استانا: 
قاراعاندى وبلىسىنىڭ اكىمى ەرلان قوشانوۆ ٴوزىنىڭ ورىنباسارلارىنان كەم دەگەندە اپتاسىنا ٴبىر رەت قوعامدىق كولىكتە ٴجۇرۋدى تالاپ ەتتى. سونداي-اق، قالاداعى قوعامدىق كولىكتەردە ەلەكتروندى بيلەتتەۋ جۇيەسىنىڭ ەنگىزىلۋى جايلى ماسەلە كوتەردى، دەپ جازادى baq.kz اگەنتتىگىنىڭ ايماقتاعى ٴتىلشىسى.
قاراعاندىدا جولاۋشىلار تاسىمالداۋ ساپاسىنىڭ ناشارلىعى ٴبىراز ۋاقىتتان بەرى ايتىلىپ كەلەدى. وبلىس اكىمى ٴوزى دە قوعامدىق كولىكتەردە قاتىناپ، ماسەلەنى ٴىشىنارا باقىلاپ كورگەن بولاتىن. وسىلايشا ايماق باسشىسى جولاۋشىلارعا كورسەتىلەتىن قىزمەت ساپاسىنىڭ جاقسارۋىن تالاپ ەتتى.
«تازالىق، جۇيەلىلىك جانە سىپايى قىزمەت كورسەتۋ ساپاسى – وسىنىڭ بارلىعىن قاداعالاۋدى جالعاستىرۋ قاجەت. كەستە قۇرۋدى تاپسىرامىن: مەنىڭ ورىنباسارلارىم، باسقارما باسشىلارىنان باستاپ، بارلىعىن مارشرۋتتار بويىنشا ٴبولىپ تاستاڭىزدار، قوعامدىق كولىكپەن ٴجۇرسىن. ول تىزىمگە قاراعاندىنىڭ اكىمىن دە ەنگىزىڭىزدەر، ٴوز ورىنباسارلارىمەن بىرگە ٴجۇرسىن. شەنەۋنىكتەر قوعامدىق كولىكتە جۇرگەن ٴار ساپارلارىن سيپاتتاۋلارى ٴتيىس»، - دەدى ەرلان قوشانوۆ.
ەرلان قوشانوۆ ەلەكتروندىق بيلەتتەۋ جۇيەسىن ەنگىزۋدى باقىلاۋدى جالعاستىرۋدى تاپسىردى. ەلەكتروندىق بيلەتتەۋ جۇيەسىن ەنگىزۋ جوسپارى تۋرالى قاراعاندىدا العاش رەت ٴ2017-شى جىلدىڭ كۇزىندە ايتىلدى. ٴ2018-شى جىلدىڭ ماۋسىمىندا تەستىلىك رەجيمدە جۇمىس ىستەي باستاعان العاشقى تەرمينالدار ورناتىلدى. قۇرىلعىلاردى قاراعاندىعا كورەي ەلىنىڭ پۋسان قالاسىنان جەتكىزگەن.
قالا اكىمى نۇرلان اۋباكىروۆتىڭ ايتۋىنشا، قۇرىلعىلاردى ورناتۋ جۇمىستارى اياقتالدى. ول اتالمىش جۇيە جىل سوڭىنا قاراي جۇمىس ىستەي باستايتىنىنا ۋادە بەردى.
«ٴبىز بارلىق جەڭىلدىك بەرىلەتىن جانە الەۋمەتتىك كومەك الاتىن ازاماتتار ٴتىزىمىن رەتتەدىك. «كار-تەل» كومپانياسىمەن ينتەرنەت تاراتۋ جونىندە كەلىسىمشارت جاسالدى. قىركۇيەكتەن باستاپ جۇيەگە قىزمەت كورسەتۋگە بايلانىستى جۇمىستار باستالدى. شامامەن 300-گە جۋىق ادام جۇمىس ىستەيدى، ول – باعدارلامالاۋشىلار، ديسپەتچەرلەر، تەحنيكتەر»، - دەپ مالىمدەدى نۇرلان اۋباكىروۆ.
ونىڭ سوزىنشە، قۇرىلعىلاردى ورناتۋ اياقتالعان. جەلتوقساندا جۇيەنى تولىقتاي ىسكە قوسۋ جوسپاردا.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1674 
0
4641
0