BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

شاۋەشەك اكىمى: «اباي جولى» رومانى قىتاي تىلىندە باسىلىپ شىقتى

استانا. 6 تامىز. baq.kz – قازاقتىڭ ۇلى اقىنى ابايعا قاتىستى ەڭبەكتەر قىتاي تىلىنە اۋدارىلدى. بۇل تۋرالى baq.kz تىلشىسىنە بەرگەن سۇحباتىندا قحر، سۇار، شاۋەشەك قالالىق ۇكىمەتىنىڭ اكىمى رومان تاۋقان ۇلى مالىمدەدى.  

«ادامزاتتىڭ ورتاق يگىلىگىنە اينالعان اباي اقىننىڭ شىعارمالارى قىتاي تىلىنە اۋدارىلدى. اقىننىڭ شىعارماشىلىعىنا قىتايدا تۇراتىن ۇلتتار مەن ۇلىستاردىڭ تاراپىنان قىزىعۋشىلىق ەرەكشە ەكەنىن اتاپ وتكىم كەلەدى. بەيجىڭدەگى ۇلتتار باسپاسى وسىنى ەسكەرە وتىرىپ، ەل تۇرعىندارىنا ارناپ اقىن ولەڭدەرىنىڭ جيناعىن قىتاي تىلىندە شىعارىپ بەردى. تاعى ٴبىر ەرەكشە قۋانىشتى جاڭالىق - ابايدىڭ ٴومىرى مەن شىعارماشىلىعىن ارقاۋ ەتكەن مۇحتار اۋەزوۆتىڭ «اباي جولى» تولىعىمەن قىتاي تىلىندە اۋدارىلىپ بولدى. جاقىندا وسى اۋدارمانىڭ شاۋەشەك قالاسىنداعى كىتاپحانادا رەسمي تۇساۋكەسەرى وتەدى. راسىمگە قازاقستان تاراپىنان دا قىزىعۋشىلىق بولادى دەگەن ۇمىتتەمىز»، - دەدى ر.تاۋقان ۇلى.

شاۋەشەك اكىمى ٴوز سوزىندە ابايدىڭ مەرەيتويىنا وراي قازاقستاندىقتارعا ارناپ جۇرەكجاردى لەبىزىن دە جەتكىزدى.

«شاۋەشەك قالاسى مەن شىعىس قازاقستان وبلىسىنىڭ اكىمدىگى اراسىندا بايلانىستار وتە جاقسى دامىعان. ەكى ەلدىڭ ۇلى دوستىعىنىڭ ارقاسىندا بارىس-كەلىستەرىمىز كۇشەيىپ كەلەدى. ەكونوميكالىق جاعىنان مۇددەنى العا قويعان بايلانىستار رۋحاني ۇندەستىككە ۇلاستى. ەكىجاقتى كەلىسىم بويىنشا بىرىگىپ، مادەني شارالار وتكىزۋدەمىز. قازاقستاندا ابايدىڭ 170 جىلدىق تويى وتەدى دەگەندى ەستىپ، قاتىسىپ قايتقاندى ٴجون كوردىك. قىتاي قازاقتارى ابايدى ٴپىر سانايدى، ونىڭ ولەڭدەرىن ٴبىلىم مەن تاربيەنىڭ قۇرالى دەپ بىلەدى. قىتاي جەرىندە ابايدى بىلمەيتىن قازاق جوق. ەندى ونى قىتاي حالقىنا تانىستىرۋدى قولعا الدىق. وسىنداي ۇلى تۇلعامىزدىڭ تويىنا وراي بارشا حالىقتى قۇتتىقتاعىم كەلەدى. اقىن مۇرالارىن باعدار ەتىپ، رۋحاني كەمەلدەنگەن ەلگە اينالا بىلەيىك»، - دەپ اتاپ ٴوتتى شاۋەشەك اكىمى.

نۇرسەرىك جولبارىس 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي