BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلوردادا اۋەزوۆتىڭ 120 جىلدىعى اتالىپ ٴوتتى

بۇگىن – ۇلى جازۋشى، دراماتۋرگ مۇحتار اۋەزوۆتىڭ تۋعانىنا 120 جىل. وسى مەرەيلى كۇنگە وراي استاناداعى ۇلتتىق اكادەميالىق كىتاپحانادا «ۇلتتىڭ ۇلى جازۋشىسى اۋەزوۆ الەمى» تاقىرىبىندا دوڭگەلەك ۇستەل ٴوتتى، دەپ حابارلايدى baq.kz اقپارات اگەنتتىگى.

كەزدەسۋدە بەلگىلى جازۋشىلار مەن جۋرناليستەر قازاق ادەبيەتىنىڭ كلاسسيگىنىڭ ٴومىرى مەن شىعارماشىلىعى جانە قايراتكەرلىگى توڭىرەگىندە اڭگىمە ٴوربىتتى. قالامگەرلەر كىتاپحاناعا جينالعان وقۋشىلارعا مۇحتار اۋەزوۆتىڭ ادەبيەتشى، قوعام قايراتكەرى عانا ەمەس، ابايتانۋ عىلىمىنىڭ نەگىزىن قالاپ، قالىپتاستىرعان زەرتتەۋشى ەكەنىن ايتتى. قازاق ادەبيەتىنىڭ زاڭعار شىڭىندا تۇرعان كلاسسيكتىڭ شىعارماشىلىعىن زەرتتەۋ قاي زاماندا بولسىن قالىس قالماۋى كەرەك ەكەنىن ايتقان زيالى قاۋىم اۋەزوۆتىڭ شاعىن اڭگىمەلەرى قالتارىستا قالماسا ەكەن دەگەندى ورتاعا سالدى.

بەلگىلى اقىن، «الاش» سىيلىعىنىڭ لاۋرەاتى سەرىك تۇرعىنبەكوۆ مۇحتار اۋەزوۆتىڭ قايراتكەرلىگىنە توقتالىپ، شىعارماشىلىعى جايلى سىر شەرتتى. اقىننىڭ ايتۋىنشا، مۇحتار اۋەزوۆ ٴارقاشان الەم ادەبيەتىنىڭ باسىندا تۇرۋى ٴتيىس.

جۋرناليستيكا سالاسىندا دا كوپ ەڭبەك ەتكەن كوسەمسوزشى مۇحتار جايىندا اڭگىمە وربىتكەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق ونىڭ پۋبليسيستيكالىق شەبەرلىگى قازىرگى ٴاربىر قالام ۇستاعان ٴتىلشىنىڭ وتەتىن مەكتەبى ەكەنىن اتاپ ايتتى. اۋەزوۆتىڭ جازۋشىلىعىنان دا اينالىپ وتپەگەن قايرات ٴومىرتاي ۇلى ۇلى ادەبيەتشىنىڭ «اباي جولى» الاشتىڭ يدەياسى ەكەنىن ايتىپ، ابايدىڭ جولى جاستاردى ەڭ الدىمەن عىلىم مەن بىلىمگە باستاعانىن تىلگە تيەك ەتتى.

ال جۋرناليست، جازۋشى سادىبەك تۇگەل بولسا مۇحتاردى تەك اۋەزوۆتانۋشىلار عانا زەرتتەمەي، بۇكىل قازاق، بۇكىل تۇركى جۇرتى تانۋى كەرەك دەگەن پىكىردە. بەلگىلى جۋرناليست ۇلىلارىمىزدى تەك تۋعان كۇندەرىندە عانا ۇلىقتاماي، ولاردىڭ شىعارماشىلىعى جايلى تىنباي، جان-جاقتى زەرتتەۋىمىز كەرەك ەكەنىن ايتادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي