تۇركىستانعا ميلليونىنشى تۋريست كەلدى

استانا، baq.kz. بۇگىن تۇركىستان قالاسىنا 1 ميلليونىنشى تۋريست كەلدى. اقش-تىڭ سولتۇستىك كورولينا شتاتىنان كەلگەن ەرلى-زايىپتى ۋيليام جانە باربارا برەنچتەردى تۇركىستان وبلىسىنىڭ اكىمى جانسەيىت تۇيمەبايەۆ ياساۋي كەسەنەسى الدىندا كۇتىپ الدى.

ەلىمىزگە العاش كەلىپ وتىرعان ۋيليام برەنچ امەريكا ازاماتتارى ورتا ازيا ەلدەرى ىشىندە تۇركىستانعا ٴجيى كەلەتىندەرىن جەتكىزدى.

«تۇركىستان – ورتا ازيا مەملەكەتتەرى ىشىندەگى تاريحقا باي، كيەلى مەكەندەردىڭ ٴبىرى. ٴبىزدىڭ ەلدىڭ ازاماتتارى وسى قاسيەتتى قالاعا ٴجيى كەلەدى. ٴبىز تۇركىستان قالاسى مەن ٴياساۋيدىڭ تاريحىمەن حاباردارمىز. قازاقستانعا، تۇركىستان وڭىرىنە كەلگەلى قازاق حالقىنىڭ قوناقجايلىعى مەن دارقاندىعىنا كۋا بولدىق. اقش-قا بارعاننان كەيىن ونداعى وتانداستارىمىزعا وسى قۇندىلىقتارىڭىزدى جەتكىزىپ، كەلەسى جىلى ارنايى تاعى ات باسىن بۇرامىز»، - دەدى ۋيليام برەنچ.

ايماق باسشىسى وبلىس ورتالىعىنا كەلگەن ميلليونىنشى قوناقتاردى قۇتتىقتاپ، ۇلتتىق شاپان كيگىزىپ، قامشى، تايقازان سىيلادى. سونداي-اق، تۇركىستان وڭىرىندە تۋريزم الەۋەتىن ارتتىرۋ ٴۇشىن ارتقارىلىپ جاتقان جۇمىستارمەن تانىستىردى.

«سىزدەردى قاسيەتتى قالامىزدىڭ ميلليونىنشى ٴتۋريسى بولعاندىرىڭىزبەن قۇتتىقتايمىن. بۇل بىزدەر ٴۇشىن قۋانىش. ماسەلەن، ٴدال بۇگىن تۇركىستان قالاسىنا كەلۋشىلەر سانى 1 ملن. ادامعا جەتىپ، وتكەن جىلدىڭ ٴدال وسى كەزىمەن سالىستىرعاندا 57،2 پايىزعا ارتىپ وتىر. سونىمەن قاتار، وڭىردە ٴتۋريزمدى دامىتۋ ٴۇشىن جۇيەلى باعدارلامالار دايارلادىق. الداعى ۋاقىتتا كەلۋشىلەر سانى تاعى ارتا تۇسەدى دەپ جوسپارلاپ وتىرمىز»، - دەدى جانسەيىت قانسەيىت ۇلى.

بۇدان وزگە، ورنالاستىرۋ ورىندارىمەن كورسەتىلگەن قىزمەت كولەمى 2018 جىلعى قاڭتار-ماۋسىم ارالىعىندا 543،7 ملن. تەڭگەگە جەتىپ، 2017 جىلدىڭ 6 ايىمەن سالىستىرعاندا ٴوسۋ قارقىنى 16،8 پايىزعا وسكەن. سونداي-اق، قازاقستاننىڭ تۋريستيفيكاسيالاۋ كارتاسىنىڭ رەسپۋبليكالىق ماڭىزى بار توپ-10 نىسانىنا وبلىستان «ازىرەت سۇلتان» قورىق-مۇراجايى ەنگىزىلگەن.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!