سوڭعى ٴۇش جىلدا جەمقورلىق ٴۇشىن 2،5 مىڭنان استام ادام سوتتالدى – نۇرسۇلتان نازاربايەۆ - جولداۋ|10 قاڭتار 2018، 09:35
كۋرسى ۆاليۋت وبنوۆليايۋتسيا
استانا:

سوڭعى ٴۇش جىلدا جەمقورلىق ٴۇشىن 2،5 مىڭنان استام ادام سوتتالدى – نۇرسۇلتان نازاربايەۆ

فوتو: Forbes.kz

قر پرەزيدەنتى نۇرسۇلتان نازاربايەۆ قازاقستان حالقىنا ارنالعان جىل سايىنعى جولداۋىندا جەمقورلىقپەن كۇرەس جانە زاڭنىڭ ۇستەمدىگى نەگىزگى مىندەت ەكەنىن اتاپ ٴوتتى، دەپ حابارلايدى baq.kz ٴتىلشىسى.

«جەمقورلىقتىڭ الدىن الۋعا باعىتتالعان كۇرەس جالعاسا بەرەدى. كوپ جۇمىس ىستەلىپ جاتىر. سوڭعى 3 جىلدا عانا جوعارى لاۋازىمدى شەنەۋنىكتەر مەن مەملەكەتتىك كومپانيالاردىڭ باسشىلارىن قوسا العاندا، جەمقورلىق ٴۇشىن 2،5 مىڭنان استام ادام سوتتالدى»، - دەدى مەملەكەت باسشىسى.

ەلباسى وسى ۋاقىت ىشىندە ولاردىڭ 17 ميلليارد تەڭگە كولەمىندە كەلتىرگەن زالالى وتەلگەنىن اتاپ ٴوتتى.
سونىمەن بىرگە ول مەملەكەتتىك ورگاندارداعى پروسەستەردى، سونىڭ ىشىندە ولاردىڭ حالىقپەن جانە بيزنەسپەن قارىم-قاتىناسىن سيفرلاندىرۋ ماڭىزدى ەكەنىن ايتتى.

«اتاپ ايتقاندا، ازاماتتار ٴوز وتىنىشتەرىنىڭ قالاي قاراستىرىلىپ جاتقانىن كورىپ، دەر كەزىندە ساپالى جاۋاپ الۋعا ٴتيىس. سوت جانە قۇقىق قورعاۋ جۇيەلەرىن ينستيتۋسيونالدى تۇرعىدان وزگەرتۋ جۇزەگە اسىرىلۋدا. زاڭناماعا قىلمىستىق پروسەستەگى ازاماتتاردىڭ قۇقىقتارىن قورعاۋ ٴىسىن كۇشەيتۋدى، ونىڭ اسىرە قاتاڭدىعىن باسەڭدەتۋدى كوزدەيتىن نورمالار ەنگىزىلدى. ادۆوكاتتاردىڭ قۇقىقتارى مەن سوتقا دەيىنگى ساتىداعى سوت باقىلاۋىنىڭ اياسى كەڭەيدى. قۇقىق قورعاۋ ورگاندارىنىڭ وكىلەتتىگى مەن جاۋاپكەرشىلىك شەگى ايقىندالدى»، - دەلىنگەن قر پرەزيدەنتىنىڭ قازاقستان حالقىنا جولداۋدا.

مەملەكەت باسشىسى ازاماتتاردىڭ كونستيتۋسيالىق قۇقىقتارىنا كەپىلدىكتى نىعايتۋ، قۇقىق ۇستەمدىگىن قامتاماسىز ەتۋ، قۇقىق قورعاۋ قىزمەتىن ىزگىلەندىرۋ جۇمىستارىن جالعاستىرۋدى تاپسىردى.

«قوعامدىق ٴتارتىپتى ساقتاۋ جانە قاۋىپسىزدىكتى قامتاماسىز ەتۋ سالاسىندا كوشەلەردە جانە ادام كوپ جينالاتىن قوعامدىق ورىنداردا بەينەباقىلاۋ جۇرگىزەتىن، ازاماتتاردى انىقتايتىن جانە جول قوزعالىسىن قاداعالايتىن ينتەللەكتۋالدى جۇيەلەردى بەلسەندى تۇردە ەنگىزۋ كەرەك»، - دەلىنگەن جولداۋدا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي