BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

شورت-ترەكتى دامىتاتىن ماماندار از – باس جاتتىقتىرۋشى

استانا، baq.kz. شورت-ترەكتەن قازاقستان قۇراماسىنىڭ باس جاتتىقتىرۋشىسى ٴمادىعالي قارسىبەكوۆ وسى سپورتتىڭ قازاقستانداعى احۋالى تۋرالى الماتىدا العاش رەت وتكەن الەم كۋبوگى كەزەڭىنەن سوڭ olympic.kz سايتىنا بەرگەن سۇحباتىندا مالىمدەدى.

«كوپتەگەن شەتەلدىك قوناقتار مەن باپكەرلەر مەدەۋ مۇز ايدىنىن كورىپ، تاڭ-تاماشا بولدى. كونكيشىلەردىڭ ىشىندە ٴومىر بويى مەدەۋدى كورۋدى ارمانداعاندار دا بار ەكەن. شىمبۇلاقتىڭ كەرەمەتىن دە كوردى. وسىلاردان سوڭ ٴبىزدىڭ قىسقى وليمپيادانى وتكىزۋگە مۇمكىندىگىمىز بار ەكەنى ويعا ورالدى. بىزدە الەم چەمپيوناتىن وتكىزەتىن مۇمكىندىك بار. بۇل جارىسقا ٴبارى ريزا بولىپ جاتىر. استانادا وتكىزۋگە دە بولادى»، - دەدى باس جاتتىقتىرۋشى.

الماتىداعى الەم كۋبوگى كەزەڭىندە سپورتشىلاردىڭ ناتيجەلەرىنە باعا بەردى.

«ٴبىز العا قويعان ماقساتتىڭ از عانا بولىگىن ورىندادىق. قولا مەدال يەلەندىك. ەكى جۇلدە الۋعا دا بولاتىن ەدى. الەمدىك سپورتشىلارمەن باسەكەلەسە الاتىنىمىز بايقالادى. ارينە، كەمشىلىك تە جوق ەمەس. ٴبىراق العا جىلجۋ بار ەكەنىن دە مويىنداۋ كەرەك. مەنىڭ بولجامىم بويىنشا، كەلەسى جىلى ناتيجە بۇدان دا جوعارى بولادى. ٴقازىر ٴبىزدىڭ جۇيەمىز دە، كوماندامىز دا وزگەرىس ۇستىندە. سپورتشىلار بەيىمدەلىپ جاتىر. ەندى ٴبىر جىلدا ٴبارى رەتتەلەدى دەپ ويلايمىن. تاكتيكالىق تۇرعىدان قاتەلىكتەر كەتىپ جاتىر. ۇنەمى بولماسا دا، ٴىشىنارا بايقالادى. مارەگە جاقىن تۇستا كوپ كۇش سالۋ كەرەك. بۇل تۇرعىدا كورەيالىقتار مەن ۆەنگرلەر مىقتى. ولار بىرنەشە مەترگە قالىپ كەلە جاتسا دا، جەڭىپ كەتۋى مۇمكىن. الدا الەم كۋبوگىنىڭ ٴالى بىرنەشە كەزەڭى بار. سودان سوڭ ۇپاي ساناۋ باستالادى. سول كەزدە كىمنىڭ الەم چەمپيوناتىنا قاتىساتىنى دا بەلگىلى بولماق. الەمدىك سىن ناۋرىز ايىنىڭ ورتاسىندا سوفيادا وتەدى»، - دەدى ول.

بيىلعى ماۋسىمدا قىزدار كومانداسىنىڭ دەڭگەيى ايتارلىقتاي وسكەنىن اتاپ ٴوتتى.

«الەم كۋبوگى كەزەڭدەرىنىڭ بىرىندە ەستافەتادان بەسىنشى ورىن الدى. ولار جۇلدەگە ۇمىتكەرلەر قاتارىندا. ەرلەرىمىز دە ەستافەتادان كوتەرىلىپ كەلەدى. ەندى الەم كۋبوگىنىڭ درەزدەن مەن تۋريندە وتەتىن ەكى كەزەڭى قالدى. ۇپاي جيناۋ ٴۇشىن دايىندالامىز. ەستافەتادان الەم چەمپيوناتىنا مىندەتتى تۇردە جولداما الۋ قاجەت. ەلدەگى شورت-ترەكتىڭ دەڭگەيى تاپ وسى ەستافەتادا بىلىنەدى»، - دەدى ٴمادىعالي قارسىبەكوۆ.

ول قازاقستاندا شورت-ترەك سپورتى كاسىبي مامانداردىڭ ازدىعىنان جوعارى دەڭگەيدە دامىماي وتىرعانىن ايتتى.

«الەمنىڭ ۇزدىك كوماندالارىنا قاراپ، ولاردىڭ تولىق شتابپەن جۇرەتىنىن بايقايمىن. باپكەردەن باستاپ مەحانيككە دەيىن بار. مامانداردىڭ ازدىعىنان ٴبىز بۇل دەڭگەيگە ٴالى جەتكەن جوقپىز. كاسىبي ماماندار ساۋساقپەن سانارلىق قانا. جاس ماماندار دايىندىق جۇيەسىنىڭ بارلىق قىر-سىرىن بىلە بەرمەيدى. ال شەتەلدەن شاقىراتىن مامانعا كوپ اقشا تولەۋ قاجەت. ٴبىزدىڭ مەحانيكتى دە شەتەلگە شاقىرعان. ٴبىراق مەن ونى توقتاتىپ، ەلىمىزدە شورت-ترەكتى دامىتاتىن ادام كەرەك دەدىم. اقشانىڭ سوڭىنا تۇسپەۋ كەرەك. ورالدا سپورتتىڭ بۇل ٴتۇرىن دامىتۋ ٴۇشىن ماعان 12 مىڭ تەڭگە تولەيتىن. كيىم اۋىستىراتىن بولمەدە ۇيىقتادىم. ٴبىراق كوماندانى جاساقتاي الدىم. مەن باسقا جاققا كەتىپ قالماۋ ٴۇشىن بالالار تاماق اكەلىپ، قولداۋ كورسەتەتىن. ەگەر مەنى اقشا قىزىقتىرسا، باياعىدا شەتەل اساتىن ەدىم عوي. شىدادىم. بارىنە كوندىم. ناتيجەسىندە الەم ۇزدىكتەرىمەن تايتالاسا الاتىن قىز-جىگىتتەردى ٴوسىردىم. مۇنىڭ ٴبارى ماعان دەگەن سەنىمنىڭ ارقاسىندا... ماعان ۇوك-تە، سپورت مينيسترلىگى دە سەندى»، - دەدى شورت-ترەكتەن قازاقستان قۇراماسىنىڭ باس جاتتىقتىرۋشىسى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي