جۇقپالى اۋرۋلاردىڭ الدىن الۋدىڭ جاڭا ٴادىسى

استانا، baq.kz. قىزىلوردا قالاسىنداعى نازاربايەۆ زياتكەرلىك مەكتەبىنىڭ 12 سىنىپ وقۋشىسى التىناي ٴابدىجامىل جۇقپالى اۋرۋلاردان الدىن الۋ ماقساتىندا فيتونسيدتەرگە باي جابايى وسىمدىكتەردى كوركەيتۋ-كوگالداندىرۋعا پايدالانۋدى ۇسىنادى.

قىزىلوردا وبلىسىنداعى جابايى وسىمدىكتەردىڭ سالىستىرمالى فيتونسيدتىك بەلسەندىلىگىن ەكسپەريمەنت ارقىلى زەردەلەپ، جاس زەرتتەۋشى ايماقتىڭ كليماتتىق جاعدايىنا ٴتوزىمدى، ەكونوميكالىق تۇرعىدان ٴتيىمدى جانە دە تۋبەركۋلەز تاياقشاسىنا جانە باسقا دا پاتوگەندى ميكروبتارعا قارسى تۇرا الاتىن «وسىمدىك انتيبيوتيكتەرىنىڭ» ٴتىزىمىن جاسادى.

«فيتونسيدتەر - ميكروورگانيزمدەردىڭ دامۋىن جانە كوبەيۋىن توقتاتۋعا، تەجەۋگە سەپتىگىن تيگىزەتىن يممۋنيتەتتى زاتتار. جۇمىستى جۇزەگە اسىرعان كەزدە فيتونسيدتىك قاسيەتتەرى سالىستىرمالى زەرتتەلگەن وسىمدىكتەر-تورانعىل تەرەگى، جىڭعىل، جابايى جيدە، كۇمىس تەرەگى، قاراعان، كەكىرە، اق سەكسەۋىل، ادىراسپان بولدى. ٴبىز ميكروورگانيزمدەرگە جانە كەيبىر جاندىكتەرگە ولاردىڭ اسەرىن زەرتتەدىك»، - دەيدى جاس بيولوگ.

زەرتتەۋ وبەكتىلەرى بويىنشا زەرتتەۋ جۇمىستارىن جانە باقىلاۋدى التىناي كۇندەلىكتى جۇرگىزگەن. ميكروسكوپتىڭ كومەگىمەن وسىمدىكتەردىڭ فيتونسيدتىك قاسيەتتەرىنىڭ ديزەنتەريا اميوباسىنا، پىشەن تاياقشاسىنا، اقشىل كوبەلەگى،ەتىكشى قوڭىزى، اعاش ٴبيتى جانە قۇمىرسقاعا اسەرىن جۇرگىزدى. ناتيجەسىندە ەڭ جاقسى اسەر ەتىپ، فيتونسيدتىك باسىمدىق كورسەتكەن تورانعىل تەرەگى، جىنعىل تۇرلەرى، كەكىرە، ادىراسپان جانە كۇمىس تەرەگى بولىپ انىقتالعان. جابايى ادىراسپان شوپتەسىن وسىمدىگىنىڭ شىرىنىنىڭ فيتونسيدتىك اسەرى بولمە وسىمدىكتەرىنىڭ زيانكەستەرىنىڭ ٴبىرى-اققاناتتى كوبەلەكتىڭ ومىرلىك بەلسەندىلىگىن تەجەتەتىنى انىقتالدى.

«ەكسپەريمەنت ناتيجەسى كورسەتكەندەي جابايى جيدە، جىڭعىل، تورانعىل تەرەگى، تەرەك، ادىراسپان سياقتى فيتونسيدتىك بەلسەندىلىگى جوعارى وسىمدىكتەردى جۇقپالى اۋرۋلاردىڭ الدىن الۋ ٴۇشىن تابيعي كومپونەنت رەتىندە بالاباقشالار مەن باسقا دا بالالار مەكەمەلەرىنىڭ اۋلاسىندا كوركەيتۋ-كوگالداندىرۋدا پايدالانۋ وتە ٴتيىمدى»، - دەپ ٴتۇسىندىردى جوبا جەتەكشىسى داريحا مۋناربايەۆا.

عىلىمي جوبانىڭ وزەكتىلىگىن الماتى قالاسىنىڭ بەلگىلى عالىمدارى جوعارى باعالاعان.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!