BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا ونكولوگيالىق ورتالىقتىڭ قۇرىلىسى باستالادى

استانا، baq.kz. قر دەنساۋلىق ساقتاۋ مينيسترلىگىندە مينيستر ەلجان ٴبىرتانوۆتىڭ توراعالىعىمەن استانا قالاسىندا ۇلتتىق عىلىمي ونكولوگيالىق ورتالىعىن قۇرۋ جونىندەگى تۇراقتى جۇمىس ىستەيتىن جۇمىس توبىنىڭ وتىرىسى ٴوتتى.

وسى ورتالىقتىڭ قۇرىلىسى 2019 جىلى باستالاتىن بولادى.

اعىمداعى جىلى قر دەنساۋلىق ساقتاۋ مينيسترلىگى قاجەتتى ۇيىمداستىرۋشىلىق-دايىندىق ٴىس-شارالارىن باستاپ كەتتى.

ماسەلەن، استانا قالاسىندا ۇلتتىق عىلىمي ونكولوگيالىق ورتالىعىن سالۋ بويىنشا جوبالاۋ-سمەتالىق قۇجاتتاماسىن ازىرلەۋگە شارت جاسالدى.

جۇمىس توبىندا ۇلتتىق عىلىمي ونكولوگيالىق ورتالىعىن قۇرۋ بويىنشا جول كارتاسىن ىسكە اسىرۋ ماسەلەسى، جوبالاۋعا ارنالعان تەحنيكالىق تاپسىرما، بولاشاق ورتالىقتىڭ قۇرىلىمى تالقىلاندى.

ورتالىق ساۋلەلىك جانە پروتوندىق تەراپيانى كورسەتۋ ٴۇشىن قازىرگى زامانعى دياگنوستيكالاۋ جانە ەمدەۋ جابدىقتارىمەن، ونىڭ ىشىندە مەملەكەتتىك-جەكەشەلىك ارىپتەستىكتىڭ ٴتيىمدى مودەلىن قولدانا وتىرىپ، جاراقتالاتىن بولادى.

ۇلتتىق عىلىمي ونكولوگيالىق ورتالىقتا جىل سايىن ستاسيونارلىق كومەك كورسەتۋ جاعدايىندا شامامەن 6000 پاسيەنت جانە امبۋلاتوريالىق كومەك كورسەتۋ جاعدايىندا 30 000 اسا پاسيەنت جوعارى تەحنولوگيالىق مەديسينالىق قىزمەتتى قولدانا وتىرىپ، مەديسينالىق كومەك الاتىن بولادى. قازىرگى زامانعى ساۋلەلىك تەراپيا 4000 پاسيەنتكە كورسەتىلەتىن بولادى. 10000 اسا پاسيەنت يادرولىق مەديسينانى قولدانا وتىرىپ، ونكولوگيالىق سىرقاتتاردى دياگنوستيكالاۋ جانە ەمدەۋ مۇمكىندىگىن الادى.

جاڭا ورتالىقتى قۇرۋ جونىندەگى جۇمىس الەمدىك جەتەكشى ونكولوگيالىق ورتالىقتار قاتارىنان ستراتەگيالىق ارىپتەستەرمەن، نازاربايەۆ ۋنيۆەرسيتەتىنىڭ عىلىم جانە ٴومىر ورتالىعىمەن تىعىز ىنتىماقتاستىقتا، سونداي-اق حالىقارالىق جانە وتاندىق سراپشىلاردى تارتا وتىرىپ، جۇزەگە اسىرىلاتىن بولادى.

ۇلتتىق عىلىمي ونكولوگيالىق ورتالىعىن قۇرۋ جونىندەگى جۇمىستى دەنساۋلىق ساقتاۋ مينيسترلىگىنىڭ مەملەكەت باسشىسى ن.ٴا. نازاربايەۆتىڭ 2018 جىلعى 10 قاڭتارداعى «ٴتورتىنشى ونەركاسىپتىك رەۆوليۋسيا جاعدايىنداعى دامۋدىڭ جاڭا مۇمكىندىكتەرى» جانە 2018 جىلعى 5 قازانداعى «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋلارىن ىسكە اسىرۋ ماقساتىندا جۇرگىزىپ جاتقانىن ەستەرىڭىزگە سالامىز.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي