«Нұрлы жол» моноқалалардың да бағын ашады

Астана. 18 қараша. Baq.kz - Қазақстанда жалғыз ірі кәсіпорынды немесе бір саланы ғана тірек еткен шағын қалаларды қолдау мәселесіне «Нұр Отан» партиясының сайлауалды Тұғырнамасында көңіл бөлінген, - деп жазады "Айқын" газеті.

Сондықтан осы саланың қазіргі жай-күйі мен тиісті бағдарламаның орындалу барысы «Нұр Отан» партиясы фракциясының Өңірлік саясат және мәслихаттармен жұмыс жөніндегі кеңесінің кеңейтілген отырысында жеке қаралды. Жиынға Кеңес төрайымы, депутат Гүлнәр Сейітмағанбетова жетекшілік етті.

Елбасының тапсырмасына сәй­кес, 2012 жылы ел Үкіметі «Моноқа­ла­­ларды дамытудың 2012 – 2020 жыл­­дар­ға арналған бағдарламасын» бе­кітті. Бұл құжат аталған шағын шаһар­ларды «орта және ұзақмерзім­ді перспективада орнықты әлеу­мет­тік-экономикалық дамыған» қа­ла­ларға айналдыруды көздейді.

Бағдарлама аясында сол жылы абат­тандыру жұмыстарына 6 мил­лиард, өткен жылы абаттандыру және инженерлік инфрақұрылымды дамыту шараларына 18,8 миллиард теңге жұмсалған екен. Ал биыл 27,8 миллиард теңге бөлінген, бұл қаржы тасқыны моноқалалардағы инфра­құрылымды дамыту, абаттандыру, мик­рокредиттер беру, субсидиялау жә­не әралуан гранттарға арна тарту­да.

Мәселен, моноқалаларда жаңа өн­діріс құрғысы келетіндерге 3 мил­лион теңге көлемінде қайтарымсыз грант беріледі. 1 қазандағы жағдай бойынша жалпы ауқымы 224 мил­лион теңгені құрайтын 93 грант, мұ­ның сыртында шағын және орта бизнесін ашқысы келген адамдарға жалпы сомасы 979 миллион теңге бо­латын 437 микрокредит тараты­лып­ты.

Моноқалалардың экономикасын әртараптандыру мақсатында бүгінде 48 «зәкірлі» инвестициялық жоба қол­­ға алынған екен. Оның үштен бі­­рін­дейі ендігі іске қосылыпты. Алай­­да сол жаңа кәсіпорындардың өнім­дерін қазіргідей дағдарысты ке­зеңде қайда өткізу жайы жіті пы­сық­талмаған көрінеді. Осыған қа­рап, Мәжіліс депутаты, «Нұр Отан» фрак­циясының мүшесі Серікжан Қа­­наев бұл жобалардың «зәкір» емес, тұсауға айналып кетуінен сақ­тан­дырды.

Қалаулы тағы бір мәселеге назар аудартты: «Мен арнайы талдау жа­садым. Соңғы 2 жылда 23 моноқа­ла­ның әкімі ауысыпты. Соның ішін­де 7 қалада әкімдер үш рет ал­ма­сып үлгерді. Ал Арқалық, Сәт­баев, Жезқазғанда әкімдер тіпті 4 рет өзгерген! Осыдан кейін бағ­дар­ла­маның орындалуын кім бақы­лай­ды?» Әрине, өз еркімен кетпейді. Қа­ла шаруашылығын дөңгелентіп әке­те алмағандықтан, қызметінен бо­са­тылады. Әйтпесе, шаһарының шаруасы шатқаяқтаса да, әкімқара­ла­рының алатын айлығы жақсы екен. Қалаулылар сұраған соң, Қа­ра­ғанды облысы әкімінің орынба­са­ры А.Дүйсебаев өздерінің «ай сайын жарты миллион теңге жалақы ала­тын­дарын» айтты. Арқалықтың бір әкімі тестілеу кезінде жалғыз балы жет­пей, лауазымымен қош айтысуы­на тура келген деседі.

Инвестициялар және даму вице-ми­нистрі Альберт Рау Арқалықтың тағ­дырына алаңдаушылық білдірді: «Ең күрделі жағдай Арқалықта. Он­да 8 жылға жетер боксит қалды. Со­­дан кейін ENRC компаниясы кету­ге әзірленуде. Басқа ешқандай ва­рианттар жоқ. Оның айналасын­да­ғы жердің бәрінде біз барлау жүр­гіздік, бірақ қызықты ештеңе тап­падық. Жалғыз бір нысан бар: 100 ша­қырым қашықтықта, Есіл түбінде мил­лиард тонна темір кені анық­тал­ды. Қазір оны «Таукен-Самұрық» ұлт­тық компаниясы қолға алуда, ол бок­сит өндірісінен босайтын 1,5 мың жұмысшыны темір өндірісіне бейім­деуі қажет. Басқа балама жоқ!» деді А.Рау.

Біздің Telegram-парақшамызда Қазақстанның маңызды жаңалықтары. Жазылыңыздар!