استانا: 
3947 
0
استانا، baq.kz ٴتىلشىسى. قىركۇيەك ايىندا استانا قالاسىنىڭ №2 كوپبەيىندى قالالىق اۋرۋحاناسىنىڭ اكۋشەرلىك بولىمىنە جۇكتى ايەل اۋىر جۇرەك سىرقاتىمەن تۇسكەن. دارىگەرلەر شۇعىل تۇردە وتا جاساپ، انا مەن بالانىڭ ٴومىرىن ساقتاپ قالعان. بۇل تۋرالى اۋرۋحانا ماماندارى مەن باسقارما قىزمەتكەرلەرى تولىعىراق ايتىپ بەردى.
ٴارتۇرلى كارديولوگيالىق جانە وكپە پاتولوگيالارى انىقتالعان 1987 جىلعى ايەل جۇكتىلىكتىڭ 35-اپتاسىندا بولعان. مۇنداي پاتولوگيالارمەن ەلوردا دارىگەرلەرى العاش رەت كەزدەسىپ وتىر.
«شۇعىل تۇردە كەرەكتى دياگنوستيكالىق جانە لابوراتوريالىق، سالادىق مامانداردىڭ تەكسەرۋىنەن وتكىزگەن سوڭ "قولقانىڭ جوعارىلاعان بولىگىنىڭ وتكىر قاباتتانۋ انەۆريزماسى" دياگنوزى قويىلدى»، - دەيدى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ٴاليا رۇستەموۆا.
قۇرامىندا قوعامدىق دەنساۋلىق ساقتاۋ باسقارماسىنىڭ باسشىلارى، باس دارىگەر، باس ماماندار مەن ٴبولىم مەڭگەرۋشىلەرىنىڭ قاتىسۋىمەن كونسيليۋم وتكىزىلىپ، تەز ارادا وتا جاساۋ جونىندە شەشىم قابىلدانعان.
«الدىمەن اكۋشەر-گينەكولوگتار نارەستەنى كەسارەۆو ادىسىمەن دۇنيەگە كەلتىرىپ الىپ، ودان كەيىن كارديوحيرۋرگتەر جۇرەگىنە وتا جاسادى»، - دەيدى ٴاليا رۇستەموۆا.
وتا جاسالعان ناۋقاس ارادا 13 تاۋلىك وتكەن سوڭ جانساقتاۋ بولىمىنەن كارديوحيرۋرگيا بولىمىنە اۋىستىرىلعان. نارەستەسىنىڭ دە، ٴوزىنىڭ دە جانى امان قالعان سابيرا ابەنوۆا قۋانىشىندا شەك جوق ەكەنىن ايتىپ، دارىگەرلەرگە العىس ايتتى.
«بۇل - مەنىڭ ەكىنشى ۇلىم. ەسىمى - نۇرباقىت. جۇكتىلىك كەزىندە دەنساۋلىعىم سىر بەرگەن جوق. ٴوزىمدى جاقسى سەزىندىم. اياق استىنان وسىنداي جاعداي بولىپ قالادى دەپ كىم ويلاعان. اجالدان اراشالاپ قالعان دارىگەرلەرگە ايتار العىسىم شەكسىز»، - دەيدى ول.
ادەتتە بۇل دياگنوز بويىنشا وتا جاساۋدىڭ سوڭى 95% جاعدايدا ولىممەن اياقتالادى. پەرىشتەسى قاققان ٴسابيدىڭ اكەسى باعدات قۋانىش ۇلى دا دارىگەرلەرگە العىس ايتىپ، ٴوز ويىمەن ٴبولىستى.
«جۇبايىم 13 كۇن بويى جانساقتاۋ بولىمىندە جاتتى. شىنىمدى ايتسام، ٴۇمىتىم ٴۇزىلىپ، ايەلىمنىڭ بەتى بەرى قارايتىنىنان كۇدەر ۇزە باستادىم. ٴسابيىم ەكەۋىنىڭ ومىرگە قايتا ورالعانى ٴۇشىن الدىمەن اللاعا، ودان كەيىن دەمالىس كۇنى بولعانىنا قاراماستان اياقتارىنان تىك تۇرىپ قىزمەت ەتىپ، وتا جاساعان دارىگەرلەرگە راقمەت ايتام»، - دەيدى ول.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2870
0