BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ايتۆ جانە جيتس تۋرالى نە ٴبىلۋ كەرەك؟

استانا، baq.kz. قوعامدىق دەنساۋلىق ساقتاۋ ۇلتتىق ورتالىعى جۇقپالى اۋرۋلاردىڭ الدىن-الۋ دەپارتامەنتىنىڭ ديرەكتورى البەرت اسقاروۆ ايتۆ-ينفەكسياسى – ياعني ادامنىڭ يممۋن تاپشىلىعى ۆيرۋسى تۋدىراتىن باياۋ داميتىن اۋرۋ جايلى نەگىزگى سۇراقتارعا جاۋاپ بەردى.

ادامنىڭ يممۋندىق جۇيەسىن بۇزا وتىرىپ، ايتۆ باسقا دا ينفەكسيالىق اۋرۋلاردىڭ دامۋىنا اسەر ەتەدى، ويتكەنى يممۋندىق جۇيە ورگانيزمدى اۋرۋ تۋدىراتىن ميكروورگانيزمدەردەن قورعاۋ قابىلەتىن جوعالتادى. ايتۆ ينفەكسياسىن جۇقتىرعان ادام ۋاقىت وتە كەلە ساۋ ادامدار ٴۇشىن ەشقانداي ٴقاۋىپ كەلتىرمەيتىن ميكروورگانيزمدەردىڭ ٴوزىن تەز قابىلدايتىن بولادى.

- ايتۆ قالاي جۇعادى؟

- ٴايتۆ-تىڭ جۇعۋ جولدارى: ناۋقاس ادامنىڭ قانىمەن بايلانىس: ايتۆ-پەن جۇقتىرىلعان قاندى قۇيۋ كەزىندە، ەسىرتكىلەردى كوكتامىرعا ەنگىزۋ ٴۇشىن ينەلەردى، شپريستەردى جانە باسقا دا ماتەريالداردى بىرگە قولدانعاندا، ٴايتۆ-تىڭ جۇكتىلىك كەزىندە ٴايتۆ-تى جۇقتىرعان اناسىنىڭ قانىمەن بالاعا بەرىلگەندە. ناۋقاس ادامنىڭ شاۋەتىمەن، قىنابىنان شىققان بولىندىلەرىمەن بايلانىس: مۇشەقاپ قولدانىلماعان جىنىستىق قاتىناس كەزىندە. ٴايتۆ-تى جۇقتىرعان انانىڭ بالاسىن ەمشەكپەن ەمىزۋى كەزىندە. جۇقتىرىلۋ تەك ينفەكسيالانعان قان، شاۋەت، قىناپ بولىندىلەرى جانە انا ٴسۇتى ارقىلى عانا ورىن الۋى مۇمكىن.

- ايتۆ سىلەكەي ارقىلى، قول قىسقان، ٴبىر ىدىستان ىشكەن كەزدە جۇعا ما؟

- ايتۆ - ينفەكسياسى ٴزار، ٴناجىس، قۇسىق، سىلەكەي، كوز جاسى جانە تەر ارقىلى بەرىلمەيدى. ايتۆ – ينفەكسياسى جاناسقاندا، قول قىسقان كەزدە، سۇيگەندە، ماسساج كەزىندە، ٴبىر توسەكتە بىرگە جاتقان كەزدە، ٴبىر توسەك-ورىن جابدىعىن قولدانعاندا، ٴبىر ىدىستان ىشكەن كەزدە جۇقپايدى. سونداي-اق، ۋنيتازدىڭ وتىرعىشى ارقىلى، جوتەلگەن كەزدە، تۇشكىرگەندە نەمەسە ماسا شاققان كەزدە ينفەكسيا جۇقپايدى.

- قاۋىپ-قاتەر توبىنا كىمدەر جاتادى؟

- قاۋىپ-قاتەر توبىنا نەگىزىنەن ينەكسيالىق ەسىرتكىلەردى پايدالاناتىن ناشاقورلار; ولاردىڭ جىنىستىق سەرىكتەستەرى; بەيبەرەكەت جىنىستىق قاتىناستارعا تۇسەتىن ادامدار، سونداي-اق تابيعي ەمەس سەكسپەن اينالىساتىندار;

جەزوكشەلەر جانە ولاردىڭ كليەنتتەرى; دونورلار جانە قان قۇيۋدى نەمەسە ورگانداردى ترانسپلانتاسيالاۋدى قاجەت ەتەتىن ادامدار; ۆەنەرولوگيالىق اۋرۋلارعا شالدىققان ادامدار جاتادى.

- ادام ايتۆ جۇقتىرعانىن قالاي بىلە الادى؟

- ٴايتۆ-تى جۇقتىرعاننان كەيىن قاندا پايدا بولاتىن انتيدەنەلەردى قاننىڭ ارنايى ٴاناليزى كەزىندە تابۋعا بولادى. انتيدەنەلەردى تابۋ ادامنىڭ ايتۆ-نى جۇقتىرعانىن كورسەتەدى. الايدا، انتيدەنەلەر قاندا ايتۆ-نى جۇقتىرعاننان كەيىن 3-6 ايدان سوڭ عانا تابىلۋى مۇمكىن، سوندىقتان كەيبىر كەزدە ايتۆ-نى جۇقتىرعانىنا بىرنەشە اي بولعان ادام قانىنىڭ ٴاناليزى تەرىس ناتيجە كورسەتەدى.

ايتۆ-نى جۇقتىرعان كەزدە كوپتەگەن ادامدار ەشقانداي سيمپتومداردى بايقامايدى. ايتۆ-نى جۇقتىرعاننان كەيىن ادام ۇزاق جىلدار بويى ٴوزىن جاقسى سەزىنۋى مۇمكىن. بۇل كەزەڭ اۋرۋدىڭ جاسىرىن (لاتەنتتى) ساتىسى دەپ اتالادى.

- جيتس دەگەن نە؟

- جيتسجۇقتىرىلعان يممۋن تاپشىلىعى سيندرومى – بۇل ايتۆ-پەن زاقىمدالعاننان كەيىن يممۋندىق جۇيەنىڭ جەتكىلىكسىز جۇمىسىنان پايدا بولاتىن اۋرۋلاردىڭ جينالۋى.

جيتس ٴايتۆ-تى جۇقتىرعان ادامدا ينفەكسيالىق جانە ۆيرۋسپەن بۇزىلعان يممۋندىق جۇيەنىڭ ٴتيىمسىز جۇمىسىمەن بايلانىستى باسقا دا اۋرۋلار پايدا بولعان كەزدە داميدى.

- اۋرۋدى قالاي الدىن الۋعا بولادى؟

- الدىن الۋ شارالارى مىناداي:

- بەيبەرەكەت جىنىستىق قاتىناستاردان باس تارتۋ;

- جىنىستىق قاتىناس كەزىندە قورعانىس قۇرالدارىن مىندەتتى تۇردە قولدانۋ (ٴقاۋىپسىز سەكس);

- ەسىرتكىنى پايدالانۋدان باس تارتۋ نەمەسە ولاردى پايدالانعان كەزدە ٴبىر رەت قولدانىلاتىن شپريستەردى پايدالانۋ;

- ينۆازيالاردىڭ ەنۋى كەزىندە ستەريلدى مەديسينالىق جانە مەديسينالىق ەمەس اسپاپتاردى قولدانۋ;

- ٴتيىستى كونتينگەنتتى ايتۆ-ينفەكسياسىنا ۋاقىتىندا تەكسەرۋدى جۇرگىزۋ;

- تەك ايتۆ-تەن تەكسەرىلگەن قاندى عانا جانە ونىڭ پرەپاراتتارىن قۇيۋ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي