BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تالدىقورعاندا نەوناتالدى حيرۋرگيالىق ورتالىق اشىلدى

استانا، baq.kz. تاۋەلسىزدىك كۇنىنە وراي تالدىقورعانداعى وبلىستىق كوپ سالالى بالالار اۋرۋحاناسىنىڭ جانىنا اشىلعان نەوناتالدى حيرۋرگيا ورتالىعى جۇمىسىن باستادى. نىساننىڭ اشىلۋ سالتاناتىنا وبلىس اكىمى اماندىق باتالوۆ قاتىستى. بۇل تۋرالى الماتى وبلىسى اكىمىنىڭ ٴباسپاسوز قىزمەتى حابارلادى.

كوپشىلىكتى قۋانىشتى وقيعامەن قۇتتىقتاعان اماندىق باتالوۆ مەملەكەت قولداۋىنىڭ ارقاسىندا وبلىستا دەنساۋلىق ساقتاۋ سالاسىن دامىتۋدا، مەديسينالىق قىزمەت كورسەتۋ ساپاسىن ارتتىرۋدا ٴبىرشاما جۇمىستار اتقارىلعانىن تىلگە تيەك ەتىپ، نەوناتالدىق ورتالىقتىڭ اشىلۋىن سونىڭ ٴبىر ايعاعى دەپ اتاپ ٴوتتى:

- مەملەكەتتىڭ باستى مەرەكەسى تاۋەلسىزدىك كۇنىنە وراي ماڭىزدى نىساندى ىسكە قوسىپ وتىرمىز. وبلىسقا جاڭا تۋعان سابيلەرگە، جالپى بالالارعا ارنايى مەديسينالىق كومەك كورسەتەتىن وسىنداي ورتالىق قاجەت بولاتىن. بۇگىن، مىنە، سول قۋانىشتى كۇنگە جەتىپ وتىرمىز. نەوناتالدى حيرۋرگيالىق ورتالىق قاجەتتى زاماناۋي قۇرالدارمەن تولىق جابدىقتالعان. مۇنداي ورتالىقتار ەلىمىز بويىنشا ساناۋلى عانا. ماماندار ەندى وسى قۇرال-جابدىقتاردى بالالار ەمىنە ٴتيىمدى پايدالانادى دەپ سەنەمىز. ٴقازىر ٴبىز مەملەكەت باسشىسىنىڭ تاپسىرماسىنا وراي دەنساۋلىق ساقتاۋ سالاسىن سيفرلاندىرۋدى قولعا الدىق. بۇل رەتتە مەملەكەتتىك-جەكەمەنشىك ارىپتەستىك ٴتيىمدى تەتىك بولىپ وتىر. وسى سالاداعى كوپتەگەن جوبالار مەملەكەتتىك-جەكەمەنشىك ارىپتەستىك نەگىزىندە جۇزەگە اسىرىلۋدا. ولاردىڭ قاتارىندا وبلىستىڭ اۋدان، قالالارىنداعى دارىگەرلىك امبۋلاتوريالار، ەمحانالار دا بار. مەديسينا عىلىمىنىڭ جەتىستىكتەرى، جاڭا قۇرال-جابدىقتاردى كاسىبيلىكپەن ٴتيىمدى قولدانۋ ادام ٴومىرىن ساقتاۋعا جانە دەنساۋلىعىن نىعايتۋعا سەپتەسەدى دەپ ويلايمىن، - دەدى وبلىس اكىمى ا. باتالوۆ.

سونىمەن قاتار كەلەسى جىلى وبلىستىق كوپ سالالى بالالار اۋرۋحاناسى كۇردەلى جوندەۋدەن وتكىزىلەتىنىن، اۋماعى اباتتاندىرىلاتىنىن اتاپ ٴوتتى.

وبلىستاعى مەديسينا ماماندارىنىڭ اتىنان دەنساۋلىق ساقتاۋ سالاسىنىڭ ارداگەرى ٴاشىمعالي جۇماگەلدين ٴسوز الىپ، بۇل وبلىس تۇرعىندارى ٴۇشىن ماڭىزدى جاڭالىق بولعانىن جەتكىزدى.

- دەنساۋلىق – باستى بايلىق، ەڭ الدىمەن بالالارىمىز اۋىرماسا ەكەن دەيمىز. ٴسابي ٴولىمىن بولدىرماۋ ٴۇشىن ونىڭ الدىن الىپ، اۋرۋدى ەرتە كەزەڭىندە انىقتاۋ كەرەك. مۇنداي زاماناۋي نەوناتالدى حيرۋرگيالىق ورتالىقتىڭ جۇمىسى وسىنداي ماڭىزدى ماسەلەنىڭ شەشىمىنە زور ىقپال ەتەتىنىنە سەنىمدىمىن، - دەي كەلە ارداگەر جينالعانداردى تاۋەلسىزدىك مەرەكەسىمەن قۇتتىقتادى.

جاس مامان، جاڭا نەوناتالدى حيرۋرگيا ورتالىعىنىڭ رەانيماتولوگ دارىگەرى ٴالياقپار بەك ۇلى قۇتتىقتاۋ تىلەگىنەن كەيىن ٴوزىنىڭ دارىگەرلىك تاجىريبەسىمەن ٴبولىستى:

- مەنىڭ تاجىريبەمدە جاڭا تۋعان سابيگە كۇردەلى وپەراسيا جاساۋ ٴۇشىن الماتى، استانا قالالارىنا تاسىمالداۋ جاعدايلارى ٴجيى كەزدەسەتىن، بۇل، ارينە، ۇلكەن ٴقاۋىپ بولاتىن. ونداي كەزدە ٴاربىر ساعات ەمەس، ٴتىپتى مينۋتتىڭ ٴوزى قىمباتقا تۇسەدى. سوندىقتان مۇنداي ورتالىقتىڭ تالدىقورعاندا اشىلۋى – شىنىندا دا ٴبىز ٴۇشىن ۇلكەن وقيعا. ٴبىز، دارىگەرلەر، ٴوز تاراپىمىزدان سابيلەردىڭ دەنساۋلىعى مەن ٴومىرىن ساقتاۋعا جانە نىعايتۋعا بار كۇش-جىگەرىمىزدى جۇمسايمىز، - دەدى.

عيماراتتىڭ لەنتاسى قيىلعان سوڭ وبلىس اكىمى ا. باتالوۆ باستاعان ازاماتتار نەوناتالدى حيرۋرگيا ورتالىعىنىڭ ٴىشىن ارالاپ كوردى. تاڭۋ، وتادان كەيىنگى جانە رەانيماسيالىق بولمەلەردە بولدى. قازىرگى كەزدە ورتالىقتا 5 بالا ەم الىپ جاتىر.

اتاپ وتسەك، نەوناتالدى حيرۋرگيالىق ورتالىق 60 توسەككە شاقتالعان، 20 پالاتاسى بار. رەانيماسيالىق بولىمدە 9 توسەك قويىلعان. ورتالىق جاڭا وزىق ۇلگىدەگى قۇرالدارمەن جابدىقتالعان. اتاپ ايتقاندا، لاپاروسكوپيالىق باعان، بەينەكولونوسكوپ، فيبروگاستروسكوپ، برونحوسكوپ، ناركوزدىق اپپاراتتار، يۆل، جاڭا تۋعان نارەستەگە ارنالعان «جيراف» رەانيماسيالىق ۇستەلى، فوتوتەراپيا اپپاراتتارى، كيۋۆەزدەر، رەانيماسيالىق توسەكتەر بار.

وتكەن جىلدىڭ مامىر ايىنان «الماتى – constuction بم» جشس ورتالىققا ارنالعان قوسالقى عيماراتتىڭ قۇرىلىسىن باستاپ، بيىلعى جىلدىڭ تامىز ايىندا اياقتاعان بولاتىن. جوبانىڭ قۇنى - 896،2 ملن. تەڭگە. جاڭا نەوناتالدى ورتالىقتىڭ مىندەتى – جاڭا تۋعان سابيلەرگە جانە بالالارعا كورسەتىلەتىن مەديسينالىق كومەكتى جەتىلدىرۋ.

جالپى الماتى وبلىسىندا مەديسينا ماماندارىنىڭ بىلىكتىلىگىن ارتتىرۋعا، ولاردى قايتا دايارلاۋعا كوپ كوڭىل بولىنەدى. بۇل ماقساتقا 2018 جىلى جەرگىلىكتى بيۋدجەتتەن 201،5 ملن. تەڭگە بولىنگەن. سونىڭ ناتيجەسىندە ٴوڭىردىڭ مەديسينا قىزمەتكەرلەرى شەتەلدىڭ وزىق كلينيكالارىندا تاجىريبە الماسۋعا، بەلگىلى كلينيكالاردىڭ جوعارى بىلىكتى ماماندارىنان ٴدارىس تىڭداۋعا مۇمكىندىك الدى. ماسەلەن، 2018 جىلى 344 مامان ليتۆا، پولشا، وڭتۇستىك كورەيا، تۇركيا كادرلارىنان ٴدارىس الدى. سول سياقتى يزرايل، وڭتۇستىك كورەيا، تۇركيا ەلدەرىندە قابىلداۋ ٴبولىمىنىڭ جۇمىسىن جەتىلدىرۋ، لاپاروسكوپيالىق تەحنيكامەن جۇمىس ىستەۋ، ترياج جۇيەسى بويىنشا مەديسينالىق سۇرىپتاۋعا قاتىستى تاعىلىمدادان ٴوتتى. ەلباسىنىڭ جولداۋدا قويعان مىندەتتەرىن ورىنداۋ ماقساتىندا 50 مەديسينا مامانى ليتۆاعا اكۋشەرلىك پەن نەوناتولوگيادا كۇردەلى جاعدايدا بوساندىرۋ بويىنشا وقۋعا جىبەرىلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي