BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تۇرىك اۋدارماشىسى ابايدىڭ 170 جىلدىق مەرەيتويىنا ەرەكشە تارتۋ جاسادى

استانا. 6 تامىز. baq.kz – بۇگىن شاكارىم اتىنداعى سەمەي مەملەكەتتىك ۋنيۆەرسيتەتىندە ابايدىڭ 170 جىلدىق مەرەيتويىنا وراي وتكەن «اباي جانە الەمدىك وركەنيەت» اتتى كونفەرەنسيا كەزىندە اباي ولەڭدەرىنىڭ تۇرىك تىلىنە اۋدارىلعان جيناعى تانىستىرىلدى.

كونفەرەنسيا كەزىندە بايانداما جاساعان قازاقستاننىڭ تۇركياداعى ەلشىسىنىڭ كەڭەسشىسى، اۋدارماشى كيبار زافەر قازاق اقىنى ابايدىڭ تۇرىك تىلىنە اۋدارىلعان ولەڭدەر جيناعىن تانىستىردى.

«اباي تۇركى دۇنيەسىنە ورتاق تۇلعا. ونىڭ ٴپالساپالىق ويلارعا تولى شىعارماشىلىعى تۇركى دۇنيەسىنىڭ ماقتانىشى. قىپشاق تۇركىلەرىنىڭ ىشىندە ەڭ باي ٴارى كوركەم سانالاتىن قازاق ٴتىلىنىڭ دامي تۇسۋىنە اباي ەرەكشە ۇلەس قوستى. اقىننىڭ ەڭبەكتەرى وسىنىسىمەن قۇندى. اباي ٴوز شىعارماشىلىعىندا ٴتىل، ٴدىن جانە ٴداستۇر سەكىلدى مادەنيەتتىڭ قاينار كوزى بولىپ سانالاتىن نەگىزگى تىرەكتەردى باسشىلىققا الدى. ولەڭدەرىنە اراب، پارسى، تۇرىك جانە ورىس تىلدەرىنەن سوزدەر قوسۋ ارقىلى قازاق ٴتىلىنىڭ ٴورسىنىڭ كەڭەيە تۇسۋىنە ٴوزىنىڭ ىقپالىن جاسادى. ٴدىني تۇرعىدا قاسيەتتى قۇران سوزدەرىن پايدالانىپ، شىعارمالارىن مۇسىلمان دۇنيەسىنىڭ بولشەگى رەتىندە تاراتا ٴبىلدى. وسىعان قاراپ ابايدىڭ تۇركى الەمىنە عانا ەمەس، مۇسىلمان دۇنيەسىنىڭ ەرەكشە تۇلعاسى رەتىندە قاراستىرا الامىز. ۇلتتىڭ ٴداستۇرى مەن عۇرىپتارىن ٴوز شىعارماشىلىعىنا ارقاۋ ەتۋ ارقىلى قازاق حالقىنىڭ وركەنيەتىن تانىستىردى. مىنە، وسى ٴۇش تۇعىردى باسشىلىققا العان اقىننىڭ مۇرالارى بارشا ادامزاتقا ورتاق بولىپ وتىر. تۇرىك ٴتىلدى وقىرمانداردىڭ قالاۋىمەن اباي ولەڭدەرىنە اۋدارىپ شىقتىم. اقىننىڭ ٴپالساپاسى مەن ۇستانىمى ەندى تۇرىك تىلىندە دە ناسيحاتتالاتىن بولادى. جيناقتىڭ ەڭ العاشقى داناسىن اقىننىڭ تۋعان ولكەسىندەگى سەمەي ۋنيۆەرسيتەتىنە تابىس ەتەمىن»، - دەدى كيبار زاريف.

اۋدارماشىنىڭ ايتۋىنشا، مەرەيتويعا وراي شىعارىلعان جيناق الداعى ۋاقىتتا ٴوز جالعاسىن تاپپاق. سونىمەن قاتار، ابايدىڭ شىعارماشىلىعىن ناسيحاتتاۋ ٴۇشىن تۇركيادا ادەبي كەشتەر ۇيىمداستىرىلادى.


نۇرسەرىك جولبارىس 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي