BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانا يمامدارى ەلباسى جولداۋىنا ٴۇن قوستى  

استانا يمامدارى ەلىمىزدىڭ ماڭىزدى كەزەڭىندە جاسالعان ەلباسى جولداۋىنا ارنالعان جيىن وتكىزدى، دەپ حابارلايدى baq.kz.

ايتا كەتەيىك، مەملەكەت باسشىسى نۇرسۇلتان نازاربايەۆتىڭ «قازاقستاننىڭ ٴۇشىنشى جاڭعىرۋى: جاھاندىق باسەكەگە قابىلەتتىلىك» اتتى ٴداستۇرلى جولداۋى ەلىمىزدىڭ وسىپ-وركەندەۋىنە باعىتتالعان سان سالانى قامتىدى. رەسپۋبليكانىڭ ساياسي-ەكونوميكالىق دامۋى، ٴبىلىم-عىلىمعا دەن قويۋ، زاماناۋي تەحنولوگيا جەتىستىكتەرىن جەتە مەڭگەرۋ، مادەنيەت-رۋحانيات سالاسىنداعى مەجەلى مىندەتتەر جايى وسى جولداۋدا كەڭىنەن كورىنىس تاپتى.

ٴدىني باسقارما ٴباسپاسوز قىزمەتىنىڭ مالىمەتىنشە، جيىندى اشقان نايب ٴمۇفتي ناۋرىزباي قاجى تاعان ۇلى وسىناۋ جولداۋ جۇكتەگەن مىندەتتەر جايىندا قالا يمامدارىنا تۇسىندىرە كەلە، ەل رۋحانياتىن كوتەرىپ، حالىقتار مادەنيەتى مەن رۋحاني تۇتاستىعىن ساقتاۋدا باسا نازار اۋدارۋدى قاجەت ەتەتىن جايتتاردى باياندادى.

ەلوردا ىرگەسىندەگى «ٴالجان انا» مەشىتىندە وتكەن ماجىلىسكە قازاقستان مۇسىلماندارى ٴدىني باسقارماسىنىڭ ٴتوراعاسى، باس ٴمۇفتي ەرجان قاجى مالعاجى ۇلى ارنايى قاتىسىپ، جولداۋدا قامتىلعان ماڭىزدى ماسەلەلەر مەن مىندەتتەرگە توقتالدى.

«مەملەكەتىمىزدىڭ بولاشاققا جاساعان باعدارلى جوسپارىن جۇزەگە اسىرۋ ٴۇشىن ەلباسىمىز ۇلكەن مىندەتتەردى الدىمىزعا قويدى. ۇلتجاندى ۇرپاق ٴوسىرۋ، سانالى جاستاردى ٴبىلىم-عىلىمعا قۇلشىندىرۋ قاشاندا ماڭىزدى. بۇل رەتتە جاستار ساناسىنا كەرى اسەرىن تيگىزەتىن جات مادەنيەتتەرگە توقساۋىل قويىپ، ٴدىني تەرىس اعىمدارعا تۇساۋ سالۋ كەرەكتىگىن باسا ايتتى. قازىرگى ۋاقىتتا ينتەرنەت كەڭىستىگىندەگى جات اعىمنىڭ ۇگىت-ناسيحاتىنا جول بەرمەۋىمىز كەرەك. حالقىمىزدىڭ بىرلىگىنە سىنا قاعىپ، بۇلىككە اكەلەتىن اعىمدارعا قارسى كۇرەستىڭ قارقىنى ارتۋى ٴتيىس» دەدى باس ٴمۇفتي ەرجان قاجى مالعاجى ۇلى.

ۇلت كوشباسشىسىنىڭ قازاقستان حالقىنا ارنالعان جولداۋى جان-جاقتى تالقىلانعان جيىن بارىسىندا قمدب-نىڭ نايب ٴمۇفتيى، "نۇر استانا" ورتالىق مەشىتىنىڭ باس يمامى ناۋرىزباي قاجى تاعان ۇلى "ماڭگىلىك ەلدىڭ مۇراتى اسىل"، "س.عىلماني" مەشىتىنىڭ باس يمامى جۇمانازار سادىرحانوۆ "باستى باعدارىمىز – بىرلىك"، "استانا" مەدرەسەسى ديرەكتورىنىڭ ورىنباسارى قانات وڭعاربايەۆ "ساپالى ٴبىلىم بەرۋ – ادامي كاپيتالدى قالىپتاستىرۋ نەگىزى" تاقىرىپتارىندا بايانداما جاسادى. ٴدىني سالانى ودان ٴارى جانداندىرىپ، رۋحانياتتى نىعايتۋعا قاتىستى قالا يمامدارى ٴوز وي-پىكىرلەرىن ورتاعا سالدى. ال «نۇر استانا» ورتالىق مەشىتىنىڭ نايب يمامى نۇرلان رامازان 2017 جىلى اتقارىلاتىن ٴدىني ٴىس-شارا، راسىمدەردىڭ جۇمىس جوسپارىن تانىستىردى.

جيىن سوڭىندا نايب ٴمۇفتي ناۋرىزباي قاجى تاعان ۇلى ەلباسى جولداۋىنا ٴدىن قىزمەتكەرلەرىنىڭ ٴبىراۋىزدان قولداۋ بىلدىرەتىنىن، مەملەكەتىمىزدى دامىتۋ جولىندا ەڭبەك ەتۋ باستى مىندەت بولىپ قالا بەرەتىنىن جەتكىزدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي