ۇستازدار «پەداگوگتار مارتەبەسىن انىقتاۋ» تۋرالى زاڭدى قابىلداۋ ۇسىنىسىنا قاتتى قۋاندى – سەناتور

فوتو: Нұржас Жақсыбай

پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن باقىلاۋ جونىندەگى قوعامدىق كەڭەس ٴتوراعاسى، ۇلتتىق ينجەنەرلىك اكادەميا پرەزيدەنتى، قر پارلامەنت سەناتىنىڭ دەپۋتاتى باقىتجان جۇماعۇلوۆ نۇرسۇلتان نازاربايەۆتىڭ 5 قازانداعى جولداۋىندا «پەداگوگتار مارتەبەسى» تۋرالى زاڭدى قابىلداۋ باستاماسىن ۇستازدار قاۋىمى قالاي قابىلداعانىن ايتتى، دەپ حابارلايدى baq.kz ٴتىلشىسى.

«ەلباسىنىڭ كەشەگى ايتقان جولداۋىندا ٴبىلىم، عىلىم، مەديسينا سالاسىنا 5 جىلدىڭ ىشىندە ٴجىو-نىڭ 10 پايىزعا دەيىنگى قاراجاتتى ٴبولۋ تۋرالى تاپسىرماسى عالىم رەتىندە ەرەكشە قۋانتتى. سوڭعى 15-20 جىلدا عالىمدار وسى ماسەلەنى كوتەرىپ كەلە جاتىر. ٴقازىر ٴبىزدىڭ عىلىمنىڭ قارجىلاندىرىلۋى – 0،13 پايىز عانا. جاقىندا عانا سەناتتا وتكەن قازاقستاننىڭ بارلىق عالىمدارى جينالعان ۇلكەن دوڭگەلەك ۇستەلدە وسى ماسەلە قىزۋ تالقىلانعان ەدى. وسىدان 2-3 كۇن بۇرىن بعم-دا وتكەن فورۋمدا دا وسى ماسەلە تۋرالى كوپ ايتىلدى. كەشەگى ەلباسىنىڭ ويىپ ايتقانى – ٴبىلىم، عىلىم دەپ توقتاپ تۇرىپ، اسىرەسە عىلىمعا دەن قويعانى ٴبىزدى ەرەكشە قۋانتادى. عىلىمعا بولىنەتىن قاراجاتتى ارتتىرماي، ونىڭ ەكونوميكاعا بەرەرى از بولادى دەپ ويلايمىن»، - دەدى سەناتور.

جۇماعۇلوۆ سونىمەن قاتار قوعامداعى ۇستازداردىڭ ورنى تۋرالى ٴسوز قوزعادى.

«كەشە ەلباسى زالدا وتىرعانداردان «نەگە ٴبىزدىڭ بالالارىمىز شەتەلگە كەتىپ جاتىر؟ نەگە بىزدە ناۋقاستار شەتەلدە ەمدەلەدى؟» دەپ سۇرادى. دەگەنمەن، مەملەكەت باسشىسى، ۇكىمەت تاراپىنان ىشىندە بارلىق جابدىقتار، لابوراتوريالار، كومپيۋتەرلەر بار جاقسى مەكتەپتەر سالىنىپ جاتىر. مەديسينا سالاسىنا الەمدە ەشكىمنەن كەم ەمەس قۇرىلعىلار كەلىپ جاتىر. ال ٴبىزدىڭ قوعامدا پەداگوگ پەن دارىگەرلەرگە دەگەن سەنىم جوق. ايتەۋىر، ٴمۇعالىم دەگەندە كوپ ادام ٴبىزدىڭ ۇستازدار شەتەلدەگىدەي ساباق بەرە المايدى دەگەن پىكىردە. مەنىڭ ٴوزىم تالاي ەلدە بولدىم. ٴبىزدىڭ ۇستازدار ەشكىمنەن كەم ەمەس. ەلباسى «پەداگوگتار مارتەبەسى» تۋرالى زاڭدى قابىلداۋ كەرەك دەگەن كەزدە قۋانعانىمنان ورنىمنان تۇرىپ كەتە جازدادىم. ٴبىزدىڭ پەداگوگتارعا قوعامنان ورىن بەرىلىپ، جالاقىسىن دۇرىستاپ، ٴوزىنىڭ قىزمەتىنەن تىس جۇمىستارعا جۇمساۋعا بولمايتىنىن ەستىگەندە قۋاندىق. ۇستازدار كۇنى الدىندا ەلباسىنىڭ وسى ۇسىنىسىن ۇلكەن قۋانىشپەن قابىلدادىق»، - دەدى جۇماعۇلوۆ.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!