BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جارقايىڭ اۋدانىندا جاڭا سوت عيماراتى اشىلدى

نۇرسۇلتان نازاربايەۆتىڭ سوت مارتەبەسىن كوتەرۋ تۋرالى تاپسىرماسىنا سايكەس، اقمولا وبلىسىنىڭ جارقايىڭ اۋدانىندا جاڭا سوت عيماراتى اشىلدى، دەپ حابارلايدى baq.kz اقپارات اگەنتتىگى.

عيماراتتىڭ سالتاناتتى اشىلۋ راسىمىنە قازاقستان رەسپۋبليكاسى جوعارعى سوتىنىڭ جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى نۇرسەرىك شاكىروۆ، اقمولا وبلىستىق سوتىنىڭ ٴتوراعاسى دوسجان ٴامىروۆ، اقمولا وبلىسى اكىمىنىڭ ورىنباسارى اسقاربەك ۇيسىمبايەۆ، جارقايىڭ اۋدانىنىڭ اكىمى مۇرات بالپان، سونداي-اق وڭىردەگى مەملەكەتتىك جانە قۇقىق قورعاۋ ورگاندارىنىڭ باسشىلارى، ارداگەرلەر، سۋديالار مەن سوت جۇيەسىنىڭ قىزمەتكەرلەرى، اۋدان تۇرعىندارى مەن باق وكىلدەرى قاتىستى.

ن.شاكىروۆ جارقايىڭ اۋداندىق سوتىنىڭ جاڭا عيماراتى قۇرىلىسىنىڭ اياقتالۋى بۇكىل اقمولا ٴوڭىرى ٴۇشىن ايتۋلى وقيعا ەكەنىن اتاپ ٴوتتى. عيمارات جوعارعى سوت بەكىتكەن تيپتىك جوبا بويىنشا سالىنعان. ول سوت داۋلارى قارالاتىن نىساندارعا قويىلاتىن بارلىق حالىقارالىق تالاپتارعا ساي كەلەدى. جوعارعى سوت ورگانى الداعى ۋاقىتتا دا ٴوزىنىڭ ايبىنىمەن زاڭ ۇستەمدىگىنىڭ سالتانات قۇرۋىنا ىقپال ەتەتىن سوتتار عيماراتتارىن سالۋدى جانە جوندەۋدى ماقسات ەتىپ وتىرعانىن جەتكىزدى.

وبلىستىق سوتتىڭ ٴتوراعاسى د.ٴامىروۆ ارىپتەستەرىن قونىس تويىمەن قۇتتىقتاي كەلە، بۇل يگىلىكتى ٴىس ەلباسى نۇرسۇلتان نازاربايەۆتىڭ سوت مارتەبەسىن كوتەرۋ تۋرالى تاپسىرماسىنىڭ اقمولا وبلىسىندا جۇيەلى ورىندالىپ جاتقانىنىڭ ايعاعى ەكەنىن مالىمدەدى.

وبلىس اكىمىنىڭ ورىنباسارى اسقاربەك ۇيسىمبايەۆ سوت تورەلىگىنىڭ جاڭا سارايىنىڭ اشىلۋى ايرىقشا وقيعا ەكەندىگىن اتاي كەلە، يگىلىكتى ٴىستىڭ باستاماشىسى بولعان جوعارعى سوتقا، اقمولا وبلىستىق سوتىنا العىسىن ايتتى.

«جاڭا عيمارات ادىلدىكتىڭ، تازالىقتىڭ، ادالدىقتىڭ، تۋرالىقتىڭ، زاڭدىلىقتىڭ ناعىز مەكەنى بولسىن»، - دەپ تىلەك ٴبىلدىردى.

جينالعان قاۋىمعا اۋداننىڭ اقساقالى بەرىكتاس بايمولدينوۆ اق باتاسىن بەرگەن سوڭ، لەنتا قيىلىپ، مەيماندار جاڭا عيماراتتى ارالاپ كوردى. سوت عيماراتىندا اۋديو-بەينەتىركەۋ جۇيەسىمەن جانە جاڭا تەحنيكالىق قۇرالدارمەن جابدىقتالعان ەكى سوت زالى بار. سۋديالار مەن سوت قىزمەتكەرلەرىنە، پروكۋرورلار مەن ادۆوكاتتارعا، سوت ورىنداۋشىلارىنا ارنالعان كابينەتتەر قاراستىرىلعان. كەڭەسۋ بولمەلەرى، مۇراعاتتاعى ىستەرمەن تانىسۋعا ارنالعان بولمەلەر، كۇتۋ زالى بار. سوت زالىنىڭ كەز-كەلگەن جەرىنەن قۇجاتتاردى كورنەكى تۇردە كورسەتۋگە ارنالعان ىڭعايلى بەينەپروەكتور ورناتىلعان.

ايتا كەتەيىك، مۇمكىندىگى شەكتەۋلى ازاماتتار ٴۇشىن ارنايى پاندۋس ورناتىلىپ، ەدەن توسەمەلەرى كەدەرگىلەرسىز جانە تابالدىرىقسىز ەتىپ جاسالىپ، ەسىكتەردە ەدەن ۇستىندەگى باعدارلار قويىلىپ، ارنايى سانيتارلىق توراپتارمەن جابدىقتالعان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي