BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستاندىق تۋريستەرگە تۋركودسىز شەتەلگە شىعۋعا تىيىم سالىندى

فوتو: Казинформ

بۇدان بىلاي تۋريستىك كومپانيالار ارقىلى وزگە ەلگە بارىپ دەمالۋ ٴۇشىن مىندەتتى تۇردە ٴار ادامنىڭ جەكە كودى بولۋى ٴتيىس. ونسىز ساتىلعان جولدامالارمەن شەكارا اسۋ زاڭسىز بولىپ ەسەپتەلەدى.

سونداي-اق، وزگە مەملەكەتتە قالىپ قويعان تۋريستەردى قازاقستانعا قايتارۋعا كومەكتەسەتىن «تۋريستيك قامقور» دەگەن قور قۇرىلدى. جاڭا ۇيىمعا تۋروپەراتورلار تۇراقتى تۇردە اقشا اۋدارىپ وتىرادى دا، سول قارجىعا ٴتۋريستى وتانعا ورالۋىنا جۇمسالماق.

ۇكىمەت وتاندىق تۋريستەردىڭ قاۋىپسىزدىگىنە كوڭىل بولۋگە ٴماجبۇر. ويتكەنى، شەتەلگە دەمالۋعا شىققان جۇرتتىڭ بار اقشاسىن جيناپ الىپ، تاقىرعا وتىرعىزاتىن تۋريستىك كومپانيالار كوبەيىپ كەتكەن. ماسەلەن، سوڭعى جىلدارى «گۇلنار تۋر»، «ترەۆەلسيستەم» سىندى تۋروپەراتورلارعا 12 مىڭنان استام ادام الدانعان بولاتىن. ەلىمىزدە جىلدا قايتالاناتىن وسى ماسەلەنى شەشۋ ٴۇشىن «تۋريستيك قامقور» دەپ اتالاتىن قور قۇرىلدى.

«شەتەلگە ازاماتتار جىبەرەتىن تۋركومپانيالار وسى جۇيەنىڭ مۇشەسى بولىپ، ٴاربىر جاساسقان كەلىسىم شارتتان بەلگىلى ٴبىر اقشا سوماسىن اۋدارۋ كەرەك بولادى. ول اقشانىڭ سوماسى جوعارى ەمەس. قازىرگى كۇنى 1060 تەڭگەنى قۇرايدى. وسى قور ەسەبىنەن تۋريستەردى قايتارۋ قامتاماسىز ەتىلەدى»، - دەيدى قر ينۆەستيسيالار جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى تەمىرعالي تىرمىشەۆ.

ياعني، قورداعى اقشا تۋريستىك كومپانيا ارقىلى شەتەلگە دەمالۋعا كەتىپ، ەلگە ورالا الماي جۇرگەن تۋريستەرگە كومەكتەسۋگە جۇمسالماق. ازىرگە جينالعان قارجى 180 ميلليون تەڭگە. بۇل بىرنەشە ۇشاقتى جالعا الىپ، جولاۋشىلاردى تاسىمالداۋعا عانا جەتەدى ەكەن.

«تۋريستيك قامقور» قورى بۇدان بولەك تۋريستىك كومپانيادان كليەنتكە كورسەتىلەتىن بارلىق قىزمەت ٴتۇرى جازىلعان كود تالاپ ەتەدى. ٴار ٴتۋريستىڭ جەكە كودى بولادى. شەتەلگە كەتكەن ادامعا سول قۇپيا سان ارقىلى كومەك كورسەتەمىز»، - دەدى «تۋريستيك قامقور» قورىنىڭ ٴتورايىمى يننا رەي.

قورعا ٴقازىر 40 استام تۋريستىك كومپانيا تىركەلىپتى. ولاردىڭ بارلىعى «تۋريستيك قامقور»-عا ٴار كليەنت ٴۇشىن 1060 تەڭگەدەن تولەپ، كود ساتىپ الادى. ونسىز بەرىلگەن جولداما زاڭسىز.

«تۋريست ٴۇشىن 1060 تەڭگە ۇلكەن شىعىن ەمەس. ازاماتتار ارتىق اقشا تولەمەيدى، ول جولدامانىڭ قۇنىنا كىرەدى. ال ٴبىر ايدا 500 استام ادامدى شەتەلگە جىبەرەتىن تۋريستىك كومپانيا ٴۇشىن اۋىر بولادى. ٴبىراق بۇل جۇيە تۋريستەردىڭ قاۋىپسىزدىگى ٴۇشىن وتە قاجەت»، - دەيدى تۋريستىك كومپانيانىڭ ديرەكتورى ٴاسيام كارىموۆا.

كتك


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي