BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قاسىموۆ قىزىلوردالىقتارعا ەلباسى جولداۋىنداعى باسىمدىقتاردى ٴتۇسىندىردى

فوتو: ҚР ІІМ

قىزىلوردا، baq.kz ٴتىلشىسى. قىزىلورداعا ەلباسىنىڭ «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋىنداعى باسىم باعىتتاردى ٴتۇسىندىرۋ ماقساتىندا قازاقستان رەسپۋبليكاسىنىڭ ىشكى ىستەر ٴمينيسترى قالمۇحانبەت قاسىموۆ باستاعان رەسپۋبليكالىق اقپاراتتىق توپ وكىلدەرى كەلىپ، جيىن وتكىزدى. باسقوسۋعا وبلىس اكىمى قىرىمبەك كوشەربايەۆ تا قاتىستى.

"وسى جىلدىڭ 5 قازانىندا ەلباسى نۇرسۇلتان ٴابىش ۇلى نازاربايەۆ قازاقستان حالقىنا كەزەكتى جولداۋىن جاريالادى. مەملەكەت باسشىسى قاي كەزدە دە قازاقستاندىقتاردى الەۋمەتتىك تۇرعىدان قولداۋدى باستى نازاردا ۇستايدى. بۇل جولعى جولداۋدا الەۋمەتتىك-ەكونوميكالىق دامۋدىڭ ماڭىزدى باسىمدىقتارىن جاڭعىرتىپ، جانداندىرۋ اسا قاجەت ەكەنىن باسا ايتىلىپ، ەل دامۋىنا تىڭ سەرپىن بەرەتىن باعىت-باعدارلاردىڭ جاڭا كەزەڭىن ۇسىندى. ول ەلىمىزدىڭ الەۋمەتتىك-ەكونوميكالىق دامۋىنىڭ يننوۆاسيالىق وزەگىنە اينالىپ، باسەكەلەستىك قابىلەتىن ارتتىرا ٴتۇسۋى ٴتيىس. سونداي-اق، بۇعان دەيىن قابىلدانعان مەملەكەتتىك باعدارلامالاردىڭ جالعاسى رەتىندە جۇيەلى جۇمىستار مەن تىڭ رەفورمالار قامتىلدى"،– دەپ اتاپ ٴوتتى وبلىس اكىمى.

جيىندا اقپاراتتىق توپ جەتەكشىسى قر ىشكى ىستەر ٴمينيسترى قالمۇحانبەت قاسىموۆ ٴسوز الىپ، جولداۋدىڭ ەرەكشەلىكتەرى مەن باسىم باعىتتارى تۋرالى ايتتى جانە قۇقىق قورعاۋ سالاسىنا قاتىستى نەگىزگى مىندەتتەرگە توقتالدى.

"جولداۋدا مەملەكەت باسشىسى قۇقىق قورعاۋ ورگاندارىنىڭ جۇمىسىنا تەرەڭ ٴارى ساپالى وزگەرىستەر قاجەتتىگىن ناقتى ايتىپ، كوپتەگەن مىندەت جۇكتەدى. وسىعان وراي «ىشكى ىستەر ورگاندارىن جاڭعىرتۋ جونىندەگى جول كارتاسىن» قابىلداۋدى جانە رەفورمالاردىڭ 2019 جىلدىڭ 1 قاڭتارىنان باستاپ جۇزەگە اسىرىلۋىن تاپسىردى. بۇل ورايدا بىرىنشىدەن، ىشكى ىستەر مينيسترلىگىنىڭ شتاتتىق سانىن وڭتايلاندىرىپ، پوليسيانى وزىنە تيەسىلى ەمەس فۋنكسيالاردان ارىلتۋ قاجەتتىگى، ەكىنشىدەن، پوليسيا قىزمەتكەرىنىڭ جاڭا ستاندارتىن بەكىتىپ، مانساپتىق ىلگەرىلەۋ، سونىمەن بىرگە، پوليسيا اكادەميالارى ارقىلى كادرلاردى دايارلاۋ مەن ىرىكتەۋ جۇيەسىن وزگەرتۋ، ۇشىنشىدەن، حالىقپەن جۇمىس ىستەۋدىڭ جاڭا زاماناۋي فورماتتارىن ەنگىزىپ، پوليسيانى باعالاۋدىڭ كريتەرييلەرىن تۇبەگەيلى وزگەرتۋ تاپسىرىلدى"،– دەدى قر ىشكى ىستەر ٴمينيسترى.

ٴمينيستردىڭ مالىمدەۋىنشە، فۋنكسيانالدىق قىزمەتتەرىن ناقتىلاۋ، وزدەرىنە ٴتيىستى ەمەس قىزمەتتەن بوساتۋ ماقساتىندا ٴبىرقاتار قىزمەتتەر ٴتيىستى سالالارعا بەرىلسە، كەيبىر باسشىلىق قىزمەتتەر قىسقارتىلىپ، ۇنەمدەلگەن قارجىنى پوليسەيلەردىڭ جالاقىسىن كوبەيتۋگە، ولاردىڭ تۇرعىن ٴۇي جانە وزگە دە الەۋمەتتىك ماسەلەلەرىن شەشۋگە جۇمساۋ جانە پوليسيا جۇمىسىن سەرۆيستىك مودەلگە كوشىرۋ كوزدەلۋدە. ازاماتتاردى قابىلداۋ ٴۇشىن ارنايى كەڭسەلەر اشىپ، قولايلى جاعداي جاساۋ دا جوسپاردا بار.

ايتا كەتەيىك، رەسپۋبليكالىق اقپاراتتىق توپ قۇرامىندا قر ۇلتتىق ەكونوميكا ۆيسە-مينيسترى اسەت ەرعاليەۆ، قر دەنساۋلىق ساقتاۋ ۆيسە-مينيسترى ٴلاززات اقتايەۆا، قر ٴبىلىم جانە عىلىم ۆيسە-مينيسترى اسحات ايماعامبەتوۆ جانە باسقا دا مينيسترلىكتەردىڭ كوميتەت ٴتوراعالارى بار. ولار دا ٴوز سالالارىنداعى جولداۋدا ايتىلعان باسىمدىقتار تۋرالى باياندادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي