BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قاراعاندىنىڭ قىزىلارايى تۋريستەردىڭ تابانى تيمەي قور بولىپ تۇر ەكسكليۋزيۆ

قاراعاندى وبلىسىنداعى تۋريزم دەگەندە ەسكە الدىمەن قارقارالى تاۋلارى مەن بالقاش كولى تۇسەتىنى داۋسىز. ال، ورتالىق قازاقستاننىڭ ەڭ بيىك نۇكتەسى – اقسوراڭ شىڭى ورنالاسقان قىزىلاراي تاۋلارىن ٴبىرى بىلسە، ٴبىرى بىلمەيدى. قىزىلارايدىڭ قولمەن قۇيعانداي اسەم تابيعاتى، كورىكتى جەرلەرى، تاريحي ەسكەرتكىشتەرى وسى وڭىردە ٴتۋريزمدى دامىتۋعا سۇرانىپ تۇر، دەپ جازادى baq.ٴkz-تىڭ قاراعاندىداعى ٴتىلشىسى.

الەمدىك تاجىريبە ارقىلى كوز جەتكىزەتىنىمىز، تۋريزم – تولاعاي تابىستىڭ قاينار كوزى عانا ەمەس، ەلدى الەمگە تانىتۋدىڭ ۇتىمدى ٴادىسى. قازاقستاننىڭ قارقىندى دامۋى شەتەلدىكتەردىڭ قازاق مادەنيەتىنە، تۇرمىس-تىرشىلىگىنە دەگەن قىزىعۋشىلىعىن كۇن سايىن ارتتىرىپ وتىر. وسىندايدا ەلگە كەلە قالعان مەيماننىڭ نازارىنا ۇسىناتىن كورىكتى جەرلەر قازاقستاندا، قۇدايعا شۇكىر، جەتىپ ارتىلادى. ٴبىر عانا قاراعاندى وبلىسى تابيعي تارتىمدىلىعىمەن قانشاما شەتەلدىك ٴتۋريستى باۋراپ الارى داۋسىز. ماسەلەن، قارقارالىنىڭ تاۋلارى تەك قازاقستاندىقتارعا عانا ەمەس، شەتەلدىكتەرگە دە تانىس ايماق. بالقاش كولى دە جاز باستالىسىمەن تۋريستەر قابىلداۋعا دايىن. ٴبىراق، شەتەلدىك تۇرماق قازاقتاردىڭ ٴوزى بىلە قويمايتىن قىزىلاراي تۋريستەردىڭ تابانى تيمەي قور بولىپ تۇر.

قىزىلاراي ولكەسىندە ەتنوتۋريزمدى دامىتۋدىڭ العىشارتتارى دايىن. تاريحي ەسكەرتكىشتەر، بولمىسى بۇزىلماعان تابيعات، ٴتۇر-تۇسى قۇبىلعان وسىمدىكتەر، سيرەك كەزدەسەتىن جانۋارلار دۇنيەسى تۋريستەردىڭ كوڭىلىنەن شىعارى داۋسىز. قولا داۋىرىنە ٴتان وركەنيەت پەن مادەنيەتتىڭ ارحەولوگيالىق وشاعىنا اينالعان ايگىلى «بەعازى تاريحي كەشەنى» دە وسى ولكەدە ورنالاسقان. تاۋدىڭ تازا اۋاسى، كاۋسار بۇلاعى، ادام اياعى باسپاعان تابيعات عاجايىپتارى ەتنوتۋريزمنىڭ تالاپتارىن تولىق قاناعاتتاندىرارى انىق. الايدا، اتتەگەن-ايى سول، سۇلۋ تولكەنىڭ تۋريستىك قابىلەتى كۇنى بۇگىنگە دەيىن ٴتيىستى دەڭگەيدە ەلەنبەي كەلەدى.

وسى ورايدا، جەرگىلىكتى ٴتۋريزمدى دامىتۋدىڭ باستى پروبلەماسى – توز-توزى شىققان جول. تۋريست كەلمەك تۇگىلى، جەرگىلىكتى حالىق ارەڭ قاتىنايتىن تىرشىلىك جەلىسى جاقىن ارادا كۇردەلى جوندەۋدەن وتەدى دەپ سەندىردى مۇنداعى اتقامىنەرلەر. اقتوعاي اۋدانى ٴماسليحاتىنىڭ حاتشىسى راشيد ابەۋوۆتىڭ ايتۋىنشا، 2018 جىلى اقتوعاي-قىزىلاراي باعىتىنداعى كوتەرمە جول اسفالتالماق.

«جاسىراتىن نەسى بار، اۋداندا كوڭىل بولىنبەي وتىرعان بۋىننىڭ ٴبىرى – وسى تۋريزم ٴىسى. ونىڭ باستى سەبەبىنە جەر شالعايلىعىن، جول ناشارلىعىن جاتقىزۋعا بولادى. ايتكەنمەن، بۇل ماسەلە شەشىمىن تابادى دەگەن سەنىمدەمىن. سەبەبى، 2018 جىلى اقتوعاي-قىزىلاراي باعىتىنداعى جول اسفالتالىنىپ، وعان قوسا قىزىلاراي-قارقارالى باعىتىنداعى كوتەرمە جولدىڭ قۇرىلىسى باستالماق. بۇل دەگەنىڭىز قىزىلارايعا تەك اقتوعاي ارقىلى عانا ەمەس، قارقارالى ارقىلى دا كەلۋگە بولادى دەگەن ٴسوز»، - دەدى ر.ابەۋوۆ.

سوڭعى ۋاقىتتا اشىق اسپان اياسىندا تابيعاتتى اسىقپاي ارالاپ، ۇلتتىق ٴسالت-داستۇر مەن ونەردى تاماشالاۋ ارقىلى ۇمىتىلماس اسەر الاتىن ٴتۋريزمنىڭ ٴتۇرى – ەكوتۋريزم ساياحاتشىلار اراسىندا مول سۇرانىستا. ەكزوتيكالىق كورىنىستەردى قىزىقتاۋعا قۇمار شەتەلدىك تۋريستەردى اتقا، تۇيەگە مىڭگىزىپ، قازاقتىڭ كيىز ۇيىندە قوناق قىلىپ، كوشپەلى ومىرگە ٴسال بولسا دا جاقىنداتۋ ارقىلى قازاقستان الەمدىك تۋريزم سالاسىندا جاڭا قىرىنان تانىلار ەدى. مۇنداي دەمالىستان شەتەلدىكتەر تۇرماق، جەرگىلىكتى قازاقتار دا باس تارتپايتىنى انىق. ەندەشە، قىزىلارايدىڭ كورسە كوز تويمايتىن سۇلۋ تابيعاتىن قازاقستان ٴتۋريزمىن ورلەتۋدە باعا جەتپەس قازىنا دەپ باعالاۋ قاجەت.

جالپى، قالتالى قوناق اعىل-تەگىل ايماقتاردىڭ حالقى دا اۋقاتتى تۇراتىنى بەلگىلى. وسى ورايدا تەك مالمەن كۇنەلتكەن جەرگىلىكتى حالىق قىزىلاراي تاۋلارىنا تۋريستەر كوپتەپ تارتىلسا، اۋىلدىڭ احۋالى جاقسارا تۇسەدى دەگەن ۇمىتتە.

«اۋىلدا تەك ٴبىر عانا شارۋا قوجالىعى ەگىن ەگۋمەن اينالسادى. حالىقتىڭ تۇرمىسى تىكەلەي مال شارۋاشىلىعىنا تاۋەلدى. وزدەرىڭىز كورىپ وتىرعانداي، قىزىلارايدىڭ تابيعاتى وسى ايماقتا ٴتۋريزمدى دامىتۋعا سۇرانىپ-اق تۇر. ەگەر اۋىلدى اۋدان ورتالىعىمەن قوساتىن جول اسفالتتالىپ، تۋريزم سالاسى دامىسا، ەل ەڭسەسىن كوتەرىپ، شاعىن جانە ورتا بيزنەستى ورلەتۋگە دە ۇلكەن مۇمكىندىك تۋار ەدى»، - دەيدى قىزىلاراي اۋىلىنىڭ تۇرعىندارى.

ٴبىزدى وزگەلەردەن ەرەكشەلەيتىن باي مادەنيەتىمىز، ٴسالت-داستۇرىمىز بار. ۇلتتىق «برەند» دەگەنىمىز دە – وسى. ٴتورت بۇرىشى قازىنا-بايلىققا تولى قازاق جەرىندە «قايماعى بۇزىلماعان» قىزىلارايداي «مارجانىمىزعا» مەملەكەتىمىزدىڭ نازارى اۋسا، قاراعاندىنىڭ تۋريستىك قابىلەتى نيعايا تۇسەرى ٴسوزسىز.

سۋرەتتەر عالامتوردان الىندى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي