатын болады» - дейді «Kazakh Tourism» ҰК басқарма басшысы Рашид Күзембаев.

16 күнге жалғасқан сапарда Арқа даласын аралаған экспедицияның 30-ға жуық мүшесі қиын да қызықты жолды бастан кешірді.

«Бұйратау» мемлекеттік ұлттық табиғи саябағында экспедиция мүшелері маралдарды тамашалау мүмкіндігіне ие болды. Сол күнгі ауа райының қолайсыздыңына орай, саяхатшыларға оңай болмады: нөсерлі жауын астында шатырда түнеу – кез келген туристің қолынан келер іс емес. Осы саябақта құстардың небір түрі мекендейтін көл бар. Бұл – саябақ аумағындағы ең ірі көлдердің бірі — Әжібай көлі. Мұнда құстарды тамашалағанды ұнататындар келеді. Экспедиция қатысушыларының келесі тоқтаған жері — Баянауыл ұлттық табиғи саябағындағы Торайғыр көлінің жағасы. Көлдің бұлай аталуы әйгілі Едіге бидің ұрпағы Торайғырмен байланысты. Ол өте әділ әрі парасатты адам болған. Осы көлдің бойында өмір сүргендіктен, халық көлге оның атын берген. Жалпы алғанда Баянауылдың тарихы бай, табиғаты әсем, ол туралы аңыздар мен әпсаналар көп. Баянауыл саябағында экспедиция қатысушылары барған тағы бір көл — Жасыбай. Бұл — туристердің сүйікті орны. Айта кету керек, мұнда инфрақұрылым біршама дамыған» - дейді экспедиция мүшесі, танымал фотограф Ерболат Шадрақов.

Қарағанды облысының аумағындағы Қарқаралы мемлекеттік ұлттық саябағында экспедиция тобы Шайтанкөл деп аталатын тағы бір көлмен танысты. Көл тау басындағы тастардың арасында орналасқандықтан, мұнда тек жаяу жетуге болады.

Қарқаралы ауданының әкімі Халел Мақсұтов қатысушыларды, Құнанбай қажы салдырған Қазақстандағы ең ескі мешіттердің бірін көруге шақырды. Бүгінге дейін мешіт көп өзгерген. 1920 жылы мешіттің мұнарасы қиратылып, ғимараты мектеп ретінде берілсе, кейіннен қойма қызметін атқарды да, бертін келе мүлде бос қалды. 1980 жылдары мешіт қайта жөнделіп, бүгінде өзінің бастапқы мақсаты бойынша қайта қолданылуда.

«Жол тым ауыр болған жоқ. Дегенмен "Жол азабы - көр азабы" деп қазақ бекер айтпаған ғой. Көліктер сынды, батпаққа отырып қалған кездер болды. Бірақ, барлығы артта қалып, бүгін межелі жерге жеттік. Діттеген жерге келген соң, соның барлығы бір күндей болмай, күліп отырып еске алатындай болып қалды" - дейді Ерболат Шадрақов.

Ары қарай экспедиция мүшелері еліміздегі ең үлкен су қоймаларының бірі — Балқаш көліне бет алды. Көлдің ерекшелігі: оның батыс жағы – тұщы, ал шығыс бөлігі ащы болып келеді. Көлде шамамен 20-ға жуық балықтың түрі, ал жағасында құстың 120-дан астам түрі мекендейді. Олардың көбі Қазақстанның Қызыл ктіабына енгізілген.

Балқаштың сол жағалауында жұмбағы мол, табиғаты сұлу Бектау ата тауы бар. Мұнда келгенде саяхатшылардың алдында керемет «марс» пейзажы көрінді. Бұл екі табиғи ландшафт — гранитті тау мен құмды даланың түйіскен табиғи ортасы. Бектау ата гранитті жартастары — жер беті мен жарықшақтарында қалған жанартау лавасы. Жанартау қатпарлары өте әдемі. Бұл таудағы ең көрікті жерлердің бірі — Атабек үңгірі. Оның ұзындығы 50 м. Мұнда тәңіршілер Ұмай анаға арнап діни рәсімдер жасаған деп саналады.

Ортауда экспедиция мүшелері Шұнақ метеорит кратерін көріп, содан соң ежелде жартастарға салынған суреттер сақталған археологиялық ескерткіші бар Теректі шатқалына бет алды. Теректі әулие шатқалында «аң стилінде» салынған жануарлардың суретін көруге болады. Мұнда шамамен 300 петроглиф бар.

Саяхатшылар осы бағыт бойынша тағы екі ұлттық саябаққа барды, олар: «Көкшетау» мемлекеттік ұлттық табиғи саябағы мен ЮНЕСКО дүниежүзілік мұрасына кіретін Қорғалжын мемлекеттік табиғи қорығы. Қатысушылардың айтуынша, бағыт қызыққа толы және өте әсерлі болды.

«Экспедицияның тағы бір маңыздылығы Қасиетті Қазақстан бағдарламасы бойынша анықталған орындарға тоқтап, ондағы жай-күймен танысу. Қандай олқылықтар бар, қандай жетістіктер бар, алдағы уақытта бұл жерлерге қандай жағдай жасап, қалай көркейтуге болады дегенді де біздің экспедицияның мүшелері анықтай жүреді. Мысалы қай нысанға бару үшін қай жерге жол белгісін қою керек дегенді де біз ескереміз. Сол арқылы ҚазАвтоЖолмен бірлесіп белгілер орнататын боламыз» - дейді Рашид Күзембаев.

Сонымен, 6 бағытта жол алады деп жоспарланған ауқымды экспедицияның алғашқы сапары аяқталды. Енді 5 бағыт бойынша жол күтіп тұр. Айтпақшы, оның да алғашқысы 10 қыркүйектен басталып кетпекші. Бағыт - әйгілі Сыр елі, 360 әулие мекен еткен Маңғыстау даласы.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер