BAQ.kz - Қазақстан жаңалықтары USD 377.73 BAQ.kz - Қазақстан жаңалықтары EUR 428.53 BAQ.kz - Қазақстан жаңалықтары RUB 5.73
استانا:

ابىلايدىڭ شاپانى، «ساق قازانى» – ەرتىس وڭىرىندە كوشپەندىلەر وركەنيەتى پاش ەتىلدى

فوتو: автор

پاۆلودار، baq.kz ٴتىلشىسى. گ. پوتانين اتىنداعى وبلىستىق تاريحي-ولكەتانۋ مۋزەيىندە ۇلى دالانىڭ وركەنيەتىنە ارنالعان كورمە ۇيىمداستىرىلدى. سالا ماماندارى 60-قا جۋىق بىرەگەي جادىگەردى العاش رەت كورەرمەن نازارىنا ۇسىندى.

مادەني شارا تاۋەلسىزدىك كۇنى مەرەكەسى مەن مەملەكەت باسشىسىنىڭ « ۇلى دالانىڭ جەتى قىرى» باعدارلامالىق ماقالاسىنا ورايلاستىرىلدى. ەكليۋزيۆتى جادىگەرلەر اندرونوۆ داۋىرىنەن باستاپ، قازاق حاندىعىنا دەيىنگى تاريحي كەزەڭدەرگە تيەسىلى.

فوتو: اۆتور

مۋزەيدىڭ ولكە تاريحى جونىندەگى مامانى دينارا وپابەكوۆانىڭ ايتۋىنشا، كورمەگە كوشپەندىلەردىڭ جىلقىنى قولعا ۇيرەتۋى، ەجەلگى كوشپەندىلەردىڭ مەتاللۋرگيانى يگەرۋى تۋرالى سىر شەرتەرىن، سونداي-اق، قازاق حاندىعى كەزەڭىندەگى كيىم-ۇلگىلەرى قويىلعان. ۇلى عۇلامالار ٴال-فارابي، ٴجۇسىپ بالاساعۇن، قوجاحمەت ياساۋي ٴومىر سۇرگەن زاماننىڭ ايناسىنا اينالعان ەكسپوناتتار با بارشىلىق.

«نەگىزگى بىرەگەي جادىگەرلەرىمىز، ولار – اندرونوۆ داۋىرىندە تۇرعان ايەل ادام مەن ٴۇش ٴجۇزدىڭ حانى ابىلايدىڭ شاپانى. مۋزەي قىزمەتكەرلەرى قۇندى جادىگەرلەردى ارحەولوگيالىق جانە ەتنوگرافيالىق زەرتتەۋ ناتيجەلەرىنە سۇيەنىپ قالىپقا كەلتىردى. سونىمەن قاتار، پاۆلودار وبلىسىنىڭ جەرىنەن تابىلعان ٴداندىباي مادەنيەتىنىڭ ماتەريالدىق بايلىقتارى بار. ال ەرتىس ٴوڭىرىنىڭ العاشقى مەتاللۋرگتەرى قولادان قۇيعان قازان ەكسپوزيسيانىڭ تورىنەن ورىن الدى. قولانى بالقىتۋ تەحنولوگياسى كوشپەندىلەردەن باستاۋ الىپ، ەۋروپاعا تارالدى. ەۋروپادا بۇل قازان «عۇن قازانى» دەپ اتالسا، ٴبىز ونى «ساق قازانى» دەپ اتايمىز. بۇل - « ۇلى دالانىڭ جەتى قىرى» ماقالاسىندا ايتىلعان تاريحي جاڭالىقتاردىڭ ٴبىر پاراسى»، - دەيدى دينارا وپابەكوۆا.

فوتو: اۆتور

قيماق داۋىرىندە ٴومىر سۇرگەن باتىردىڭ ساۋىت-سايمانى دا تولىق قالىپقا كەلتىرىلدى. رەكونسترۋكسيالىق جۇمىستارعا بىرنەشە اي جۇمسالعان. جادىگەر ەرتىس تاريحي-ارحەولوگيالىق ەكسپەديسياسى بارىسىندا ماي اۋدانىنان تابىلعان. اسكەري كيىم تەمىر پلاستينالار مەن قايىستان جاسالعان. مامانداردىڭ ايتۋىنشا، باتىر ساۋىت-سايماندى كييۋ بارىسىندا جانىنداعى ادامداردىڭ كومەگىنە جۇگىنبەگەن، كيىم ىڭعايلى ٴارى جەڭىل بولعان. سالماعى – 35 كەلىگە دەيىن. كەيىن بۇل ٴادىس ەۋروپالىق اسكەريلەردىڭ اراسىندا كەڭىنەن قولدانىلعان.

«بۇل جادىگەرلەر كوشپەندىلەردىڭ الەم تاريحىن تۇبەگەيلى وزگەرتكەنىنىڭ دالەلى بولسا كەرەك. قيماق قاعاناتىنىڭ استاناسى پاۆلودار وبلىسىندا بولعانى تاريحتان بەلگىلى. ەرتىس وڭىرىندە 13 قالا مەن يماكيا اتتى ورتالىق شاھار ورنالاسقان. سول زاماندا ٴومىر سۇرگەن ادامدار تەمىر بالقىتقان. ال زەرگەرلەر باعالى اسىل تاستاردان قىمبات اشەكەيلەر ازىرلەگەن. سونىمەن قاتار، جىلقىعا ارنالعان ەر-تۇرماندار جاساعان»، - دەيدى مامان.

ەكسپوزيسيا جۇمىسى جەلتوقسان ايىنىڭ سوڭىنا دەيىن جالعاسىن تاپپاق.

ەسكە سالا كەتسەك، پاۆلودار وبلىسىندا « ۇلى دالانىڭ جەتى قىرى» ماقالاسىندا ايتىلعان مىندەتتەردى ورىنداۋ ماقساتىندا «ۇماي» اتتى كونە تەحنولوگيالاردىڭ زەرتتەۋ جانە رەكونسترۋكسيالاۋ ورتالىعى اشىلادى. عىلىمي كەشەن حالىقارالىق دارەجەگە يە.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي