BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ازات پەرۋاشەۆ: ىشكى نارىقتى وتاندىق تاۋارمەن تولىقتىرۋ – ەكونوميكا مەن حالىق ٴۇشىن ٴتيىمدى تاپسىرما

ٴماجىلىس دەپۋتاتى ازات پەرۋاشەۆ قازاقستان پرەزيدەنتى نۇرسۇلتان نازاربايەۆتىڭ قازان جولداۋىنا قاتىستى پىكىرىمەن ٴبولىستى. دەپۋتاتتىڭ ايتۋىنشا، جولداۋدا ايتىلعان ىشكى نارىقتى وتاندىق تاۋارمەن تولىقتىرۋ تاپسىرماسى ەكونوميكا مەن حالىق ٴۇشىن وتە ٴتيىمدى، دەپ حابارلايدى baq.kz ٴتىلشىسى.

«الەمدەگى شيەلەنىس جاعدايلارىندا ەلباسى ەكونوميكامىزدىڭ ەڭ باستى ماقساتى، ەڭ باستى مىندەتى – قاراپايىم حالىقتىڭ جاعدايىن جاقسارتۋ ەكەنىن ايتتى. وسىلايشا، تومەنگى جالاقىنى 1،5 ەسە كوتەرۋ، «بيزنەستىڭ جول كارتاسىن» تاعى 5 جىل قوسىمشا جالعاستىرۋ، ىشكى نارىعىمىزدى ٴوزىمىز شىعاراتىن وتاندىق تاۋارمەن تولىقتىرۋ دەگەن باستامالاردى كوتەردى. بۇل راسىندا دا ٴبىزدىڭ ەكونوميكا مەن حالىق ٴۇشىن وتە ٴتيىمدى تاپسىرمالار. بۇل تاپسىرمالار ەلىمىزدىڭ دامۋىنا ەرەكشە سەرپىن بەرەدى دەپ سەنەمىن»، - دەدى پەرۋاشەۆ بەرگەن سۇحباتىندا.

ماجىلىسمەننىڭ ايتۋىنشا، ەلباسى جولداۋدا كاسىپكەرلەردى قولداۋ بويىنشا ماڭىزدى مىندەتتەر قويدى.

«بىرىنشىدەن، «بيزنەستىڭ جول كارتاسىن» ٴارى قاراي جالعاستىرۋ مىندەتى قويىلدى. سەبەبى قازىرگى كەزدە ۇكىمەت جالپى بيزنەسكە ارنالعان قانشا باعدارلاما ەنگىزسە دە، ولاردىڭ ىشىندەگى ەڭ مىقتىسى، بيزنەسكە ەڭ ٴتيىمدىسى بولعان وسى – «بيزنەستىڭ جول كارتاسى». ٴبىراق، بۇل باعدارلاما 2020 جىلعا دەيىن عانا جوسپارلانعان بولاتىن. ال ەلباسىمىز ونى ٴارى قاراي تاعى 5 جىلعا جالعاستىرۋ تاپسىرماسىن بەردى. بۇل ٴبىزدىڭ كاسىپكەرلەر ٴۇشىن وتە قۋانىشتى جاڭالىق. سەبەبى بۇعان دەيىن كوپتەگەن كاسىپكەر بۇل باعدارلامانى كەڭەيتۋ، ونى ٴارى قاراي جالعاستىرۋ جونىندە وتىنىشتەردى وزىمە تۇسىرگەن بولاتىن»، - دەدى ازات پەرۋاشەۆ.

ٴماجىلىس دەپۋتاتىنىڭ ايتۋىنشا، ەكىنشى ماسەلە - بۇل ٴوزىمىزدىڭ تۇتىنۋشىلارعا ارنالعان تاۋارلاردى شىعارۋ.

«ٴبىز ەكسپورتتىق ستراتەگيامەن اينالىسقاننان كەيىن شىنىن ايتساق، ىشكى نارىعىمىزدى ۇمىتىپ كەتتىك. ەلباسى ٴوزى «ەگەر ٴقازىر ٴارقايسىمىزدىڭ ۇستىمىزدەگى يمپورتتىق تاۋارلاردى شەشسەك، جالاڭاش بولىپ قالامىز» دەپ ايتتى عوي. سەبەبى، كيىمنەن باستاپ، اياق كيىم، كوستيۋمدەرىمىز بولسىن، جەيتىن تاماعىمىزعا دەيىن، 90 پايىزى - يمپورتتالعان تاۋارلار. ولاردى شىعارۋ ٴۇشىن اسا ٴبىر ەرەكشە تەحنولوگيا، اسا ٴبىر ٴىرى ينۆەستيسيا قاجەت ەمەس. ولار - قاتارداعى تاۋارلار. ونى ٴوزىمىز دە قامتۋىمىز كەرەك. سوندىقتان بۇل باعىتقا ۇكىمەتتىڭ، بانكتەردىڭ نازارى بولسا، قاراجات بولىنسە، ارينە ٴبىز ٴوز تۇتىنۋشىلارىمىزدى، ٴوز ەلىمىزدى وتاندىق تاۋارمەن قامتۋعا قابىلەتتىمىز دەگەن سەنىمدەمىن»، - دەپ پىكىرىن ٴبىلدىردى ازات پەرۋاشەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي