BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلىمىزدىڭ ەڭ تانىمال 10 عيماراتى ەكسكليۋزيۆ

كەزەكتى «ەكسپو» حالىقارالىق كورمەسىن وتكىزەتىن ەل مارتەبەسى قازاقستانعا بۇيىرعاندىعى بەلگىلى. بۇل كورمە بۇكىل الەمدىك قوعامداستىقتىڭ جانە ونى تاماشالاۋشى ميلليونداعان ادامنىڭ نازارىن قازاقستانعا اۋداراتىن ٴىرى وقيعا بولادى دەپ كۇتىلۋدە. ەندەشە، بۇنى ەلىمىزدىڭ تۋريستىك سالاسىن دامىتۋعا ۇلەس قوساتىن ۇلكەن مۇمكىندىك دەپ باعالايىق. وسى ورايدا نازارلارىڭىزعا ەلىمىزدىڭ ەڭ تانىمال 10 عيماراتىن ۇسىنامىز، دەپ حابارلايدى baq.ٴkz-تىڭ قاراعاندىداعى ٴتىلشىسى.

10-ورىن. قازاقستان مەملەكەتتىك سيركى

قازاقتىڭ كيىز ۇيىنە ۇقساس عيمارات 1972 جىلى قولدانىسقا بەرىلگەن. شەڭبەرلەنىپ كەلگەن عيمارات توبەسى كۇمبەزدەلىپ جابىلعان. سيرك امفيتەاترىن (2160 ورىندى) كومكەرگەن 2 قاباتتى فويەدە كيىم ىلگىش پەن ٴدامحانالار، ال اكىمشىلىك عيماراتىندا ٴقوناق-ۇي، ارتىستەر بولمەلەرى، جاتتىعۋ مانەجى، حايۋاناتتار قوراسى جانە ت.ب. ورنالاسقان. حايۋاناتتاردى سەرۋەندەتۋگە ارنالعان ىشكى اۋلاسى دا بار.

كەڭەس ۇكىمەتى تاراعاننان كەيىن سيرك عيماراتى جەكە مەنشىككە ٴوتىپ، توقىراۋ جىلدارىن باسىنان وتكەردى. سيرككە جوندەۋ جۇمىستارى مۇلدەم جۇرگىزىلمەي، عيماراتىنىڭ مەملەكەت الدىنداعى قارىزى 50 ملن-نان اسىپ كەتتى. 2002 جىلى سيرك الماتى قالالىق اكىمشىلىگىنە قايتارىلدى. ٴقازىر قازاقستان رەسپۋبليكاسىنىڭ «مادەنيت تۋرالى» زاڭىنا سايكەس، 2014 جىلدان باستاپ جەكەمەنشىككە بەرىلمەيتىن عيماراتتار قاتارىندا.

2003 جىلى مەملەكەت قازىناسىنان 100 ملن تەڭگە ٴبولىنىپ، سيرككە تولىقتاي قايتا جوندەۋ جۇمىستارى جۇرگىزىلدى. 2013 جىلى الماتى قالالىق بيۋدجەتىنىڭ ەسەبىنەن 339 827 000 تەڭگە قارجى ٴبولىنىپ، سيركتىڭ قوناق ٴۇيى دە جوندەۋدەن ٴوتتى. ٴقازىر «قازاق مەملەكەتتىك سيركىنىڭ» قوناق ٴۇيى «3 جۇلدىز» ساناتىنا جاتادى. حالىقارالىق ستاندارتتارعا ساي قوناق ۇيدە گاسترولدىك ساپارمەن كەلەتىن سيرك ۇجىمجارى، تۋريستەر مەن قالا قوناقتارى ٴجيى ايالدايدى.

9-ورىن. قۇنانباي قاجى مەشىتى

قۇنانباي قاجى مەشىتى – قارقارالى قالاسىندا ورنالاسقان، اعاشتان قيىپ سالىنعان ٴدىني عيمارات. قۇرىلىسى 1850 جىلى باستالىپ، 1851 جىلى سالىنىپ بىتكەن. قۇنانباي قاجى مەشىتى قارقارالى وكرۋگىندە يسلام ٴدىنىن ۋاعىزداۋعا، بالالاردىڭ حات تانىپ، ساۋات اشۋىنا كوپ قىزمەت ەتكەن. ىشىنە ٴبىر مەزگىلدە 300 ادام سىيىپ، ناماز وقي الادى.

قۇنانباي قاجى مەشىتى وتكەن عاسىردىڭ وتىزىنشى جىلدارى يسلام ٴدىنىن قۋدالاعان كەڭەستىك يدەولوگيانىڭ سالدارىنان جابىلىپ، عيمارات توزىپ كەتكەن بولاتىن. ارادا الپىس جىلداي ۋاقىت وتكەن سوڭ، تەك توقسانىنشى جىلدارى قايتادان كالپىنا كەلتىرىلدى.

قۇنانباي قاجىنىڭ قارقارالىداعى كوك كۇمبەزدى كوركەم مەشىتى – ەلىمىزدەگى تاريحي-مادەني ەسكەرتكىشتىڭ ٴبىرى. بىرىنشىدەن، قازاق ٴۇشىن ول ۇلتتىق ساۋلەت ونەرىنىڭ اسا باعالى جادىگەرى، ەكىنشىدەن، ٴوڭىردىڭ كورىكتى جەرلەرىن كورۋگە كەلگەن قوناقتاردىڭ الدىمەن اتباسىن بۇرار قارا شاڭىراعى. مۇندا جىلىنا 150-گە جۋىق شەتەلدىك تۋريست باس سۇقسا، وڭىرلەردەن كەلگەن ساياحاتشىلاردىڭ سانى 1000-نان اسىپ جىعىلادى.

8-ورىن. ترانسپورت تاۋەر

استانا قالاسىندا ورنالاسقان «ترانسپورت تاۋەر» اكىمشىلىك عيماراتى قازاقستاننىڭ ەڭ بيىك 10 عيماراتىنىڭ قاتارىنا جاتادى. 2003 جىلى قولدانىسقا بەرىلگەن عيمارت 36 قاباتتان تۇرادى، بيىكتىگى 155 مەتر. جوعارعى قاباتتارعا كوتەرىلەتىن ادامدار اعىنىن رەتتەۋ ٴۇشىن عيماراتتا 10 ليفت جۇمىس ىستەيدى. عيماراتتا 150 ادامدىق ٴدامحانا، 300 ورىندىق كونفەرەنس-زال بار.

حالىق اراسىندا «وتتىق» اتالىپ كەتكەن عيمارات ٴوز تاريحىندا ەكى رەت ورتكە وراندى. قولدانىسقا بەرىلگەنگە دەيىن 2003 جىلى قۇرىلىس جۇمىستارى بارىسىندا جوعارعى قاباتتاردىڭ بىرىنەن ٴورت شىققان. رەسمي دەرەكتەرگە قاراعاندا ٴورتتىڭ شىعۋىنا دانەكەرلەۋ جۇمىستارى سەبەپ بولعان.

4 تەحنيكالىق جانە 32 قولدانىستاعى قاباتى بار عيماراتتان 2006 جىلى تاعى دا ٴورت شىقتى. ٴورت سوندىرۋگە 148 ادام جانە 32 ارنايى تەحنيكا قاتسىسقان. ناتيجەسىندە 6 ٴورت ٴسوندىرۋشى شىنى سىنىقتارىنان زارداپ شەگىپ، ەكى قىزمەتكەرگە ٴيىس تيگەن.

7-ورىن. «قازاقستان» قوناق ٴۇيى

«قازاقستان» قوناق ٴۇيى الماتى قالاسىنىڭ ورتالىعىندا ورنالاسقان. بيىكتىگى 102 مەترلىك قوناق ٴۇيدىڭ تومەنگى قاباتتارىندا قوناقتاردى تىركەۋ، ولارعا تۇرمىستىق، تەحنيكالىق قىزمەت كورسەتۋ (پوشتا، تەلەگراف، جيناق كاسسالارى، مەديسينالىق جاردەم، جولاۋشىلار كاسساسى) بولمەلەرى جۇمىس ىستەيدى. جىلىنا 266 مىڭ ادامعا قىزمەت كورسەتە الادى. جينالىستار، سەمينارلار وتكىزۋگە ارنالعان ورىندارى، 116 ورىندىق ٴماسليحات زالى، بيزنەس ورتالىعى، جازعى كافە، بانكەت زالى بار.

«قازاقستان» قوناق ٴۇيى ەلدەگى جەر سىلكىنۋ ٴقاۋپى بار ايماقتا ورنالاسقان. ول سەيcميكالىق جاعىنان بەرىك. ەڭ جوعارعى قاباتتا تاۋ مەن قالا كەلبەتى ايقىن كورىنەتىن رەستوران جۇمىس ىستەيدى. ٴوزىنىڭ ەرەكشە پىشىنىمەن بۇل قوناق ٴۇي الماتى قالاسىنىڭ سيمۆولدارىنىڭ ٴبىرى.

6-ورىن. بەيبىتشىلىك پەن كەلىسىم سارايى

پيراميدا ىسپەتتى ەتىپ تۇرعىزىلعان ساراي 2006 جىلى 2 قىركۇيەكتە سالتاناتتى تۇردە اشىلدى. عيمارات اعىلشىن ارحيتەكتورى ن.فوستەردىڭ جوباسىمەن سالىنعان. بەيبىتشىلىك پەن كەلىسىم سارايىندا قازاقستان حالىقتارى اسسامبلەياسى حالىقارالىق جانە ٴدىنارالىق كەلىسىم ورتالىعى، مۇراجاي، 1،5 مىڭ ورىندىق وپەرا زالى، قىسقى باق ورنالاسقان. ساراي عيماراتىنىڭ قۇرىلىسى قۇبىلمالى اۋا رايىن ەسكەرە وتىرىپ سالىنعان.

بەيبىتشىلىك پەن كەلىسىم سارايى – ساۋلەت ونەرىنىڭ بىرەگەي تۋىندىسى. ول استانا قالاسىنىڭ قولدان جاسالعان جوتاسىنىڭ ۇستىندە ورنالاسقان. بولات پەن تاستان تۇرعىزىلعان ساراي ٴوزارا رۋحاني تۇسىنۋشىلىكتىڭ جاھاندىق ورتالىعىنا اينالدى.

5-ورىن. مەدەۋ سپورت كەشەنى

مەدەۋ سپورت كەشەنى – جاساندى مۇز ايدىنى بار دۇنيە جۇزىندەگى ەڭ ٴىرى سپورت كەشەنى. الماتى قالاسىنان 18 شاقىرىم جەردە، كىشى الماتى شاتقالىندا، تەڭىز دەڭگەيىنەن 1691،2 مەتر بيىكتىكتە ورنالاسقان. مەدەۋ سپورت كەشەنى 1972 جىلى تۇرعىزىلعان. جاساندى مۇزدىڭ قالىڭدىعى جازدا 3-4 سم، قىستا 10-15 سم-گە دەيىن جەتەدى.

«مەدەۋ» مۇز ايدىنىندا سپرينتەرلىك جانە كلاسسيكالىق كوپسايىستان، ت.ب. سپورت تۇرلەرىنەن ٴارتۇرلى حالىقارالىق جارىستار وتكىزىلىپ، دۇنيەجۇزىلىك، ەۋروپالىق جانە ۇلتتىق رەكوردتار جاسالعان. مەدەۋ – تەك سپورت جارىستارى ٴۇشىن عانا ەمەس، سونىمەن قاتار قالا تۇرعىندارى مەن قالا قوناقتارىنىڭ اسەم تابيعات اياسىندا دەمالاتىن ورنى. ەلىمىزدىڭ باسقا قالالارىنىڭ تۇرعىندارى، شەتەل تۋريستەرى قازاقستاننىڭ وڭتۇستىك استاناسىنا «مەدەۋ» ٴۇشىن كەلىپ جاتادى. قازاقستان تۋرالى ايتقاندا، كەز كەلگەن ادامنىڭ ويىنا بيىك تاۋداعى مەدەۋ مۇز ايدىنى الدىمەن ەسكە تۇسەدى. ويتكەنى بۇگىندە مەدەۋ سپورت كەشەنىنىڭ اتى بۇكىل الەمگە جايىلعان. ساپاسى جاعىنان ەۋروپانىڭ ەڭ تاڭداۋلى دەگەن شاڭعى جولدارىنا بەرىسپەيتىن، ال سىرعاناۋ قاسيەتى جونىنەن ولاردان اسىپ تۇسەتىن قۇرىلىسپەن ماقتانا الامىز.

4-ورىن. قوجا احمەت ياسساۋي كەسەنەسى

تۇركىستان قالاسىندا ورنالاسقان xiv عاسىردىڭ سوڭىندا تۇرعىزىلعان ارحيتەكتۋرالىق عيمارات ورتا عاسىرلىق ساۋلەت ونەرىنىڭ كورنەكتى ەسكەرتكىشى بولىپ تابىلادى. ول xii عاسىردا ٴومىر سۇرگەن بۇكىل شىعىسقا اتى ايگىلى كونە تۇركى اقىنى، ٴسوفيزمدى ۋاعىزداۋشى قوجا احمەت ٴياسساۋيدىڭ بەيىتىنىڭ باسىنا ورناتىلعان. بۇل ەسكەرتكىش – ورتا ازيا مەن قازاقستانداعى ٴبىزدىڭ زامانىمىزعا دەيىن ساقتالعان ەڭ ٴزاۋلىم كۇمبەزدى، قىشتان سوعىلعان عيمارات. سىرتقى كورىنىسى سيممەتريالى جيناقى كەلگەن بۇل قۇرىلىسقا ۇلكەندى-كىشىلى 35 زالدار مەن بولمەلەر سىيىپ تۇر. ولاردىڭ بارلىعى بىر-بىرىمەن قوس قاباتتى 8 دالىزبەن جانە ٴار ٴتۇرلى وتپەلى باسپالداقتارمەن جالعاسىپ جاتادى.

عيماراتتىڭ كىرە بەرىس ەسىگىنىڭ ىشكى ماڭدايشاسىندا قازىرگە دەيىن جاقسى ساقتالعان جازۋدان مىناداي سوزدەردى وقۋعا بولادى: «بۇل اۋليە مەكەن اللا تاعالانىڭ راحىمى جاۋعان پاديشا امىر-تەمىر كورەگەننىڭ جارلىعى بويىنشا ورناتىلدى... اللا تاعالا ونىڭ ٴامىرىنىڭ عاسىرلار جاساۋىنا ٴناسىپ ەتسىن!». قوجا احمەت ياسساۋي كەسەنەسى تالاي عاسىردان بەرى مۇسىلمانشىلىقتىڭ التىن بەسىگى بولىپ كەلەدى. ونى بۇكىل قازاق جۇرتى، تۇركى الەمى ەرەكشە قاسيەت تۇتادى.

3-ورىن. اقوردا

اقوردا – قازاقستان رەسپۋبليكاسى پرەزيدەنتىنىڭ رەزيدەنسياسى. ەسىلدىڭ سول جاعالاۋىندا ورنالاسقان. اقوردانىڭ قۇرىلىسى 2001 جىلدىڭ قىركۇيەگىندە باستالىپ، رەسمي تۇساۋكەسەرى 2004 جىلدىڭ جەلتوقسانىندا ٴوتتى.

عيمارات قازىرگى زامانعى قۇرىلىستىڭ ەڭ تاڭداۋلى ادىستەرىن قولدانا وتىرىپ، مونوليت قۇيماتاستان سالىنعان. عيمارات جەر بەتىندە 5 جانە جەر استىنداعى 2 قاباتتان تۇرادى.

مەملەكەت باسشىسى رەزيدەنسياسىنىڭ اتاۋىندا تەرەڭ ماعىنا بار. «اق» ٴسوزى تۇركىلىك مادەنيەت سەمانتيكاسىندا ەڭ الدىمەن قاسيەتتىلىكتى (كيەلىلىكتى) بىلدىرەدى. بۇل ۇعىم – شاتتىق پەن ساتتىلىكتىڭ، شىنايىلىق پەن مارتتىكتىڭ، ار-ۇيات پەن جاقسىلىقتىڭ نىشانى

.

2-ورىن. حان شاتىر

حان شاتىر ساۋدا جانە ويىن-ساۋىق كەشەنى استانا قالاسىنىڭ 12 جىلدىق مەرەيتويىنا وراي 2010 جىلى اشىلدى. تۇعىرلى مونوليتتىك سوم قۇيمالاردان تۇرعىزىلعان بۇل كەشەننىڭ بيىكتىگى 200 مەتردى قۇرايدى.

بۇل ساۋدا جانە ويىن-ساۋىق ورتالىعىندا ەڭ ۇلكەن قالالىق باق، ٴىرى ساۋدا ورتالىقتارى، كينوتەاتر، كونسەرت زالدارى بار. سونىمەن بىرگە عيماراتتىڭ بارلىق قاباتتارىندا ٴدامحانالار مەن مەيرامحانالار ورنالاسقان. ورتالىقتىڭ ىشىندە تروپيكالىق باقتار، گۇلزارلار، سۋبۇرقاقتارى بار.

ايگىلى ساۋلەتشى نورمان فوستەردىڭ قيالىنان تۋعان ساۋلەت عاجايىبى – حان شاتىر ورتالىق ازياداعى بالاماسىز ٴارى ەڭ ٴىرى ارحيتەكتۋرالىق جوبا بولىپ تابىلادى. تاعى ٴبىر اتاپ وتەتىن جايت، حان شاتىر – «forbes style» جۋرنالىنىڭ نۇسقاسى بويىنشا الەمنىڭ ەڭ ۇزدىك ون ەكوعيماراتتارىنىڭ تىزىمىنە ەندى.

1-ورىن. بايتەرەك

ەسىل وزەنىنىڭ سول جاعالاۋىندا 2002 جىلى بوي كوتەرگەن ٴزاۋلىم «بايتەرەكتىڭ» بيىكتىگى 97 م. 97 سانى كەزدەيسوق ەمەس، ول استانانىڭ الماتىدان استاناعا اۋىسقان مەزگىلىن بىلدىرەدى. مونۋمەنت ۇزىن تەمىرلى قۇرىلىمداردان، شىنىدان، مەتالدان، بەتوننان تۇرعىزىلعان. الىپ شاردىڭ ٴتۇسى حامەلەون شىنىلارمەن كومكەرىلگەن. كۇننىڭ شاپاعىنا شاعىلىسىپ، ٴارتۇرلى تۇسكە قۇبىلىپ تۇرادى.

استانانىڭ ورتالىعىندا كوككە بوي سوزىپ تۇرعان «بايتەرەك» – قازىرگى قازاقستاننىڭ نىشان-سيمۆولى، ۆيزيتتىك كارتوچكاسى. استاناعا تابان تىرەگەن جاننىڭ ٴبىرىنشى باراتىن جەرى – «بايتەرەك». ول قازاق حالقىنىڭ قايتا ورلەۋى مەن تۇلەۋىنىڭ، مەملەكەتتىلىگىنىڭ، بيىكتىك پەن تەرەڭدىكتىڭ، كەڭدىكتىڭ بەلگىسى، دارحاندىقتىڭ كورىنىسى ىسپەتتى. ول بەيبىت ٴومىر مەن كەلىسىمگە ۇمتىلعان بارلىق قازاقستاندىقتاردىڭ عۇمىرلىق مۇراتىن بىلدىرەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي