دەپۋتات: حالىقتىڭ جانىنا باتقان ماسەلە شەشىمىن تاباتىن بولدى - جولداۋ|06 قازان 2018، 16:57
كۋرسى ۆاليۋت وبنوۆليايۋتسيا
استانا:

دەپۋتات: حالىقتىڭ جانىنا باتقان ماسەلە شەشىمىن تاباتىن بولدى

قر پارلامەنتى ٴماجىلىسىنىڭ دەپۋتاتى ساۋىتبەك ابدراحمانوۆ ەلباسى نۇرسۇلتان نازاربايەۆتىڭ قازاقستان حالقىنا ارناعان كەزەكتى جولداۋى ەلدەگى كۇردەلى ماسەلەلەردى شەشۋگە سەرپىن بەرەتىنىن ايتتى، دەپ حابارلايدى baq.kz ٴتىلشىسى.

ونىڭ پىكىرىنشە، ەلباسى جولداۋى ەلىمىزدى جاڭعىرۋدىڭ جاڭا بەلەسىنە شىعارادى.

وسى ورايدا دەپۋتات الەمدە بولىپ جاتقان كۇردەلى ساياسي وزگەرىستەرگە توقتالدى.

«پرەزيدەنت ەلىمىز جاڭا بيىكتەردى باعىندىرۋعا دايىن ەكەنىن ايتتى. بۇل ٴاربىر قازاقستاندىقتىڭ، ٴاربىر قازاقتىڭ ەسىندە جۇرەتىن ٴسوز. الىمىزدا جاڭا بيىكتەردى باعىندىرۋ مىندەتى تۇر. بۇل – قيىن جانە كۇردەلى مىندەتتەر. الەم وزگەرۋدە. وكىنىشكە قاراي، الەم ورىنسىز ساياسيلانىپ بارادى. ساياسات ەكونوميكاعا ارالاسۋدا. سالدارىنان ەكونوميكاعا تىكەلەي اسەر ەتەتىن، ىقپال ەتەتىن فاكتورلار كوبەيۋدە. سوندىقتان ەلباسى قازاقستاننىڭ ەكونوميكاسىن جانە حالىقتىڭ ٴال-اۋقاتىن جاڭا ساتىعا كوتەرۋ ٴۇشىن ناقتى ۇسىنىستاردى ەنگىزدى»، - دەدى ساۋىتبەك ابدراحمانوۆ استانادا وتكەن «پرەزيدەنت جولداۋىنداعى مىندەتتەردى ىسكە اسىرۋداعى قازاقستان حالقى اسسامبلەياسىنىڭ ورنى مەن ٴرولى» اتتى قحا كەڭەسىنىڭ كەڭەيتىلگەن وتىرىسىنىڭ كۋلۋارىندا.

سونداي-اق دەپۋتات جولداۋ اياسىندا حالىقتىڭ جانىن اۋىرتىپ جۇرگەن ماسەلەلەردىڭ ٴبىرى شەشىلەتىنىن اتاپ ٴوتتى.

«اتاپ ايتقاندا، تۇرمىسى تومەن ادامداردىڭ ٴال-اۋقاتىن ارتتىرۋ جونىندە ەڭ تومەنگى جالاقىنى 1،5 ەسەگە ٴوسىرۋ، بيۋدجەت مەكەمەلەرى قىزمەتكەرلەرىنىڭ جالاقىسىن 35%-كە ٴوسىرۋ سياقتى ناقتى قادامدا جاسالعالى وتىر. جۇرتتىڭ بارلىعى ايتاتىن، جۇرتتىڭ جانىن اۋىرتاتىن ۇلكەن ٴبىر ماسەلە شەشىمىن تابادى دەپ وتىرمىز. ول – ٴمۇعالىمنىڭ بەدەلى مەن مارتەبەسى. وكىنىشكە قاراي وبەكتيۆتى جانە سۋبەكتيۆتى پىكىرلەرگە بايلانىستى مۇعالىمدەردىڭ مارتەبەسى تومەندەتىلدى. اۋىلدىق جەرلەردە كەز كەلگەن شارۋاعا الدىمەن ٴمۇعالىمدى جەگەتىن جاعداي قالىپتاستى»، - دەدى ول.

ساۋىتبەك ابدراحمانوۆتىڭ پىكىرىنشە، ەلىمىزدە پەداگوگ مارتەبەسى تۋرالى زاڭ قابىلدانسا، ٴمۇعالىمنىڭ بەدەلى كوتەرىلەتىنىنە سەنىمدى ەكەنىن جەتكىزدى.

سونىمەن قاتار ول جولداۋدا حالىقتى تۇرعىن-ۇيمەن قامتاماسىز ەتۋ ماسەلەسى دە قارالعانىن ٴمالىم ەتتى.

«7-20-25» باعدارلاماسىن جۇزەگە اسىرۋدىڭ ناقتى تەتىكتەرىن تابۋعا بايلانىستى اڭگىمە قاتتى ايتىلدى. اتاپ ايتقاندا، استانا قالاسىنىڭ تاجىريبەسى بويىنشا مۇمكىندىگى تومەن ادامدارعا العاشقى ۇلەستىك اقشانى تابۋعا كاسىپورىننىڭ، مەكەمەنىڭ تاراپىنان كومەكتەسۋ سياقتى ۇسىنىستار ايتىلدى. ٴبىراق، سسۋدا تۇرىندە تەگىن ەمەس. ەڭ باستىسى ازاماتتىڭ ٴۇي الۋعا دەگەن مۇمكىندىگىن ارتتىرۋ. كەيىن ول 25 جىل بويى ٴوزىنىڭ 7%-تىك قارجىسىن تولەي بەرەدى»، - دەدى دەپۋتات.

ٴسوز سوڭىندا ول مەملەكەت باسشىسى جولداۋدى ۋاقىتىندا جاريالاعانىن قۋانىشپەن جەتكىزدى.

«جولداۋدىڭ مەرزىمىنە بايلانىستى دا قولداۋ بىلدىرگىم كەلەدى. ويتكەنى، وسىعان دەيىن جولداۋ جىلدىڭ باسىندا جاريالاناتىن. ٴبىز وعان ۇيرەنىپ قالدىق. كەيدە ٴتىپتى ناۋرىز ايىندا جولداۋ جاريالاناتىن. ونداي جاعدايدا ٴبىر جىلدىڭ ىشىندە اتقارىلاتىن جۇمىستى ناۋرىزدان باستاۋ نەمەسە تاپسىرمالاردى قاڭتاردان الۋ ونشالىقتى ٴتيىمدى ەمەس. بيىل جولداۋ قازان ايىنىڭ باسىندا جاريالاندى. مەجەلەر بەلگىلەندى. ٴتىپتى، ارناۋلى زاڭ قاجەت بولسا، قازان، قاراشا، جەلتوقسان ايلارىندا ول زاڭداردى قابىلداي دا الامىز. بيۋدجەتكە وزگەرىس ەنگىزە مۇمكىندىك بار. بۇل وتە ىڭعايلى. الداعى كەزدەردە وسىنداي مەرزىم، وسىنداي فورمات ساقتالسا دەگەن تىلەگىمدى ايتقىم كەلەدى»، - دەپ تۇيىندەدى ٴسوزىن ساۋىتبەك ابدراحمانوۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي