BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

د.احمەتوۆ: ابايدى ۇلىقتاۋ ۇلتتىڭ پارىزى

استانا. 6 تامىز. baq.kz – ابايدى ۇلىقتاۋ، ۇرپاققا قالدىرعان ۇلاعاتىن ۇمىتپاۋ – ٴبىز ٴۇشىن قاسيەتتى پارىز. بۇل پىكىردى بۇگىن شاكارىم اتىنداعى سەمەي مەملەكەتتىك ۋنيۆەرسيتەتىندە ابايدىڭ 170 جىلدىق مەرەيتويىنا وراي وتكەن «اباي جانە الەمدىك وركەنيەت» اتتى كونفەرەنسيا كەزىندە شىعىس قازاقستان وبلىسىنىڭ اكىمى دانيال احمەتوۆ ايتتى، دەپ حابارلايدى baq.kz ٴتىلشىسى.  

 

«ەلباسى نۇرسۇلتان ٴابىش ۇلى نازاربايەۆ: «ابايدىڭ ٴسوزى – قازاقتىڭ بويتۇمارى. ابايدىڭ مۇراسى – قازاقتىڭ ەڭ قاسيەتتى قازىناسى» دەپ اتاپ كورسەتكەن بولاتىن. اباي – قازاق حالقىنىڭ ۇلى ۇستازى، تاربيەشىسى. ٴار ٴسوزى اقىل مەن ناقىل، ماقال مەن ماتەلگە اينالعان ولمەس مۇرا قالدىرعان ادامزاتتىڭ ابايى. «ادامزاتتىڭ ٴبارىن ٴسۇي، باۋىرىم دەپ..» دەگەن ٴبىر عانا ٴسوزى بەيبىتشىلىك پەن ىنتىماققا، بىرلىك پەن تاتۋلىققا ۇندەگەن قۇندى وسيەت، ۇلى مۇرا. بيىل رەسپۋبليكامىز بويىنشا قازاق حاندىعىنىڭ 550 جىلدىعى، قازاقستان حالقى اسسامبلياسىنىڭ 20 جىلدىعى، ۇلى جەڭىستىڭ 70 جىلدىعى، كونستيتۋسيانىڭ 20 جىلدىعى جانە ۇلى ابايدىڭ 170 جىلدىعى مەرەكەلەنەتىن تاريحي جىل. ۇلى بابامىزدى ۇلىقتاۋ، ۇرپاققا قالدىرعان ۇلاعاتىن ۇمىتپاۋ – ٴبىز ٴۇشىن قاسيەتتى پارىز. اباي سوزدەرى – كەلەشەگى كەمەل ەل ٴۇشىن تاعلىم الارلىق رۋحاني كۇش پەن قايرات بەرەتىن قاينار بۇلاق. «ٴبىرىڭدى قازاق، ٴبىرىڭ دوس كورمەسەڭ، ٴىستىڭ ٴبارى بوس» دەپ دانىشپان ايتقانداي، بايتاق ەلىمىزدىڭ ٴاربىر ازاماتى ٴبىر-بىرىن دوس كورىپ، باۋىرىنداي سۇيسە، الار اسۋلارىمىزدىڭ كوپ بولارى انىق. تورقالى توي ٴوتىپ جاتقان شىڭعىستاۋ ٴوڭىرى – تاريحي، شەجىرەلى ولكە. ادامزات تاريحىنداعى ۇلى ويشىلداردىڭ ٴبىرى – دانىشپان اباي وسىپ-ونگەن، ۇلتىمىزدىڭ ٴبىرتۋار ۇلدارى – كەمەڭگەر شاكارىم، عۇلاما مۇحتاردىڭ ٴىزى قالعان كيەلى مەكەن بار قازاققا ىستىق. بۇگىن ٴبىز اباي ەلىنىڭ دامىعانىن، اۋىلداردىڭ كوركەيگەنىن، ساۋلەتى مەن داۋلەتى ارتقانىن كورىپ قۋانامىز. قازاقتىڭ ٴبىر عانا ابايى بار. اقىننىڭ تۋعان جەرىن ايالاۋ، اباتتاندىرۋ، حالقىنىڭ تۇرمىس دەڭگەيىن جاقسارتۋ – بارشاعا ورتاق مىندەت. قىمباتتى اعايىن! اباي تويى – حالىق تويى. بارشاڭىزعا مەرەكەلىك كوڭىل كۇي، بەرەكە بىرلىك، قۋانىش-شاتتىق تىلەيمىن. ۇلى اقىنعا دەگەن ماحابباتىمىز ارتا بەرسىن! مەرەيتوي قۇتتى بولسىن!»، – دەدى د.احمەتوۆ.

ايتا وتەيىك، تامىزدىڭ 2-نەن باستاپ شىعىس قازاقستان وبلىسىندا ابايدىڭ 170 جىلدىعىنا وراي ٴبىرقاتار شارالار ۇيىمداستىرىلدى. رەسپۋبليكالىق جەتەكشى باق وكىلدەرى وبلىستىڭ تاريحي جەرلەرىن ارالاپ، مەرەيتويعا دايىندىق بارىسىمەن تانىستى. اقىننىڭ مەرەيتويىنا ارنالعان رەسمي شارالار سەمەي قالاسىندا وتۋدە. قورىتىندى شارا ەرتەڭ اباي اۋدانىنداعى جيدەباي-بورىلى جەرىندە وتپەك.


نۇرسەرىك جولبارىس

 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي