BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

16 جەلتوقسان – تاۋەلسىزدىك كۇنى

استانا، baq.kz. بۇگىن – قازاقستان رەسپۋبليكاسىنىڭ تاۋەلسىزدىك كۇنى، ەلىمىزدىڭ باستى مەملەكەتتىك مەرەكەلەرىنىڭ ٴبىرى. تاريحى تەرەڭدە جاتقان ەلدىڭ جاڭا زاماندا ٴوز الدىنا قايتا ەگەمەندى ەل بولعان كۇنى.

16 جەلتوقسان كۇنى قازاقستاننىڭ بارلىق جەرىندە مەرەكەلىك مادەني ويىن-ساۋىق ٴىس-شارالارى ۇيىمداستىرىلادى. كەشكە قاراي ۇلكەن ورتالىقتاردىڭ اسپانى وتشاشۋمەن كومكەرىلەدى. تاۋەلسىزدىك – تەك قازاقستان تۇرعىندارى ٴۇشىن ەمەس، سونىمەن بىرگە، شەتەلدەردەگى قازاق حالقىنىڭ وكىلدەرى ٴۇشىن دە ماڭىزى زور مەرەكە.

1991 جىلى كسرو ىدىراپ، وداقتىڭ قۇرامىنداعى ەلدەر ٴوز الدارىنا جەكە مەملەكەت بولىپ جاتتى. سولاردىڭ قاتارىندا قازاقستان دا بولدى. 1991 جىلى 16 جەلتوقساندا قازاقستاننىڭ جوعارعى كەڭەسى "تاۋەلسىزدىك پەن مەملەكەتتىڭ ەگەمەندىگى تۋرالى" زاڭدى قابىلدادى. بۇل زاڭ 1990 جىلى 25 قازاندا قابىلدانعان قازاقستاننىڭ ەگەمەندىگى تۋرالى دەكلاراسيامەن بىرگە قازاق ەلىنىڭ مەرەيىن نىعايتا ٴتۇستى.

قازاقستاننىڭ تاۋەلسىزدىگىن رەسمي تۇردە ەڭ العاش بولىپ مۇحيتتىڭ ارعى جاعىندا جاتقان امەريكا قۇراما شتاتتارى، ەكىنشى بولىپ ايداھارداي ايبارلى قىتاي، سونان سوڭ ۇلىبريتانيا مويىندادى. بۇدان ٴارى موڭعوليا، فرانسيا، جاپونيا، وڭتۇستىك كورەيا جانە يران يسلام مەملەكەتى تانىدى. وسىلايشا الەمدىك ساياسات ارەناسىندا قازاقستان دەگەن جاڭا مەملەكەت پايدا بولدى. تۇركيا ەڭ العاش بولىپ ەلشىلىگىن اشتى. نەبارى بىرنەشە اپتانىڭ ىشىندە الەمنىڭ كوپتەگەن بەدەلدى ەلدەرى قازاق ەلىنىڭ تاۋەلسىزدىگىن قۋاتتاپ، ديپلوماتيالىق قاتىناستار باستالدى.

تاۋەلسىزدىك جىلدارىندا قازاقستان تورتكۇل دۇنيەگە تانىمال بولىپ، عاسىرلارعا تەڭ جولدان ٴوتتى. قازاقستاننىڭ باستامالارى بۇگىندە بۇكىل الەمگە تانىمال. ەلىمىز الىس-جاقىن جۇرتتارمەن ارالاس-قۇرالاس بايلانىستا، ستراتەگيالىق ارىپتەستىكتە ورتالىق ازيا وڭىرىندەگى تۇراقتىلىقتىڭ نەگىزى بولىپ كەلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي