ەلباسىمىز يدەولوگيادا تۇبەگەيلى بەتبۇرىسقا كوشەتىن مەزگىلدىڭ جەتكەنىن اڭعارتتى - ولكەتانۋشى - جولداۋ|06 قازان 2018، 11:43
كۋرسى ۆاليۋت وبنوۆليايۋتسيا
استانا:

ەلباسىمىز يدەولوگيادا تۇبەگەيلى بەتبۇرىسقا كوشەتىن مەزگىلدىڭ جەتكەنىن اڭعارتتى - ولكەتانۋشى

كۇنى كەشە ەلباسى جاريالاعان «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋى حالىق اراسىندا قىزۋ تالقىعا ٴتۇسىپ، تاريحي قۇجاتتىڭ ٴاربىر باعىتى جايلى جەر-جەرلەردە پىكىرلەرىن ايتىلۋدا. قاراعاندى وبلىسى اقتوعاي اۋدانىنىڭ تۋماسى، ولكەتانۋشى، تۇڭعىشباي مۇقان ٴوز ويىن ايتتى، دەپ حابارلايدى baq.kz اگەنتتىگىنىڭ ايماقتاعى ٴتىلشىسى.

جۇرەگى اۋىل دەپ سوعاتىن، كوكىرەگى شەجىرەگە تولى اقساقال ەلباسىنىڭ حالىققا ارناعان جولداۋىن ەرەكشە ىقىلاسپەن تىڭداپ، قۋانا قابىلداعاندىعىن ايتادى. اسىرەسە مەملەكەت باسشىسىنىڭ «اۋىل – ەل بەسىگى» جوباسىن جۇزەگە اسىرۋ قاجەتتىگى جايلى ايتقان ويىن قولداپ، وسى باعىتتا جۇمىستاردىڭ جاسالۋى بولاشاق ۇرپاق ٴۇشىن رۋحاني ٴنار بولاتىندىعىنا سەنىم ٴبىلدىردى.

«ەلباسىمىز ن.ٴا.نازاربايەۆ ٴوزىنىڭ بيىلعى جولداۋىندا «اۋىل ەلدىكتىڭ بەسىگى» دەپ، مىناۋ جاھاندانۋ زامانىنىڭ الماعايىپ توعىسىندا قازاق ۇلتىنىڭ بارلىق نىشاندارى اۋىلداردا عانا تازا، تۇنىق قالپىندا ساقتالعاندىعىنا ايرىقشا نازار اۋدارىپ، باعدارلاماعا ەنگىزۋ ٴۇشىن باسىمدىق بەرىپ وتىر. الەم ەلدەرىندەگى وركەنيەتتى ٴوز دەگەنىنە باعىندىرىپ كەلە جاتقان زاماناۋي اعىمداعى ۇردىستەردىڭ ەكپىندى ىقپالى قالالارمەن قاتار اۋىلداردى دا شارپىپ، ۋىسىندا ۇستايتىندىعى كۇن ساناپ ايقىن اڭعارىلا تۇسۋدە. الايدا ۇلتىمىزدىڭ قانىنا ٴسىڭىپ، انتىنا اينالعان سالت-داستۇرلەرى مەن رۋحاني قۇندىلىقتارىنىڭ ٴتۇپ نۇسقاسىنىڭ سول قالپىندا ساقتالىپ، كۇرە تامىرلارىنىڭ ۇزىلمەيتىن جەرى – تۇڭلىگىنەن تۇتىندەرى ٴتۇزۋ ۇشاتىن، عۇرىپتىق اسىل مۇرالارى ەركىن قولدانىسقا ەنەتىن، انا ٴتىلى ار-وجدانىنداي باعالاناتىن التىن بەسىك اۋىلدارىمىز»، - دەيدى ولكەتانۋشى.

بۇگىندە زەينەت جاسىنان اسىپ، جەتپىستى القىمداپ قالعان قازىنالى قاريا ٴوزىنىڭ ارداگەرلىك عۇمىرىندا ەل تاريحى، ۇلت مۇراسى جايلى دەرەكتەردى جيناپ، بولاشاق ۇرپاققا ٴتالىم بولسا دەگەن نيەتپەن بىرنەشە دەرەكنامالىق-جىلنامالىق كىتاپتاردى قۇراستىردى. «اۋىلىم رۋحاني قازىنام» دەيتىن اقساقال ەلباسى جولداۋىنداعى ايتىلعانداي اۋىلدىق جەرلەردىڭ الەۋمەتتىك ورتاسىن جاڭعىرتۋعا كىرىسۋ كەزەك كۇتتىرمەيتىن ٴىس دەپ سانايدى.

«اۋىلداعى ٴتورت تۇلىكتىڭ ەتى مەن ٴسۇتى ازىق، ٴجۇنى مەن تەرىسى كيىم. مەرەكەلى ويىن-ساۋىقتىڭ ۇلتتىق ۇلگىسى، ونەر مەن ٴداستۇردىڭ وزىق ونەگەسى اۋىلداردا ٴورىس الادى، اۋىلداردا ۇشتالىپ ساقتالىپ، وركەن جايادى. اۋىل – تامىلجىعان تابيعاتتىڭ جاۋھارى، تاريحىمىزدىڭ قازىناسى. اۋىل – جازيرا دالا، زاڭعار تاۋلار، كاۋسار بۇلاقتار. اۋىل – قۇتتى قونىس، ايرانداي ۇيىعان ىنتىماق پەن بەرەكە، ىرىسى ورتايمايتىن مولشىلىقتىڭ تايقازانى. اۋىل دانا، ابىز بابالارىمىزدىڭ جەر بەسىگى، دارا تۇلعالارىمىزدىڭ اتامەكەنى، ۇلتىمىزدىڭ قاسيەت تۇنعان، باق دارىعان، وت جاققان قارا ورمانى، كۇل توككەن كيەلى مەكەنى. سوندىقتان دا، اۋىل ەلدىكتىڭ التىن بەسىگى، ۇلتتىق يدەولوگيامىزدىڭ تەمىرقازىعى، جارقىن بولاشاعىمىزدىڭ باعدارشامى ەكەندىگىنە ەلباسىمىز ٴوز جولداۋىندا ايرىقشا ماڭىز بەرىپ، تۇيىندەپ قاداپ ايتتى. يدەولوگيادا تۇبەگەيلى بەتبۇرىسقا كوشەتىن مەزگىلدىڭ جەتكەنىن اڭعارتتى»، - دەيدى تۇڭعىشباي مۇقان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي