BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ساعىنتايەۆ دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورىمەن كەزدەستى

استانا، baq.kz. استانادا پرەمەر-مينيسترى باقىتجان ساعىنتايەۆ قازاقستانعا دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋسپەن كەزدەسۋ وتكىزدى.

كەزدەسۋ بارىسىندا الەمدە دەنساۋلىق ساقتاۋ جۇيەسىن دامىتۋعا، مەديسينالىق قىزمەتتەر مەن ٴبىلىمنىڭ ساپاسى مەن قولجەتىمدىلىگىن ارتتىرۋعا، سونداي-اق دەنساۋلىق ساقتاۋ ينفراقۇرىلىمىن جەتىلدىرۋ اياسىندا زاماناۋي سيفرلىق تەحنولوگيالاردى ەنگىزۋگە قاتىستى ٴوزارا ٴىس-قيمىل جانە ورتاق تاسىلدەردى ازىرلەۋ ماسەلەلەرى تالقىلاندى، دەپ جازادى primeminister.kz.

ساعىنتايەۆ تەدروس گەبرەيەسۋس مىرزاعا العاشقى مەديسينالىق-سانيتارلىق كومەك جونىندەگى الماتى دەكلاراسياسى قابىلدانعان كۇننەن بەرى 40 جىل وتۋىنە وراي وتكىزىلگەلى جاتقان جاھاندىق كونفەرەنسيانى ۇيىمداستىرۋعا كورسەتكەن قولداۋى ٴۇشىن العىس ايتىپ، وسىنداي ماڭىزدى قورىتىندى قۇجات قابىلداناتىنىنا سەنىم ٴبىلدىردى.

1978 جىلى الماتى قالاسىندا الەمدەگى دەنساۋلىق ساقتاۋ سالاسىن دامىتۋعا ەلەۋلى اسەر ەتكەن العاشقى مەديسينالىق-سانيتارلىق كومەك جونىندەگى الماتى دەكلاراسياسى قابىلداندى. اتالعان اۋقىمدى شارانىڭ ارقاسىندا قازاقستاننىڭ الەمدىك دەنساۋلىق ساقتاۋ قوعامداستىعى الدىندا بەدەلى ارتتى.

ەلىمىز دۇنيەجۇزىلىك دەنساۋلىق ساقتاۋ ۇيىمىنا 1992 جىلدىڭ 19 تامىزىندا، ۇيىمنىڭ 180-مۇشەسى بولىپ قوسىلدى. قازاقستان گەوگرافيالىق جاعىنان ددسۇ-نىڭ ەۋروپالىق ايماعىنا جاتادى. بۇگىندە ددسۇ مۇشەلەرىنىڭ سانى 194 مەملەكەتكە جەتتى.

قازىرگى تاڭدا قازاقستان مەن ددسۇ اراسىندا تىعىز سەرىكتەستىك قاتىناستار قالىپتاسقان. ددسۇ شارالارى اياسىندا جۇقپالى ەمەس جانە جۇقپالى اۋرۋلارمەن، اسىرەسە پوليوميەليتپەن، تۋبەركۋلەزبەن كۇرەس جانە حالىقارالىق دەنساۋلىق ساقتاۋ ەرەجەلەرىن جان-جاقتى ناسيحاتتاۋ بويىنشا قارقىندى جۇمىس اتقارىلدى. ددسۇ انا مەن بالا دەنساۋلىعىن قورعاۋ، تۋبەركۋلەز جانە ايتۆ/جيتس الدىن-الۋ جانە باقىلاۋ، سانيتارلىق قىزمەت كورسەتۋدى جاقسارتۋ سەكىلدى مەملەكەتتىك ساياساتتى جۇزەگە اسىرۋدا قازاقستانعا تۇراقتى تەحنيكالىق جانە كونسۋلتاسيالىق كومەك كورسەتىپ كەلەدى. دەنساۋلىق ساقتاۋ سالاسىنداعى تۇراقتى دامۋ بويىنشا كوزدەگەن ماقساتتارعا جەتۋ ٴۇشىن كوپ جۇمىس جاسالۋدا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي