بەيسەن تاجىبايەۆ: جولداۋداعى ماقسات-مىندەتتەردى ىسكە اسىرۋدا ازاماتتىق قوعام وكىلدەرىنە ۇلكەن سەنىم ارتىلادى - جولداۋ|07 قازان 2018، 13:37
كۋرسى ۆاليۋت وبنوۆليايۋتسيا
استانا:

بەيسەن تاجىبايەۆ: جولداۋداعى ماقسات-مىندەتتەردى ىسكە اسىرۋدا ازاماتتىق قوعام وكىلدەرىنە ۇلكەن سەنىم ارتىلادى

تۇركىستان وبلىستىق ىشكى ساياسات باسقارماسى مەن «تۇركىستان وبلىسى ازاماتتىق اليانسىنىڭ» ۇيىمداستىرۋىمەن ۇكىمەتتىك ەمەس ۇيىم وكىلدەرىمەن كەزدەسۋ ٴوتتى.

ەلباسى نۇرسۇلتان نازاربايەۆتىڭ «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋىنداعى مىندەتتەردى جۇزەگە اسىرۋ جولى تالقىلانعان جيىنعا وڭىردەگى 30-عا جۋىق بەلسەندى ۇكىمەتتىك ەمەس ۇيىم وكىلدەرى قاتىستى.

جيىندى اشىپ جۇرگىزگەن وبلىستىق ىشكى ساياسات باسقارماسىنىڭ باسشىسى بەيسەنباي تاجىبايەۆ ەلباسىنىڭ بيىلعى جولداۋىنىڭ ماڭىزدىلىعىنا توقتالدى.

«ەلباسى ن.ٴا.نازاربايەۆ قازاقستان حالقىنا ارناعان جولداۋىندا حالىق تابىسىن ٴوسىرۋ، تۇرمىس ساپاسىن ارتتىرۋ، ٴومىر سۇرۋگە جايلى ورتا قالىپتاستىرۋ باعىتىندا جوسپارلارىن ايتىپ، بيلىك تارماقتارىنا ەلمەن ەتەنە جۇمىس ىستەۋدى تاپسىردى. جولداۋدا ايتىلعان ماقسات-مىندەتتەردى ىسكە اسىرۋدا ازاماتتىق قوعام وكىلدەرىنە ۇلكەن سەنىم ارتىلادى. سوندىقتان، بۇگىن ٴبىز سىزدەردىڭ وي-پىكىرلەرىڭىزدى ەستىپ، بىرلەسىپ جۇمىس ىستەۋ جونىندە تۇركىستاندا ٴبىرىنشى رەت باس قوسىپ وتىرمىز. ازاماتتىق قوعامدى دامىتۋدا ۇكىمەتتىك ەمەس ۇيىمداردىڭ قوسار ۇلەسى مول. اسىرەسە، تۇركىستان جاڭا وبلىس ورتالىعىنا اينالعاندىقتان ونىڭ الەۋمەتتىك-مادەني باعىتىن جاڭا دەڭگەيگە كوتەرۋدە سىزدەردەن تىڭ جوبالار كۇتەمىز» - دەدى باسقارما باسشىسى.

«تۇركىستان وبلىسى ازاماتتىق اليانسىنىڭ» ٴتوراعاسى شارىپبەك جامالبەك وڭىردە ۇكىمەتىك ەمەس ۇيىمداردىڭ جۇمىسىن جانداندىرۋ باعىتىنداعى ويلارىن ايتتىپ، قاراشا ايىندا وتەتىن وبلىستىق ازاماتتىق فورۋمعا دايىندىق ماسەلەسىن قوزعادى.

سونىمەن قاتار، «اتالار اماناتى» قوعامدىق بىرلەستىگىنىڭ ٴتوراعاسى مۇرات بەكبايەۆ، «چەرنوبىل وداعى» قوعامدىق بىرلەستىگىنىڭ ٴتوراعاسى باقىتجان اشىربايەۆ، «شاپاعات» مۇگەدەكتەردىڭ قايىرىمدىلىق قورىنىڭ ٴتوراعاسى ەركىنباي شالتان جانە «تۇركىستان قالالىق ۇوس جانە ەڭبەك ارداگەرلەر ۇيىمى» قوعامدىق بىرلەستىگىنىڭ ٴتوراعاسى جارقىنبەك قۇلبايىمبەتوۆ پەن وزگە دە ازاماتتار ٴسوز سويلەپ، كوپتەگەن ماسەلەلەردى ورتاعا سالدى.

اتاپ ايتساق، تۇركىستان قالاسىنداعى الەۋمەتتىك نىسانداردا مۇگەدەكتەرگە ارنالعان پاندۋستاردىڭ جوقتىعى، قوعامدىق بىرلەستىكتەرگە ارنالعان كەڭسەلەردىڭ وتە تاپشى ەكەندىگى ٴسوز بولدى. سونداي-اق، الەۋمەتتىك تاپسىرىستاردى وزگە ٴوڭىردىڭ بىرلەستىكتەرى جەڭىپ كەتەتىنى، مۇگەدەك جانداردىڭ جۇمىسقا ورنالاسۋداعى قيىندىقتارى، ولارعا قولداۋ قاجەت ەكەنى ايتىلدى.

بۇگىندە تۇركىستان وبلىسىندا 738 قوعامدىق بىرلەستىك تىركەلگەن. ونىڭ ىشىندە ٴ577-سى — ۇكىمەتتىك ەمەس ۇيىمدار. وڭىردە ۇەۇ سالاسىندا سۇحبات ۇيىمداستىرۋ شەڭبەرىندە 35 سۇحبات الاڭى جۇمىس ىستەپ تۇر. وبلىستىق جانە 16 اۋداندىق، قالالىق اقپاراتتىق-رەسۋرستىق ورتالىق بار. اكىمدىكتەر جانىنداعى كەڭەستەر مەن كوميسسيالارعا ۇەۇ وكىلدەرى ەنگىزىلگەن. بارلىق دەڭگەيدەگى كەڭەستەر جوسپارعا سايكەس جىلىنا 2 رەت جيىن وتكىزىپ، ٴىس-شارالاردى باعدارلايدى. وبلىستىق باسقارمالار مەن اۋدان، قالا اكىمدىكتەرى جىلىنا 2 رەت ازاماتتىق قوعام ينستيتۋتتارىمەن اتقارعان جۇمىستارى تۋرالى ەسەپ بەرەدى.

وبلىستا ۇكىمەتتىك ەمەس ۇيىمدارمەن مەملەكەتتىك الەۋمەتتىك تاپسىرىس بويىنشا بىرنەشە باسقارما مەن اۋدان، قالا اكىمدىكتەرى جۇمىس اتقارادى. ۇكىمەتتىك ەمەس ۇيىمدارعا ارنالعان الەۋمەتتىك-ماڭىزدى جوبالاردىڭ تاقىرىپتارى مەملەكەتتىك باعدارلامالاردى جۇزەگە اسىرۋعا جانە ٴار سالاداعى وزەكتى ماسەلەلەردىڭ الدىن الۋعا ارنالعان. قازىرگى تاڭدا 72 زاڭدى تۇلعا، ونىڭ ىشىندە 45 ۇكىمەتتىك ەمەس ۇيىم مەن 27 بيزنەس قۇرىلىمى ەنگەن «تۇركىستان وبلىسى ازاماتتىق اليانسى» قاۋىمداستىعىمەن تىعىز بايلانىستا جۇمىس اتقارىلىپ كەلەدى. سونىمەن قاتار، اۋىلدىق جەرلەردەگى ۇكىمەتتىك ەمەس ۇيىمداردىڭ جۇمىسىن شيراتۋ جانە قولداۋ ماقساتىندا وبلىستىڭ بارلىق اۋدان، قالالارىندا اقپاراتتىق ينتەرنەت-رەسۋرستىق ورتالىقتار اشىلعان.

جيىندى قورىتىندىلاعان ب.تاجىبايەۆ ۇەۇ وكىلدەرىنە بەلسەندىلىكتى ارتتىرىپ، ەلباسى جولداۋىندا ايتىلعان مىندەتتەردى بىرلەسىپ اتقارۋعا، تۇركىستاندى كوركەيتۋگە ۇلەس قوسۋعا شاقىردى.

وسى كەزدەسۋدە ايتىلعان ۇسىنىستار مەن وتىنىشتەر حاتتاماعا ەنگىزىلىپ، ٴتيىستى جۇمىستار قولعا الىنادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي