BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ك.ٴماسىموۆ مەدۆەدەۆپەن كەزدەسۋدە كەنەسارىنىڭ باس سۇيەگىن ەلگە قايتارۋ ماسەلەسىن كوتەرمەك

فوتو: qamshy.kz

قر پرەمەر-مينيسترى كارىم ٴماسىموۆ رەسەي پرەمەرى دميتريي مەدۆەدەۆپەن كەزدەسىپ، كەنەسارى حان مەن كەيكى باتىردىڭ باس سۇيەكتىرىن قايتارۋ ماسەلەسىن كوتەرەتىنىن ٴمالىم ەتتى - دەپ جازادى baq.kz ٴتىلشىسى.

بۇل تۋرالى پرەمەر-مينيستر ٴوزىنىڭ twitter-دەگى جەكە پاراقشاسىندا جازدى.

«د.ا.مەدۆەدەۆپەن كەزدەسۋدە كەنەسارى حان مەن كەيكى باتىردىڭ باستارىن قايتارۋ ماسەلەسىن كوتەرۋدى جوسپارلاپ وتىرمىن»، - دەپ جازدى كارىم ٴماسىموۆ.

ايتا كەتەرلىگى، بۇعان دەيىن كەنەسارى حان مەن كەيكى باتىردىڭ باسىن ەلگە اكەلۋ ماسەلەسى قوعامدا قىزۋ تالقىلاۋداعى ماسەلەلەر ەدى. ەگەر كارىم ٴماسىموۆ بۇل ٴىستى قولعا الىپ، ناتيجە شىعاراتىنداي بولسا، قازاق حالقىنىڭ عانا ەمەس، قازاقستان تاريحىنىڭ رۋحى ٴبىر كوتەرىلىپ قالار ەدى.

ەستەرىڭىزدە بولسا، قازاقتىڭ سوڭعى حانى كەنەسارىنىڭ باسىن قىرعىز ماناپتارى اق پاتشاعا تارتۋ ەتكەنى تاريحتان بەلگىلى. 1847 جىلى كەنەسارى حان قىرعىزستاننىڭ جەتىجال جوتاسىنىڭ وڭتۇستىك الابىنداعى كەكىلىك-سەڭگىر اڭعارىندا وسىلايشا ايۋاندىقپەن ولتىرىلەدى. جاۋلارى ونىڭ باسىن كەسىپ الىپ، ورىس اكىمشىلىگىنە جىبەردى. كنياز گورچاكوۆ كەنەسارىنىڭ باسىن باتىس ٴسىبىر باس باسقارماسىنداعى «كەنەسارى بۇلىگى تۋرالى» ىسكە قوسىپ ساقتاۋعا بۇيرىق بەردى.

ال ۇلت ازاتتىق قوزعالىسىنىڭ جەتەكشىلەرىنىڭ ٴبىرى، كەيكى (نۇرماعانبەت) كوكەمباي ۇلى (1871-1923) - 1916 جىلعى تورعايدا بولعان ۇلت-ازاتتىق كوتەرىلىسىنىڭ باتىرى، اتاقتى مەرگەن. ورتا ٴجۇز قۇرامىنداعى قىپشاق تايپاسىنىڭ قۇلانقىپشاق رۋىنان شىققان. قوستاناي وبلىسى امانكەلدى اۋدانىنىڭ بايتۋما قوپاسىندا دۇنيەگە كەلگەن.

ٴبىراز جىل ۇلىتاۋ، قىزىلقۇم جاعىندا بوي تاسالايدى. اقىرى، 1923 جىلدىڭ كوكتەمىندە ارنايى تاپسىرمامەن ٴوزىن الداپ قولعا تۇسىرۋگە كەلگەن كوميسسار ا.توكارەۆتىڭ سوزىنە سەنىپ تورعايعا ورالعان كەيكى جولدا ونىڭ شىن نيەتىن سەزىپ قالىپ، الەكساندر توكارەۆتى سول جەردە اتىپ تاستايدى. ٴبىراق كەيكىنىڭ ىزىنە ٴتۇسىپ، ارتىنان الىستان اڭدىپ ەرىپ كەلە جاتقان قىزىل اسكەردىڭ سولداتتارى، ونى سول كۇنى تۇندە جاتقان جەرىندە قورشاپ الىپ، ايۋاندىقپەن ولتىرەدى. ولار مەرگەننىڭ ەكى قولى مەن باسىن كەسىپ الادى. كەيكى باتىردىڭ باسىن ٴبىر اي بويى تورعاي قالاسىنىڭ ورتالىق الاڭىنا سىرىققا شانشىپ قويادى. كەيىن مەرگەننىڭ باس سۇيەگىن ورىنبورعا جونەلتەدى، ال 1926 جىلى رەسپۋبليكا استاناسى قىزىلورداعا كوشۋىنە بايلانىستى، سانكت-پەتەربورعا الىپ كەتكەن. ول ٴقازىر سانكت-پەتەربورداعى انتروپولوگيالىق قوردىڭ كۋنستكامەراسىندا ساقتاۋلى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي