BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ق.ٴمامي: جوعارعى سوت جولداۋدى بەلسەندى ىسكە اسىرۋعا كىرىستى

بۇگىن «قازاقستاننىڭ ٴۇشىنشى جاڭعىرۋى: جاھاندىق باسەكەگە قابىلەتتىلىك» اتتى مەملەكەت باسشىسىنىڭ جولداۋىن ورىنداۋ شەڭبەرىندەگى سۋديالار كورپۋسىنىڭ الدىنا تۇرعان مىندەتتەردى جۇزەگە اسىرۋ بويىنشا جوعارعى سوت ٴتوراعاسى قايرات ٴمامي جۇمىس كەڭەسىن وتكىزدى، دەپ حابارلايدى baq.kz.

ٴىس-شاراعا جوعارعى سوتتىڭ القا ٴتوراعالارى، سونداي-اق جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتى مەن سوت تورەلىگى اكادەمياسىنىڭ باسشىلىعى قاتىستى.

كەڭەستىڭ جۇمىسىن اشا كەلە، ق.ٴمامي جولداۋدىڭ جانە مەملەكەت باسشىسى ەلىمىزدىڭ عالامدىق باسەكەگە قابىلەتتىلىگىن قامتاماسىز ەتۋگە مۇمكىندىك بەرەتىن ەكونوميكالىق ٴوسىمنىڭ جاڭا مودەلىن قۇرۋ مىندەتىن قويعاندىعىن اتاپ ٴوتتى.

«سوت جۇيەسى قۇقىق ۇستەمدىگى مەن بارشانىڭ زاڭ الدىنداعى تەڭدىگىن قامتاماسىز ەتە وتىرىپ، جولداۋدى تابىستى ىسكە اسىرۋدىڭ ماڭىزدى بۋىنى بولىپ تابىلادى. ٴبىز وسى رەتتە مۇنى قالاي جۇزەگە اسىرىپ، قانداي مىندەتتەردى قاي مەرزىمدە شەشەتىندىگىمىزدى ناقتى انىقتاۋىمىز كەرەك»، - دەدى جوعارعى سوت ٴتوراعاسى.

سوتتار سوت جۇيەسىنە ٴتان باعىتتار بويىنشا عانا ەمەس، ٴوز قۇزىرەتى شەڭبەرىندە دە جولداۋدا بەلگىلەنگەن ەلىمىز ٴۇشىن ماڭىزدى وزگە دە بارلىق باسىم باعىتتاردى ىسكە اسىرۋعا بەلسەنە اتسالىسۋى قاجەتتىگى ايرىقشا اتالىپ ٴوتتى. بۇل جەكە مەنشىكتى قورعاۋعا، شەتەلدىك ينۆەستيسيالاردى تارتۋعا، بۇقارالىق كاسىپكەرلىكتى قولداۋعا، سالىق-بيۋدجەت ساياساتىن جاقسارتۋعا، بيۋدجەتتى وڭتايلى قولدانۋعا قاتىستى ماسەلەلەر. وسى اتالعان ماسەلەلەر بويىنشا سوت پراكتيكاسى ساراپتالۋى، زاڭناما قايتا تەكسەرىستەن ٴوتۋى جانە ٴتيىستى ورگاندارعا كەشەندى ۇسىنىستار ازىرلەنۋى ٴتيىس.

كەڭەس بارىسىندا ق.ٴمامي ٴبىرىنشى كەزەكتە تۇرعان مىندەتتەرگە نازار اۋداردى. ولاردىڭ قاتارىندا جەكە مەنشىكتى قورعاۋعا، قۇقىق ۇستەمدىگى مەن بارشانىڭ زاڭ الدىنداعى تەڭدىگىن قامتاماسىز ەتۋگە باعىتتالعان رەفورمالاردى جۇرگىزۋ بويىنشا جۇمىستار بار.

جوعارعى سوتتىڭ القالارىنا جەكە مەنشىككە قول سۇعاتىن قىلمىستىق قۇقىق بۇزۋشىلىق ساناتتارى بويىنشا سوت پراكتيكاسىن تالداۋ جانە وسى قۇقىق بۇزۋشىلىقتاردى جاساۋدىڭ نەگىزگى سەبەپتەرىن زەرتتەۋ تاپسىرىلدى.

ەكونوميكالىق ىنتىماقتاستىق جانە دامۋ ۇيىمىنىڭ ۇزدىك تاجىريبەسى مەن ۇسىنىمدارىن قولدانۋعا ايرىقشا ٴمان بەرۋ قاجەت. وسى ورايدا جوعارعى سوت ازىرلەگەن اكىمشىلىك پروسەستىك كودەكس (اپك) جوباسى بويىنشا جۇمىستى كۇشەيتۋ تاپسىرىلدى. اتاپ ايتقاندا، قازاقستانعا جاقىندا كەلەتىن ەكونوميكالىق ىنتىماقتاستىق جانە دامۋ ۇيىمى ساراپشىلارىنىڭ الدىندا اپك-نى تانىستىرۋدى ۇيىمداستىرۋ جۇكتەلدى.

سونىمەن قاتار، ق.ٴمامي شەتەلدىك ينۆەستورلار ٴۇشىن رەسپۋبليكامىزدىڭ تارتىمدىلىعىن ارتتىرۋ جۇمىسىن كۇشەيتۋ قاجەتتىگىنە ايرىقشا ٴمان بەردى. مۇندا ينۆەستيسيالىق داۋلار بويىنشا بىركەلكى سوت پراكتيكاسىن قالىپتاستىرۋ جانە ٴتيىستى زاڭنامانى جەتىلدىرۋ جۇمىستارىن جالعاستىرۋ قاجەت ەكەنى دە ايتىلدى.

بيزنەس ورتانى جاقسارتۋ جانە كەڭەيتۋ ٴۇشىن اعىمداعى جىلى جوعارعى سوتتىڭ «سالىق زاڭناماسىن قولدانۋ بويىنشا سوت پراكتيكاسى تۋرالى» جاڭا نورماتيۆتىك قاۋلىسىن قابىلداۋ تاپسىرىلدى.

قارجىلىق سەكتوردى «قايتا جۇكتەۋ» بولىگىندە جوعارعى سوتتىڭ باستاماسىمەن ازىرلەنىپ، قازىرگى تاڭدا پارلامەنتتە قاراۋدا جاتقان كوللەكتورلىق قىزمەت ماسەلەلەرى بويىنشا زاڭ جوباسىنىڭ شەڭبەرىندە تۇزەتۋلەر قابىلداۋ بويىنشا جۇمىستى جالعاستىرۋ تاپسىرىلدى. اتاپ ايتقاندا، اڭگىمە بانكتەرگە ارنايى تالاپ-ارىزداردىڭ ەسكىرۋ مەرزىمىنە قاتىستى تالاپتاردى قويۋ تۋراسىندا بولىپ وتىر.

سالىق-بيۋدجەت ساياساتىن جاقسارتۋ ماقساتىندا مۇلىكتىك جانە كولىكتىك سالىقتار بويىنشا سالىقتىق قارىزداردى ٴوندىرىپ الۋ تۋرالى داۋلاردى سوتتان تىس شەشۋ ٴتارتىبى بويىنشا قۇرالداردى ازىرلەۋ تاپسىرىلدى. اتاپ ايتقاندا، سالىق ورگاندارىنىڭ جوعارىدا اتالعان ماسەلەلەر بويىنشا سالىق بۇيرىعىن شىعارىپ، ول ٴوز كەزەگىندە سوت ورىنداۋشىسىنا تىكەلەي جولداناتىن پراكتيكانى پىسىقتاۋ ۇسىنىلدى. سونىمەن قاتار، «سالىق جانە بيۋدجەتكە تولەنەتىن وزگە دە مىندەتتى تولەمدەر مەن كەدەن ٴىسى تۋرالى» جانە «كەيبىر زاڭنامالىق اكتىلەرگە سالىق جيناۋ جانە كەدەن ٴىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنا جوعارعى سوتتىڭ ۇسىنىمدارىن دا ازىرلەۋ قاجەت.

جوعارى ٴبىلىم جۇيەسىنىڭ ساپاسىن ارتتىرۋ مىندەتى بويىنشا جوعارعى سوت ٴتوراعاسى سوت تورەلىگى اكادەمياسىن دامىتۋ قاجەتتىگىنە ايرىقشا نازار اۋداردى. ول اكادەميا وقىتۋدىڭ جاڭا ادىستەمەسىن ەنگىزىپ، ماگيسترانتتار مەن جۇمىس ىستەپ جۇرگەن سۋديالارعا ٴتيىستى ٴبىلىم بەرىپ قانا قويماي، ولاردىڭ بويىنشا اقپاراتتى جۇيەلەۋ قابىلەتىن ارتتىرىپ، ولارعا قاجەتتى كاسىبي داعدىلاردى ٴسىڭىرتۋى قاجەتتىگىن اتاپ ٴوتتى. اكادەمياعا جاقىن ارادا وقۋ ورنىن دامىتۋ تۇجىرىمداماسىنىڭ جوباسىن ازىرلەۋ جۇمىسىن اياقتاۋ تاپسىرىلدى.

ق.ٴمامي اكىمشىلىك جانە قىلمىستىق زاڭنامانى ىزگىلەندىرۋ ماسەلەسىنە نازار اۋداردى. وسىعان بايلانىستى، ىستەردىڭ كەيبىر ساناتتارى بويىنشا ايىپپۇل كولەمىن ازايتۋ مۇمكىندىگى مەن ولاردى وتەۋدىڭ قيسىندى مەرزىمىن تاعايىنداۋ ماسەلەلەرىن زەردەلەي وتىرىپ، ايىپپۇل سالۋ تۇرىندە جازا تاعايىنداۋ ينستيتۋتىن كەڭەيتۋ ماسەلەسىن پىسىقتاۋ تاپسىرىلدى.

«بۇل ماسەلە قۇقىقتىق ساياسات كەڭەسىنىڭ 2017 جىلعا ارنالعان جۇمىس جوسپارىندا تۇر. سوت پراكتيكاسىن مۇقيات تالداپ، ٴتيىستى ۇسىنىستار ەنگىزۋ قاجەت»، - دەدى جوعارعى سوت ٴتوراعاسى.

قوعامدىق قاۋىپتىلىگى تومەن ەكونوميكالىق قىلمىس قۇرامدارىن قىلمىسسىزداندىرۋ تۋرالى ايتا كەلە، ق.ٴمامي «وسى تاقىرىپتى ەلباسى ٴار ٴتۇرلى جيىنداردا ۇنەمى ايتىپ كەلەدى، بۇل ماسەلە ونى ايرىقشا مازالايتىنىن بىلدىرەدى»، - دەدى.

وسى ورايدا، سالىق سالاسىنداعى قۇقىق بۇزۋشىلىقتارعا جازا تاعايىنداۋ پراكتيكاسىن ساراپتاۋ جانە ولاردى قىلمىسسىزداندىرۋ، سالىقتار مەن ايىپپۇلداردى ەرىكتى تۇردە تولەگەن جاعدايدا قىلمىستىق جاۋاپتىلىقتى بولدىرماۋ بويىنشا ۇسىنىس ەنگىزۋ تاپسىرىلدى. سونىمەن قاتار، جالعان كاسىپكەرلىكپەن بايلانىستى قىلمىستار بويىنشا جوعارعى سوتتىڭ ۇستانىمىن ايقىنداۋ قاجەت.

بەرىلگەن بارلىق تاپسىرمالار بويىنشا ولاردى ىسكە اسىرۋ جولدارى ايتىلىپ، ناقتى ورىنداۋشىلار مەن مەرزىمدەرى انىقتالدى.

«قويىلعان بارلىق تاپسىرمالاردى ورىنداۋ جۇمىسى تاياۋ مەرزىم ىشىندە جولعا قويىلۋى جانە سىزدەردىڭ ۇدايى باقىلاۋلارىڭىزدا بولۋى ٴتيىس»، - دەدى ق.ٴمامي.

ەستەرىڭىزگە سالىپ وتسەك، 31 قاڭتار كۇنى بۇقارالىق اقپارات قۇرالدارىندا مەملەكەت باسشىسى نۇرسۇلتان نازاربايەۆتىڭ «قازاقستاننىڭ ٴۇشىنشى جاڭعىرۋى: جاھاندىق باسەكەگە قابىلەتتىلىك» اتتى ەل حالقىنا ارناعان جولداۋى جاريالاندى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي