BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
Астана:

KFC өнімдері ҚМДБ берген халал сертификатынан айырылды

Астана, BAQ.KZ. ҚМДБ халал стандарттау бөлімінің баспасөз қызметі «The Caspian International Restaurants Company» ЖШС-на қарасты «КФС» ресторандар желісіне берілген «ҚМДБ халал» сертификаты өз күшін жойғандығын хабарлады.

"Естеріңізге сала кетсек, бұған дейін «КФС» ресторандар желісі Ресей Федерациясына қарасты халал стандарт талаптарына сай өндірілетін, ҚМДБ «Халал Даму» ЖШС арнайы оқытылған қасапшылары тек қана қолмен бауыздап, бірнеше аусыммен жұмыс істеген, «өлексе жеммен (мясокостная мука) қоректендірілмеген» «Белая птица» құс өнімдерін пайдаланып келді. Алайда, РФ тарапынан туындаған заңдық шектеулерге байланысты «КФС» ресторандар желісіне тасымалданатын «Белая птица» тауық өнімдерінің көлемі азайғандықтан, «КФС» мекемесі басшылығы «Белая птица» құс өнімдерімен қатар, ҚМДБ халал стандарты талаптарына сәйкес келмейтін басқа да бірнеше «Құс фабрикаларының» тауық өнімдерін қолданып жатыр" - делінген хабарламада.

Қазіргі таңда «КФС» мекемесі қолданып жатқан «Белая птицадан» басқа тауық өнімдері ҚМДБ “Халал Даму» ЖШС «Мал бауыздау және ет өңдеу халал стандарты» 1:2016 және «Халал өнімдерін тасымалдау мен сатуға, сақтауға, өңдеуге, дайындауға, өндіруге жалпы талаптар» 3: 2016 стандарттары талаптарына сәйкес келмейді.

"Сол себепті, ҚМДБ «Халал Даму» ЖШС мен «The Caspian International Restaurants Company» ЖШС арасындағы келісімшарттың уақытша тоқтағандығын, «КФС» ресторандар желісінің тауық өнімдері толығымен «ҚМДБ халал стандарт» талаптарына сәйкес келмейінше, мекемеге берілген «ҚМДБ Халал» сертификаты мен «КФС» өнімдерінің сыртқы қаптамаларындағы «ҚМДБ халал» таңбасының өз күшін жойғандығын хабарлаймыз" - дейді ҚМДБ қызметкерлері.

BAQ.KZ тілшісі хабарласқан - KFC сауда белгісінің Қазақстандағы иесі «The Caspian International Restaurants Company» ЖШС өкілі жақын арада жауап беретіндерін айтты.


Біздің Telegram-парақшамызда Қазақстанның маңызды жаңалықтары. Жазылыңыздар!

Ұқсас сілтемелер:
Пікірлер