استانا: 
بۇگىن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قازاقستان حالقىنا ٴداستۇرلى جولداۋىن جاسادى. ەل پرەزيدەنتى جولداۋىنا وراي تانىمال ساياساتتانۋشى ەرلان سايروۆ ٴوز پايىمداۋىن ورتاعا سالدى، دەپ حابارلايدى baq.kz اقپارات اگەنتتىگى.
«ٴتورتىنشى ونەركاسىپتىك رەۆوليۋسيا جاعدايىنداعى دامۋدىڭ جاڭا مۇمكىندىكتەرى» دەپ اتالاتىن جولداۋدا ەلباسى الەمنىڭ دامىعان ەلدەرىنىڭ قاتارىنا قوسىلۋ ٴۇشىن قازاق ەلى اتقارۋعا ٴتيىس 10 مىندەتتى ناقتىلاپ بەردى. وسىعان وراي ساياساتتانۋشى جولداۋداعى باستى ماڭىزدى باسىمدىققا توقتالدى.
«ەلباسى ٴداستۇرلى تۇردە قازاقستان حالقىنا جولداۋىن ارنادى. جولداۋداعى ماسەلەلەردىڭ بارلىعى وزەكتى جانە ٴماندى. دەگەنمەن دە، جولداۋداعى ادام كاپيتالىن دامىتۋ ماسەلەسىن ايرىقشا ايتىپ وتكەن ٴجون. قانداي دا بولسىن ەل دامۋى بەلەستەرىن جۇزەگە اسىرۋ ٴۇشىن ادام كاپيتالىن دامىتۋ وتە ماڭىزىدى. سوندىقتان، ادام كاپيتالىن دامىتۋ بيلىكتىڭ «كۇن تارتىبىنە» ەنۋى نەگىزگى قادام دەپ بىلەمىن»، - دەيدى ەرلان سايروۆ.
ونىڭ ايتۋىنا قاراعاندا جولداۋدا ايتىلعان الەۋمەتتىك ماسەلەلەر، اسىرەسە ۇستازدار جالاقىسىن كوتەرۋ ماسەلەسى ەلىمىزدىڭ ٴبىلىم سالاسىنىڭ ىلگەرىلەۋىنە جاسالىپ وتىرعان شەشۋشى قادام.
«مۇعالىمدەردىڭ ەڭبەكاقىسىن 30 پايىزعا ارتتىرۋ، ەلىمىزدەگى ينتەللەكتۋالدى، ساندىق تەحنولوگيالارعا ەنۋدىڭ العىشارتى دەر ەدىم. بۇگىندە ەلىمىزدە 800 000 مىڭعا جۋىق ۇستاز ەڭبەك ەتەدى. ولاردىڭ جالاقىسىن ٴوسىرۋ – تەك ماتەريالدىق ەمەس، اعارتۋشىلىق ميسسياسىن ورىنداۋداعى ناقتى قادام بولۋى ىقتيمال» - دەيدى ساياساتتانۋشى.
سونىمەن قاتار ساياساتتانۋشى سيفرلىق داۋىرگە بەيىمدەلۋ بارىسىندا ەلىمىزدىڭ ەسكەرۋى ٴتيىس تاعى ٴبىر تيىمدىلىكتى اتاپ ٴوتتى.
«تاعى ٴبىر ماسەلەگە ەرەكشە توقتالۋ قاجەت ٴتارىزدى. الەمدە جانە ٴبىزدىڭ ەلدە حالىقتىڭ ٴال-اۋقاتىن دامىتۋدىڭ نەگىزگى يندەكسى رەتىندە جالپى ۇلتتىق ٴونىم دەگەن يندەكس الىنادى. ال ول ولشەم ٴوز كەزەگىندە، بۇكىل حالىقتىڭ جاعدايىن انىقتاي المايدى. سوندىقتان، ٴبىزدىڭ ەلىمىزدە، ازاماتتاردىڭ الەۋەتىن انىقتايتىن ۇلتتىق ينديكاتور قاجەت ٴتارىزدى»، - دەيدى ەرلان سايروۆ.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1737 
0
ەرجان جاۋباي 
3332
0